Дызэрыгушхуэхэр

КъБР-м и Парламентым, хабзэ дахэ зэрыхъуауэ, ИлъэсыщIэм ирихьэлIэу егъэ­­лъапIэ республикэм и лэжьакIуэ пажэхэр. Апхуэдэу хабзэубзыху IуэхущIапIэм и ЩIыхь тхылърэ КъБР-м и Парламентым и УнафэщIым и ФIыщIэ тхылърэ дыгъуасэ иратащ цIыху 70-м щIигъум.

КъБР-м и Парламентым и УнафэщI Егоровэ Татьянэ жиIащ 2024 гъэр тыншу щымытами, республикэм зэрыхузэфIэкIар экономикэм зэпIэзэрыту зригъэужьыну: цIыхухэм зэрадэIэпыкъуну пщэрылъ зыщащIахэр ягъэзэщIащ, промышленностым, ухуэныгъэм, мэкъумэш IэнатIэм ехъулIэныгъэхэр щаIэщ, зыгъэпсэхупIэхэр, гъуэгухэр зэIузэпэщ ящI.
- Къэбэрдей-Балъкъэрыр кIуэ пэтми зэ­Iу­зэпэщ мэхъу. Узыншагъэр хъумэнымкIэ, егъэ­джэныгъэмкIэ, спортымкIэ, щэнхабзэмкIэ IэнатIэхэр егъэфIэкIуэным хуэгъэ­зауэ илъэсым и кIуэцIкIэ лэжьыгъэшхуэ зэ­фIагъэкIащ. 2024 гъэр, зэрыфщIэщи, Унагъуэм теухуауэ щытати, сабий зыпIхэм защIэгъэкъуэным гулъытэ хэха иIащ. А псор къызэрыдэхъулIам, шэч хэмылъу, нобэ ди IуэхущIапIэм къедгъэблэгъахэм фи гуащIэ хэлъщ, - жиIащ Егоровэм. - Фэ фщыщ дэтхэнэми и IэщIагъэм фIыуэ зэрыхищIыкIыр, зэрыхуэпэжыр нэрылъагъущ. ФIыщIэ фхудощI республикэм и къэкIуэным гудзакъэ хувиIэу фызэрылажьэм папщIэ. 2025 гъэм дыщогугъ ди Iуэхухэр нэхъыфIыж хъуну. Шэч хэлъкъым дызэдэIэпыкъужу ди мурадхэр зэдгъэхъулIэным дытелажьэмэ, сыт хуэдэ гугъуехьи къызэрызэднэкIыфынум. Ехъу­лIэныгъэщIэхэр фиIэну, республикэм мамырыгъэр щытепщэу, ефIэкIуэну ди гуа­пэщ. 
Зэхыхьэм щагъэлъэпIащ хеящIэхэр, егъэджакIуэхэр, дохутырхэр, КъБР-м Лэжьыгъэмрэ социальнэ дэIэпыкъуныгъэмкIэ, Щэн­хабзэмкIэ, ФинансхэмкIэ и министерствэхэм, КъБКъУ-м, Къэбэрдей-Балъкъэр гуманитар-техникэ колледжым, бгылъэ щIыпIэхэм я экологиер джынымкIэ Тембот А. и цIэр зезыхьэ институтым, «Къэб­балъкъэнерго» IуэхущIапIэм я лэжьакIуэхэр, хьэрычэтыщIэхэр.