Къуажэхэм зрагъэужь

Къуажэхэм псэупIэ щаухуэн, къыщащэ­хун е щыIэр зэIу­зэ­пэщ иращIын папщIэ худэчых зыхэт ипотекэ кредиту ятхэм   я процент ставкэр субсидие щIыным ехьэлIауэ Урысей Фе­дерацэм и Правительст­вэм лэжьыгъэ пыу­хы­кIахэр ирегъэкIуэкI икIи а Iуэ­ху­гъуэм тра­гъэ­­кIуэ­дэну сом меларди 4,8-рэ бюджетым иджы­ри мы гъэм къы­­хэкIынущ.
 
НэгъуэщIу жыпIэмэ, худэчых зыхэт ипотекэ кредиткIэ къащэхуа псэу­пIэхэм я уасэу зэгуры­Iуэ­ныгъэм къыщыгъэлъэгъуам щIигъур банкым   е ухуэныгъэр езыгъэ­кIуэкI IуэхущIапIэм къэ­ралым иретыж. Унафэм иджыблагъэ Iэ щIидзащ УФ-м и Правительствэм и УнафэщI Мишустин Ми­хаил. 
Сом меларди 4,8-м щыщу меларди 4,7-мкIэ худэчых зыхэт ипотекэ кредитхэр, ставкэр проценти 3-м нэхърэ нэхъыбэ мыхъуу, ятыным пащэжынущ. Абы и фIыгъэкIэ, ипэкIэ ята кредит мини 140-м щIигъум я процент ставкэхэр 2024 гъэм субсидие ящIынущ. 
«Абы мыхьэнэшхуэ иIэщ къуажэ щIыпIэхэм унэ къыщызыщэхуа е щызыухуа ди цIыхухэм, сабий зиIэ унагъуэхэм я дежкIэ», - щыжиIащ Мишустин Михаил Правительствэм и вице-премьерхэм дыгъэгъазэм и 2-м ядригъэкIуэкIа зэIущIэм. 
Фигу къэдгъэкIыжынщи, худэчых зыхэт ипотекэ кредитхэр 2020 гъэм ятын щIадзащ. Абы Iэмал къует къуажэм унэ щыбухуэну, къатитхум нэхърэ мынэхъыбэу зэтет унэм фэтэр щызы­Iэрыбгъэхьэну е унэ хьэзыр къэпщэхуну. 
Сом мелуан 81,7-р ху­ха­хынущ нэхъ пасэу яхуа унэр зэIузэпэщ щIыным щхьэкIэ худэчых зыхэт ипотекэ кредитхэр, проценти 5-м нэхърэ нэхъыбэ мыхъуу, субсидие щIыным. АбыкIэ цIы­ху­хэм я унэм уэздыгъэр, псыр, газыр щIашэ, бжьамийхэр, инженер коммуникацэхэр ирашалIэ, унащхьэхэр ира­хъуэж, н.къ. иращIэ  хъу­нущ. А программэри 2020 гъэм щегъэжьауэ мэлажьэ.
Худэчых зыхэт мы ипотекэ кредитым щхьэкIэ УФ-м и Правительствэм сом меларди 6,8-рэ мы гъэм жэпуэгъуэм бюд­жетым къыхигъэкIащ.
Къуажэ щIыпIэхэм щхьэ­кIэ ят худэчых зыхэт ипотекэ кредитыр субсидие щIыныр «Къуажэхэм сыт и лъэныкъуэкIи зегъэужьын» къэрал программэм хохьэ.