Киногъуазджэм и утыкушхуэм

Дыгъэгъазэм и 8-м Истамбыл щызэхэтащ илъэс къэс ирагъэкIуэкI «Пантин хьэндырабгъуэ дыщэ» саугъэтым иращIэкI пшыхьыр.

Щэнхабзэри политикэри щызэхэт ди гъащIэм гулъытэр щызыхьэхур гъэщIэгъуэнымрэ щхьэпэмрэщ. Апхуэдэхэм язу къыщIэкIащ Тыркум и президент Эрдоган Таийп Газиантеп къалэм щыIэу щIалэгъуалэм щепсэлъа махуэм жиIахэр. Тырку лIыщхьэм зэрымыщIэкIэ игу къэкIыжащ езымрэ УФ-м и Президент Путин Владимиррэ хуэдэу къэрал зехьэкIэм хэзыщIыкI цIыху нобэрей дунейм зэрытемытыр: «Ар щIыжысIэр си щхьэр къыхэзгъэщын папщIэкъым, ауэ сэ илъэс 22-рэ хъуауэ зызохьэ мы къулыкъур, апхуэдиз илъэскIэ и IэнатIэм пэрытщ Путин Владимири. Аращи, дэ тIум хуэдэу и лэжьыгъэм фIыуэ хэзыщIыкI тепщэ иджыпстукIэ щыIэкъым».

Апхуэдэу щIэщыгъуэу ежьа хъыбарым щэнхабзэм зыщиукъуэдиящ. А махуэ дыдэм Истамбыл щызэхашащ 1972 гъэ лъандэрэ ирагъэкIуэкI, щэнхабзэм нэхъ пщIэ щызиIэ саугъэтым ещIэкIа дауэдапщэр. Зэхьэзэхуэр зи жэрдэмри абы епха пшыхьыр зэзыгъэпэщри махуэ къэс Тыркум къыщыдэкI «Хуитыныгъэ» газетырщ. Мылъкур къызыбгъэдэкI «Пантин» IуэхущIапIэм и цIэр зэрыкIэрыпщIами артистхэм я зэхэтыкIэми уигу къегъэкI США-м и киногъуазджэм нэхъ лъапIэ дыдэу къыщалъытэ «Оскар» тыгъэм къыдекIуэкI Iэуэлъауэшхуэр. «Дыщэ хьэндырабгъуэми» гъущI лъапIэм къыхэгъэжыкIа фэеплъ щхьэхуэ дыщIыгъущ, хьэндырабгъуэ щIыкIэу щIауэ. Ауэ ар зыхуэгъэфэщапхъэр къыхэзыхыр къэпщытакIуэхэракъым, «Хурриет» газетым и щIэджыкIакIуэхэрщ. «Сериал нэхъыфI дыдэ», «Актёр нэхъыфI дыдэ», «Актрисэ нэхъыфI дыдэ», «Сценарист нэхъыфI дыдэ», «Режиссёр нэхъыфI дыдэ» хуэдэу, пщIы бжыгъэм щхьэдох мы зэхьэзэхуэм и унэтIыныгъэхэр. Мы гъэм дауэдапщэр зэрырагъэкIуэкI бжыгъэр 50 ирикъуащ.

