Унагъуэм и илъэсыр зэхуащIыж, ауэ лэжьыгъэм пащэнущ

Дыгъэгъазэм и 24-м КъБР-м и Музыкэ театрым щызэхуащIыжащ Унагъуэм и илъэсыр. Пшыхьым къы­щыпсэлъащ республикэм и Iэтащхьэ КIуэкIуэ Казбек.

Абы къызэхуэсахэм ягу къигъэ­кIыжащ Унагъуэм и илъэсыр Урысей Федерацэм и Президент Путин Вла­ди­мир и унафэкIэ зэрагъэувауэ щы­тар икIи абы ипкъ иткIэ ирагъэкIуэкIа Iуэхухэм цIыхубэм я дежкIэ мыхьэнэшхуэ зэриIар.
«Унагъуэм илъыпхъэ хабзэхэм Урысейм лъабжьэшхуэ щаIэщ, лIэщIы­гъуэкIэрэ къыддэгъуэгурыкIуэу. Ди къэралым хуэдэу, унагъуэхэм зэ­рызыщIагъакъуэ апхуэдиз Iэмал нэгъуэщI зыщIыпIи щыIэкъым, - жиIащ КIуэкIуэм. - Сабийр дунейм къы­щы­техьам щегъэжьауэ илъэс 17 ар хъуху ахъшэкIэ унагъуэм зыщIыдогъакъуэ. Анэм и ахъшэмрэ унагъуэ ипотекэм-рэ 2030 гъэ пщIондэ ятыну пащащ. Къэрал дэIэпыкъуныгъэхэр нэхъыфIу зыхащIэн папщIэ, щIыналъэми уна­гъуэм щхьэхуэу зэрызыщIигъакъуэ Iэмалхэр диIэщ. Апхуэдэу 2024 гъэм щIышылэм и 1-м къыщыщIэдзауэ сом мин 500-м нэдгъэсащ бынуна­гъуэ­ш­хуэхэм я псэукIэр зэрырагъэ­фIэ­кIуэнум хухэтх ахъшэр (сом мин ­250-м и пIэкIэ). ФокIадэм щегъэжьауэ ­абыхэм сабий гъэсапIэхэм щIат пщIэр яхуэдгъэкIуэтэжын щIэддзащ, а Iэмалыр иджыри едгъэфIэкIуэнущ. Уна­гъуэм и илъэсыр иух щхьэкIэ, адэкIи пытщэнущ мы Iуэхухэм. Иджы­благъэ Къэрал Советым щагъэбелджылащ унагъуэхэм зэрызыщIагъэкъуэну щIы­кIэмрэ къалъхум и бжыгъэр нэхъыбэ хъуным хуэщхьэпэну Iэмалхэмрэ. Абыхэм ехьэлIа къалэнхэр къыщагъэлъэгъуэнущ къыхалъхьа лъэпкъ Iуэху ­20-м. Нобэ фIыщIэ яхуэсщIыну сы­хуейт илъэсым и кIуэцIкIэ унагъуэхэм ехьэлIауэ республикэм щекIуэкIа Iуэхугъуэ 800-м щIигъум зи гуащIэ хэ­зылъхьахэми. Фыкъыдогъэгугъэ ды­зы­техьэну 2025 гъэми мыпхуэдэ Iуэ­хухэм пытщэну».
«ФIыуэ зэрызэрылъа­гъумрэ зэры­зэ­хуэпыжымрэ я щIыхь­кIэ» медалыр Къэбэрдей-Балъкъэрым щыпсэу унагъуэ 70-м 2024 гъэм хуагъэфэщащ, «Илъэсым и унагъуэ - 2024 гъэ» урысейпсо зэхьэзэхуэм унагъуэ 15 ­пашэ щыхъуащ, «Анэм и щIыхь» медалыр цIыху 20-м иратащ.
Пшыхьым кърагъэблэгъат унагъуи 120-м щIигъу. Абыхэм яхэтт зы IэщIагъэр зэIэпызыхыу лажьэ унагъуэ 15. Языныкъуэхэм псоми зэхэту зы IэщIагъэр илъэс 600-м нэблэгъауэ яIэщ. Республикэм и медицинэм, егъэ­джэныгъэм, щэнхабзэм, спортым, социальнэ IэнатIэхэм зегъэужьыным хэлъхьэныгъэ зэрыхуащIым къыхэ­кIыу, ахэр щIыхь тхылъхэмрэ саугъэтхэмкIэ ягъэлъэпIащ. 
Зи гугъу тщIыхэм ящыщщ медицинэм щылажьэхэу Щоджэн Анатолэрэ Ерыстау Еленэрэ. Абыхэм я ­бынхэри адэ-анэм и гъуэгум ирокIуэ, псоми зэхэту узыншагъэр хъумэ- нымкIэ IэнатIэм ахэр зэрыпэрытрэ илъэси 137-рэ мэхъу. Лъэпкъ зэмы­лIэужьыгъуэхэм къыхэкIауэ унагъуэ зыухуа Къатинэ-Лебедев-Кокутенкэ-хэ медицинэм илъэс 580-рэ хухахащ. КъБР-м щIыхь зиIэ и сурэтыщI Аккизов Екъубрэ абы и щхьэгъусэ, рес­публикэм и цIыхубэ сурэтыщI Сиярэрэ япхъу Имарэ я гъусэу, гъуазджэм лIэщIыгъуэм щIигъуащ зэры­хуэ­лажьэрэ. ЯгъэлъэпIахэм ящыщщ УФ-м щIыхь зиIэ и артистхэу Мысос­тышхуэ Пщызэбийрэ ЩоджэнцIы­кIу Алий и цIэр зезыхьэ Къэбэрдей къэ­рал драмэ театрым и утыкум роль зэмы­лIэужьыгъуи 100-м щIигъу къи­зыхьа ЖьэкIэмыхъу КIунэрэ я уна­гъуэри. Адэ-анэм я лъагъуэм мы зэманым ирокIуэ Къэбэрдей театрым и актрисэ Мысостышхуэ Маринэрэ Горький ­Максим и цIэр зезыхьэ Урыс драмэ театрым и артист пажэ Мысостышхуэ Аслъэнрэ. 
Унагъуэхэм ехъуэхъуу, пшыхьыр ягъэдэхащ КъБР-м и цIыхубэ артист Текуев Амырбий, КъБР-м щIыхь зиIэ и артисткэ Тхьэщыгъуей Жаннэ, ­КъБР-м щIыхь зиIэ и лэжьакIуэ, «Амикс» театрым и къызэгъэпэща­кIуэ Къул Амиррэ абы и щхьэгъусэ, КъБР-м щIыхь зиIэ и артисткэ Ланэрэ, Бэчхэ Азэмэтрэ Ренатэрэ, Хъусинхэ Анзоррэ Замирэрэ, «Кабардинка», «Балкария», «Гордость Кавказа» къэфакIуэ гупхэм, «Ди щIэблэ» зэпеуэм щытекIуа Куэцэ Идар. 
Пшыхьыр къызэрагъэпэщат ­КъБР-м Лэжьыгъэмрэ социальнэ дэ­Iэпы­къуныгъэмкIэ, ЩэнхабзэмкIэ и министерствэхэм, КъБР-м и Пра­вительст­вэр я дэIэпыкъуэгъуу.

Сурэтыр Къарей Элинэ трихащ.