Кулиев Къайсын и цIэр зезыхьэ Балъкъэр къэрал драмэ театрым дыгъэгъазэм и 14 - 15 махуэхэм щекIуэкIащ иджырей гъуазджэхэмкIэ «Арт-Эль» щIымахуэ фестиваль гъэщIэгъуэныр. Ар къызэригъэпэщащ «Гильдия мастеров современного искусства» жылагъуэ зэгухьэныгъэм ди щIыналъэм щиIэ къудамэм.
Дыгъэгъазэм и 14 - 15 махуэхэм сыхьэт 11-м щыщIэдзауэ сыхьэт 20 хъуху Балъкъэр театрыр цIыху кIуапIэу щытащ. Абы щызэхуэсащ ди республикэм и мызакъуэу, гъунэгъу щIыналъэхэм къикIа дизайнерхэр, дэрбзэрхэр, пщафIэхэр, гъуазджэм и лIэужьыгъуэ куэдым я IэпщIэлъапщIэхэр. Къэбэрдей-Балъкъэрым исхэр дахагъэр зыхалъхьэ щымыIэу къогъуэгурыкIуэ, декоративно-прикладной гъуазджэмкIэ IэпщIэлъапщIэхэмкIэ республикэр зэрыкъулейми куэд щыгъуазэщ.
Псом хуэмыдэу уеплъыну гухэхъуэт дыщэидэмрэ хэдыкIымрэ хуэIэпщIэлъапщIэхэм хухаха плIанэпэхэм. ЗэрытщIэщи, адыгэхэр ижь-ижьыж лъандэрэ къогъуэгурыкIуэ лъэпкъ гъуазджэм и щэхухэм щыгъуазэу, хуэIэпщIэлъапщIэу. Дыщэидэр адыгэ лъэпкъым и щэнхабзэ хъугъуэфIыгъуэхэм зэращыщым и щапхъэщ, и мыхьэнэм хэмыщIауэ, нобэр къыздэсым цIыхухэр а IэщIагъэм зэрыдихьэхыр, ар зэрафIэщIэщыгъуэр. Гъуазджэ нэсыр зэрыуахътыншэм ар иджыри зэ щыхьэт техъуэ Iуэхугъуэщ. ЖыпIэнуракъэ, лъэпкъ хабзэмрэ щэнхабзэмрэ апхуэдизу хэпщIа хъуа дыщэидэр тхыдэм и къэхъугъэхэр къызэрыщ гъуджэшхуэщ. Мы лэжьыгъэхэм мыхьэнэшхуэ яIэщ лъэпкъым къыдекIуэкI IэщIагъэ дахэр - пасэрей дыщэидэр, хэдыкIыр - хъумэнымкIэ, щIэблэр абы дегъэхьэхынымкIэ.
IуэхущIапIэм и япэ, етIуанэ къатхэм щыплъагъут дыщэ, дыжьын IуданэхэмкIэ хэдыкIа, уагъэхэмрэ лъэпкъ дамыгъэхэмкIэ гъэдэха цIыхухъу, цIыхубз фэилъхьэгъуэхэр, бийм зэрыпэщIэт Iэщэхэр, сэхэр, къамэхэмрэ сампIэхэмрэ, бзылъхугъэхэм зэрызагъэдахэ цIугъэнэхэр, мывэ лъапIэхэмкIэ гъэщIэрэщIа дыщэ, дыжьын Iэлъын, тхьэгъу, пщэхъу, Iэпщэхъу, цIыхубзхэм е щIыпIэ дахэхэм я сурэтхэр зытет сумкэхэр, чысэхэр, къэлътмакъхэр, бохъшэхэр, щхьэнтэхэр, IэлъэщIхэр, саугъэт папщIэу зэрыхуэупсэ цIыкIуфэкIухэр, унэлъащIэхэр зэрагъэдахэ сурэтхэмрэ хьэпшыпхэмрэ, пщафIэ Iэзэхэм ягъэхьэзыра шхыныгъуэ лIэужьыгъуэхэр, гуащэхэр, ИлъэсыщIэ открыткэхэр, псейр зэрагъэдахэ хьэпшыпхэр, сурэтхэр щызытрагъэх плIанэпэхэр, нэгъуэщIхэри. Гъунэжт икIи удэзыхьэх защIэт пхъэм, гъуаплъэм, фарфорым, мывэм къыхэщIыкIа хьэкъущыкъухэр, унэлъащIэхэр, саугъэтхэр. ЗэрытщIэщи, IэкIэ ягъэхьэзыра хьэпшыпхэм сыт щыгъуи щIэупщIэ яIэщ, апхуэдэхэм я нэхъыбэм къытрагъэзэжу зэрамыщIым къыхэкIыу.
ЖьэкIэмыхъу Еленэ, Къущхьэ Иринэ, Волочковэ Наталье, Бачиевэ Iэсият, Къарей Элинэ, Шишман Залинэ, нэгъуэщIхэми я IэрыкIхэр фестивалым щагъэлъэгъуащ. IэпщIэлъапщIэхэм къызэрыджаIамкIэ, языныкъуэхэр зыпэрыт Iуэхум езыр-езыру зыхагъэгъуэзащ, адрейхэр илъэс бжыгъэкIэ абы хуеджащ. Нэхъыбэу я лэжьыгъэхэр выставкэхэм, Интернет сайтхэм щащэ. Дэрэжэгъуэ ин къозыт защIэт декоративно-прикладной гъуазджэм и IэпщIэлъапщIэхэм я IэдакъэщIэкI телъыджэу утыку кърахьахэр. Дахагъэрэ хуабагъэрэ къызыпкърыкI хьэпшыпхэм еплъ къудей мыхъуу, ягу ирихьахэр къащэхунуи Iэмал яIащ.
Фестивалым къызэрагъэпэщащ зи ныбжьыр илъэсих ирикъуа сабийхэм щыщIэдзауэ ныбжьыщIэхэм яхуэгъэза мастер-класс гъэщIэгъуэнхэр. Апхуэдэт имбир бранычхэр, пхъэм къыхэщIыкIа дамыгъэхэр, щыгъынхэр гъэщIэрэщIэным, хьэпIацIэ щыгъэ блэным, ятIэ гъэжьам хьэкъущыкъухэр къыхэщIыкIыным, шэху уэздыгъэхэр гъэхьэзырыным, саугъэтхэр щIыным, нэгъуэщIхэми траухуахэр. НыбжьыщIэхэм щIэщыгъуэ ящыхъуащ абы хыхьэу къызэрагъэпэща аквагримри (сабийхэм я Iэм, я нэкIум трагъауэ сурэт цIыкIухэр).
Мы гъэлъэгъуэныгъэм иджыри зэ нэрылъагъу щыхъуащ республикэм и декоративно-прикладной гъуазджэм хэлъхьэныгъэфI хуэзыщIыну, пасэрей IэщIагъэхэм зыщызыгъэгъуэзэну, абыхэм зезыгъэужьыну щIэблэ щIыналъэм зэриIэр. Зэхыхьэм хэтахэми абы зрезыгъэхьэлIахэми я нэгу зиужьауэ, я Iуэхум теухуауэ зэчэнджэщауэ гъэщIэгъуэн, щIэ куэд къащIауэ зэбгрыкIыжащ.