Дэтхэнэ ехъулIэныгъэми и щIыбагъым лэжьыгъэшхуэ къыдэлъщ. Илъэс псом цIыхубэр тезыгъэуа джэгуакIуэхэр утыку къыщихьэкIэ, абыхэм я ролхэр къэгъэнауэ, я цIыху щIыкIэр, дуней тетыкIэр, IэщIагъэм зэрыхэт кууагъыр наIуэ къохъу. Псом япэ къыхэгъэщыпхъэщ дауэдапщэр къызэрызэIуаха «ЩIыхь саугъэтыр» зратахэм тырку цIыхубэм фIыуэ ялъагъу, адыгэ щылъху артисткэ Шорай Тюркан зэрахэтар. УедэIуэным и мызакъуэу, уеплъыну гъэщIэгъуэнт зи напIэ къыдэзымыхьейуэ утыкум ита, «Сценарист нэхъыфI дыдэ» тыгъэр зрата Шахин Неджати. Тырку цIыхубэр тIу изыщIыкIа дуней тетыкIэр нэхъ пасэу зи гугъу тщIа «Гулъ плъыжьхэм» хэзыгъэзэгъэфа сценаристым зыкъиумысащ а фильмым къыхэщ Зейнэб и хъыбарыр езым и анэм деж къызэрыщежьамкIэ. Еджэным хуэпабгъэ хъыджэбзым а Iэмалыр зыIэригъэхьэн папщIэ, гугъуехьышхуэм пхыкIын хуей мэхъу. «Еджэным щIэхъуэпсрэ пэт, апхуэдэ Iэмал зымыгъуэта, иджы дунейм ехыжа анэм срикъуэщ сэ, - жиIащ сценаристым, псалъэ ирата нэужь. – Насып сиIэти, си адэр цIыху щабэт, сызыхапIыкIа унагъуэми лей щызыхэсщIакъым. Ауэ а гуращэр зрамыгъэхъулIэфу нобэхэми хъыджэбз куэд дыдэ зэрыщыIэр сощIэ. Ди лэжьыгъэм и мыхьэнэуэ слъагъури а Тыркум и гулъ плъыжь цIыкIухэр зыщIэхъуэпс щIэныгъэрэ IэщIагъэрэ ягъуэтынырщ, абыхэм ди къэралыр яхъуэжыфыну сыщогугъ».

А фильм дыдэм роль нэхъыщхьэр щызыгъэзащIэ Языджиоглу Мерт хуагъэфэщащ «Актёр нэхъыфI дыдэ» саугъэтыр. ЦIыхубэм ягу зыкIэрыпщIа щIалэм и къэпсэлъэныгъэр фIыщIэкIэ гъэнщIат: зэи и закъуэу къэзымыгъанэ и Iыхьлыхэм, и лэжьэгъухэм, и ныбжьэгъухэм я гуапэ зэрищIын псалъэ щIэщыгъуэхэр къигъуэтыфащ артист щIалэм. «Актрисэ нэхъыфI дыдэу» тырку цIыхубэм къалъытар «Бахар» фильмым роль нэхъыщхьэр щызыгъэзэщIа Эвгар Деметщ. ИщхьэкIэ зи цIэ къитIуа Шахин Неджати пэджэжым ещхьу, Эвгари тепсэлъыхьащ цIыхубзхэр зэрыдакъузэм: «Сэ Эвгар Деметым и пIэкIэ Эвгар Мехмет гуэру сыщытамэ, мы саугъэтыр нэхъ тыншыжу къэсхьынкIи хъунут. Си ролым къыщызгъэлъэгъуэну сызыхуеяр цIыхубзым зыузэщIыпIэ зэригъуэтын хуейрщ. Дэнэ лъэныкъуэкIи уплъэмэ, нобэми цIыхухъухэр пэрытщ, псори нэхъ тыншу къаIэрохьэ. А щытыкIэр зыгуэркIэ схъуэжыфауэ къыщIэкIмэ, си къалэныр згъэзэщIауэ къысщыхъунущ».

Къудамэ куэду зэхэт «Дыщэ хьэндырабгъуэм» сабий актёрхэр нэгъунэ щагъэлъэпIащ, фIыкIэ зыщыгугъ щIалэгъуалэри къыхагъэщащ. Щэнхабзэр апхуэдэу щагъэлъапIэ щIыналъэу ущытыным нэмыщI, цIыхубэмрэ гъуазджэм хэт цIыхухэмрэ зэрызэлъэIэсым и щыхьэт хъуащ «Дыщэ хьэндырабгъуэм» и дауэдапщэр.