ЛIыхъужьхэм я бынхэм гулъытэ хуащI

ИлъэсыщIэр къэблэгъа нэужь, Урысейм и дэнэ щIыпIи щагъэув «ХъуэпсапIэхэм я псей» Iуэху дахэм хуэдэ щекIуэкIащ Къэ­хъун дэт курыт еджапIэ №2-м. 

Псейм «къыпах» илъэсы­щIэ саугъэтхэмкIэ Украинэм щекIуэкI дзэ Iуэху хэхам хэт щIалэхэм я бынхэр мы гъэм игъэгуфIащ Къэхъун къуажэ администрацэм и Iэтащхьэ Къан­дэхъу Леонид. Ар ныбжьыщIэхэм ехъуэхъуащ ИлъэсыщIэмкIэ икIи хэкум и щIыхьыр яхъумэу зэуапIэм щыIэ я адэхэм узыншэу къагъэзэжыну, а лIыхъужьхэм яхуэфащэу езы­хэ­ри къэхъуну, фIыуэ еджэну зэригуапэр къыхигъэщащ. 
ЕджапIэм и унафэщI Джатокъуэ Риммэ ­зэ­рыжиIамкIэ, дзэ Iуэху хэхам щыIэхэм я бын 13 щоджэ школым. Илъэсы­щIэм ирихьэлIэу Iэ­фIыкIэ­хэмрэ ахъшэ саугъэтхэмкIэ а цIы­кIухэм яхуэупсэну гупыж ищIащ къуажэ администрацэм и Iэтащхьэм икIи школым ар диIыгъащ.
Сабийхэр зыщыгуфIыкIа Iуэхур дахэу къызэрагъэпэщащ егъэджакIуэхэм. Уае Да­дэмрэ Уэс Гуащэмрэ цIыкIу­хэм я гукъы­дэжыр къаIэтащ. 
НыбжьыщIэхэр зэбгрыкIыжащ дэрэ­жэ­гъуэм­рэ гуры­фIы­гъуэмрэ я гур хигъэхъуа­уэ.