Хабзэубзыху IуэхущIапIэхэм я зэпыщIэныгъэр

Грознэ къалэм щекIуэкIащ Кавказ Ищхъэрэм и Парламент зэгухьэныгъэм и ХI конференцыр. Апхуэдэ зэхуэсыр щIыналъэхэм чэзуурэ щрагъэкIуэкI хабзэщ, икIи мы гъэм ар Шэшэн Республикэм къылъысащ. Iуэ­хум хэтащ Къэбэрдей-Балъкъэ­рым и хабзэубзыху IуэхущIапIэм и УнафэщI Егоровэ Татьянэ зи пашэ гупри. 

ЛIыкIуэхэм яхэтащ КъБР-м и Парламентым и УнафэщIым и къуэдзэ Къардэн Мурат, Хабзэмрэ щIыпIэ унафэр зехьэнымкIэ комитетым и унафэщI Мэлбахъуэ Борис, Экономикэ политикэмкIэ, зыужьыныгъэмкIэ, туриз­мэмрэ хьэрычэт IуэхухэмкIэ комитетым и унафэщI Iэпщэ ­Заур, Мэкъумэш IэнатIэмкIэ, щIы­уэпсыр къэгъэсэбэпынымкIэ, экологиемрэ дыкъэзыухъуреихь дунейр хъумэнымкIэ комитетым и унафэщI ТекIушэ Артур, ПромышленностымкIэ, транспортымкIэ, связымрэ гъуэгу IэнатIэмкIэ комитетым и унафэщIым и къуэдзэ Байдаев Сэлихь, Лэ­жьыгъэмкIэ, социальнэ политикэмкIэ, узыншагъэр хъумэ­нымрэ ветеранхэм я IуэхухэмкIэ комитетым и унафэщIым и къуэдзэ Безгодькэ Владимир сымэ.
ЗэIущIэм щIадзэным и пэ къихуэу, Кавказ Ищхъэрэмрэ Осетие Ипщэ Республикэмрэ я депутатхэр щыIащ Шэшэн Республикэм и япэ Президент, Урысейм и ЛIыхъужь Кадыров Ахъмат и фэеплъ мывэм икIи удз гъэгъахэр абдеж ягъэтIылъащ. 
Зэхуэсыр къыщызэIуахым, Шэ­шэным и Iэтащхьэ Кадыров Рамзан и фIэхъус тхыгъэм къеджащ. 
ШР-м и Парламентым и Уна­фэщI Жамалдаев Шаид Iуэхум хэтхэм фIыщIэ яхуищIащ икIи къыхигъэщащ щIыналъэхэм я зэхущытыкIэхэр ирагъэфIэ­кIуэ­ныр зэрагуапэр. Абы жиIащ жы­лагъуэ-политикэ, социально-экономикэ Iуэхухэм зэгъусэу зэры­тепсэлъыхьынум мыхьэнэшхуэ иIэу къызэрилъытэр. ФIэхъус пса­лъэхэр жаIащ адрей щIыналъэхэми я хабзэубзыху IуэхущIапIэхэм я унафэщIхэм. 
Егоровэ Татьянэ конференцым и къызэгъэпэщакIуэхэми абы хэтхэми защыхуигъазэм жиIащ: «Мыпхуэдэ зэхуэсхэр зэры­щхьэ­пэр мызэ-мытIэу нэрылагъу ­хъуащ. Урысей Федерацэм и щIы­налъэхэм щылажьэ хабзэубзыху IуэхущIапIэ псоми ди къалэнхэр зыщ, абы къыхэкIыу дызэ­дэлэ­жьэным, ди зэпыщIэныгъэ­хэм зедгъэужьыным мыхьэ­нэш­хуэ яIэщ».
Егоровэм къыхигъэщащ Кавказ Ищхъэрэм и Парламент зэгухьэныгъэр Къэбэрдей-Балъкъэрым и хабзэубзыху IуэхущIапIэм и жэрдэмкIэ къызэрагъэпэщауэ зэрыщытар икIи 2011 гъэм накъыгъэм и 27-м Налшык къалэм абы теухуа зэгурыIуэныгъэм Iэ зэрыщыщIадзар. 
