Дзэ Iуэху хэхам хэтахэм я тыншыпIэ къызэрагъэпэщ

«Хэкум и хъумакIуэхэр» къэрал фондым и къудамэу Къэбэрдей-Балъкъэрым щыIэр ­УФ-м щыпэрытхэм яхэтщ дзэ Iуэху хэхам ныкъуэ­дыкъуагъэ хэзыхахэм я тыншыпIэ щыпсэу унэхэм къащыхузэгъэпэщынымкIэ, зыхуей-зыхуэфIхэмкIэ ядэIэпыкъунымкIэ.

Псом хуэмыдэу гулъытэ хэха хуащI дэIэпы­къуэ­гъун­шэу пэш кIуэцIхэм къыщызымы­кIу­хьыфхэм, щымыIэбэфхэм. Мы Iуэхум ехьэлIауэ лэжьыгъэшхуэ ирагъэкIуэкI фондым и IэщIагъэлIхэм икIи дзэ Iуэху хахам и ветеранхэм, ныкъуэдыкъуэ хъуахэм сыт и лъэныкъуэкIи зы­щIагъакъуэ. Зэраубзыхуам ипкъ иткIэ псори зэхэту Iуэхугъуэ 83-кIэ абыхэм ядэIэпыкъунущ. 
Ветеранхэм я узыншагъэр зыхуэдэм елъытауэ пщэфIапIэхэр къыхузэрагъэпэщ я щхьэ Iуэху дэIэпыкъуэгъуншэу езыхэм дагъэкIыжыфын хуэдэу. Абыхэм хуэщIа унэлъащIэхэр: шэнтхэр, стIолхэр, хьэкъущыкъу, н.къ. зыдалъхьэхэр щIагъэувэ. Иджырей технологием хыхьэу «унэ губзыгъэ» системэхэри къагъэсэбэп. Псалъэм папщIэ, абы и фIыгъэкIэ цIыхур и пIэм имыкIыу унэ кIуэцIым техникэу щIэту хъуар зы пульткIэ хуэгъэлэжьэнущ икIи къыхуэгъэсэбэпынущ. 
Абы нэмыщI, фондым унэ щIыхьэпIэм деж дэкIуеипIэ щхьэхуэхэр, бжэхэр къахузэригъэпэщынущ. ЦIыхум и узыншагъэм елъытауэ абы хуэщIа гъуэлъыпIэхэр, хьэпшып дэлъ­хьэ­пIэхэр ягъэувынущ, зыгъэпскIыпIэхэм шэнт щхьэ­хуэхэмрэ хьэлъэ къэзыIэт Iэмэпсымэхэмрэ щIагъэувэнущ.
Ныкъуэдыкъуагъэ зыбгъэдэлъхэм хуащI апхуэдэ гулъытэм и фIыгъэкIэ абыхэм тыншыпIэ зэрагъуэтынум, я псэукIэри зэрефIэкIуэнум шэч хэлъкъым.