ЩIыбагъ быдэ

Дзэ Iуэху хэхам хэтхэм къэралым яхуищI гулъытэм къищынэмыщIауэ, а щIалэхэр дэIыгъыным хуэунэтIауэ жылагъуэми лэжьыгъэшхуэ ирагъэкIуэкI. «Узэкъуэтмэ, улъэщщ» къыхуеджэныгъэм и мыхьэнэр нэсу ди цIыхухэм къазэрыгурыIуэр наIуэ къищIащ ди зауэлIхэм щIыбагъ быдэ зэрахуэхъум, ахэр зыхуей дэIэпыкъуныгъэхэр жыджэру къыхузэрагъэпэщкIэрэ. Ди къэралым и дэтхэнэ щIыпIэми икIыу абыхэм щIэх-щIэхыурэ яIэрохьэ зыхуэныкъуэ хьэпшыпхэмрэ ерыскъыхэмрэ.

Апхуэдэ Iуэху щхьэпэ иджыблагъэ зэфIагъэкIащ Лэскэн районым хыхьэ Хьэтуей жылэм щыпсэу ДзыхьмыщIхэ я лъэпкъым. Абыхэм я мылъкукIэ гуманитар дэIэпыкъуныгъэр къызэрагъэпэщри, «ГАЗель» хьэлъэзешэ машинитIкIэ дзэ Iуэху хэхам щыIэ щIалэхэм хуашащ. Апхуэдэ жэрдэмыр, шэчыншэу, лъэпкъым и пщIэр зыIэтщ, ахэр зыщыщ жылэми и цIэр фIыкIэ зыгъэIунщ.
Хьэтуей жылэм щыщ щIалэ 40 дзэ Iуэху хэхам щыIэщ, лIыгъэрэ хахуагъэрэ къагъэлъагъуэу къэралым, хэкум и пщIэр, и хуитыныгъэр яхъумэу. Абыхэм дзэ къулыкъур щрахьэкI Запорожье, Донецк щIыналъэхэм. ДзыхьмыщIхэ я лIыкIуэхэм а щIалэхэм ящыщ гуэрхэм зыпащIэри, нэхъ зыхуей-зыхуэныкъуэ хьэпшыпхэр зрагъэщIащ. Къагъэлъэгъуахэм ящыщу нэхъ мылъкушхуэ зытекIуэдэнур квадрациклырати, ар и пщэ дилъхьэжащ хьэрычэтыщIэ ДзыхьмыщI Заур икIи апхуэдэ транспорти 2 къахуищэхуащ. Лъэпкъым щыщ зы унагъуи къэнакъым Iуэху щхьэпэм къыпэмыджэжу, щхьэж хузэфIэкI хилъхьащ. Апхуэдэу зауэлIхэм хуашащ щыгъын, вакъэ хуабэхэр, ерыскъыхэкIхэр, зэрызагъэкъабзэ хьэпшып зэмылIэужьыгъуэхэр, газ балоннхэр, генератор, техникэ Iэмэпсымэ зэхуэмыдэхэр, унагъуэхэм щаупщэфIа адыгэ шхыныгъуэ зэхуэмыдэхэр, нэгъуэщIхэри. 
«Дзэ Iуэху хэхам хэт щIалэхэм къалэнышхуэ ягъэзащIэ. Мамыр гъащIэм хэпсэукIхэм ахэр дэтIыгъынырщ иджыпсту ди къалэн нэхъыщхьэр. Зыхуэныкъуэ хьэпшыпхэмкIэ ахэр къызэдгъэпэщыфынри Iэмал хъарзынэщ, апхуэдэ щIыкIэкIэ ди гулъытэ зыхэзыщIэ щIалэхэм я гушхуэныгъэри хэхъуэнущ. Дэ жылэм къыщетхьэжьа Iуэхур щапхъэ яхуэхъуу, къуажэм дэс адрей лъэпкъхэми абы къыпащэну догугъэ. Дызэгъусэмэ, сыт хуэдэ гугъуехьми дыпэлъэщынущ, текIуэныгъэми нэхъ псынщIэу дыхуэкIуэнущ», - жаIащ ДзыхьмыщIхэ. 
ДэIэпыкъуныгъэр здаша Запорожье, Донецк щIыналъэхэм щыIэ дзэ частхэм я унафэщIхэм, къулыкъур щезыхьэкI щIалэхэм ДзыхьмыщIхэ я лъэпкъым фIыщIэ къыхуащIащ я гулъытэ зэрылъагъэсамкIэ, къыхагъэщащ а Iуэху щхьэпэр ТекIуэныгъэм гъунэгъу хуэзыщI хэлъхьэныгъэу къызэралъытэр, апхуэдэ дэIэпыкъуныгъэр абыхэм я дежкIэ уасэншэу зэрыщытыр.