- Кавказ Ищхъэрэм и щIыналъэхэм я парламентхэр УФ-м и хабзэубзыхухэм я Советым дэ­лэжьэнымкIэ IэмалыфIщ мы зэгухьэныгъэр. Абы кърикIуаращи, ди жэрдэм куэд къыддаIыгъащ. Шэч хэмылъу, адэкIи дыхущIэ­къунущ къэрал хабзэхэр егъ­э­фIэкIуэным ди гуащIэ зэры­хэтлъхьэнум, - къыхигъэщащ Егоровэм. -  Псом хуэмыдэу, ды­зыхэт зэман гугъум ди къару псори етхьэлIэн хуейщ Урысей Федерацэм и унафэщIхэм къэралым и къэкIуэнум, абы и шынагъуэншагъэм ехьэлIауэ яубзыхуа политикэр ядэIыгъыным. ФIыщIэ яхудощI икIи дропагэ Урысейм и зауэлIхэм, ди хэкуэгъу щIалэхэм, я лIыгъэмрэ хахуагъэмрэ, Хэкум хуэпэжу я къулыкъур зэрырахьэкIым папщIэ! 
Егоровэ Татьянэ дыщIигъуащ УФ-м и Президент Путин Владимир игъэбелджыла къалэнхэр гъэзэщIэным теухуауэ Кавказ Ищхъэрэм и депутатхэм ялъэкI къызэрамыгъэнэнур. Ар конференцым хэтхэм ехъуэхъуащ щIыналъэхэм зезыгъэужьыну Iуэхугъуэхэр, жэрдэмхэр къайхъулIэну. 
Конференцым Iуэхугъуэ 16-м щытепсэлъыхьащ, Кавказ Ищхъэрэм и щIыналъэхэм щыщыIэ гугъуехьхэмрэ абыхэм я хэкIы­пIэхэр зыхуэдэмрэ я лъабжьэу. 
Зэхуэсым къыщагъэлъэгъуа федеральнэ законхэм я проектхэм ящыщу тIур КъБР-м и Парламентым игъэхьэзырат. Ахэр: «УФ-м Административнэ хабзэхэр къыщызэпемыгъэудынымкIэ и Кодексым и Iыхьэ 12.3-мрэ 12.37-мрэ халъхьэ зэхъуэкIыныгъэхэм ехьэлIауэ» федеральнэ закон №728324-8-м и проектыр УФ-м и Федеральнэ Зэхуэсым и Къэрал Думэр нэхъ псынщIэу зэрыхэплъэным хуэгъэхьэ­зыры­нымрэ «Полицэм и IуэхукIэ» Федеральнэ законым и Iыхьэ 12-м зэхъуэкIыныгъэхэр хэлъхьэным теухуауэ» проектымрэ. Абыхэм зэIущIэм хэтхэм яхутепсэ­лъы­хьащ Мэлбахъуэ Борис.
Конференцым и кIэм зэгу­хьэ­ныгъэм и къыкIэлъыкIуэ зэхуэсыр щрагъэкIуэкIыну пщэрылъ щащIащ Къэрэшей-Шэрджэсым и Парламентым.
Егоровэ Татьянэ журналистхэм щепсалъэм жиIащ: «Къыхэзгъэщыну сыхуейт КИФЩI-м и Парламент зэгухьэныгъэм и XI конференцыр купщIафIэ зэрыхъуар. Iуэхугъуэ къэтIэтахэр Кавказ Ищхъэрэм и щIыналъэхэм я закъуэкъым зыхуэгъэзар, атIэ къэрал псом и дежкIи мыхьэнэ яIэщ. Федеральнэ хабзэхэм ятеухуа проекти 7 къыхалъхьати, тIур КъБР-м и Парламентым къыбгъэдэкIащ. Къыхэгъэщыпхъэщ жэрдэмхэм я зыр УФ-м и Правительствэм къыддиIыгъауэ УФ-м и Къэрал Думэр хэплъэн хуейуэ зэрыщытыр. Дыщогугъ зэман ­гъунэгъум абы и IуэхукIэ хъыбарыфI къытIэрыхьэну. Конференцыр зэрекIуэкIам арэзы сыкъищIащ, жэрдэмхэр псори къыддаIыгъащ». 
Кавказ Ищхъэрэм и Парламент зэгухьэныгъэм хэтхэм къалэн нэхъыщхьэу зыхуагъэувыжхэм ящыщщ къэрал хабзэхэм зрагъэужьыныр, цIыхум и хуитыныгъэхэр щызэхуэдэ къэралым и Iуэхухэр ирагъэфIэкIуэныр, политикэ, социальнэ, экономикэ зэхъуэкIыныгъэхэм ехьэлIауэ зэчэнджэщыныр парламентхэм я зэдэлэжьэныгъэм зрагъэубгъу­ныр, нэгъуэщIхэри.