Шэшэн бэнакIуэр ягу къагъэкIыж

СССР-м спортымкIэ и мастер Вараев Адлан и фэеплъу бэнэкIэ хуитымкIэ урысейпсо зэхьэзэхуэ Грознэ къалэм щекIуэкIащ. Абы щызэпеуащ къэралым и щIыналъэхэм я бэнакIуэ 380-рэ, я ныбжькIэ илъэс 18-м щIимыгъуауэ.

Къэбэрдей-Балъкъэрым и спортсменхэм хъарзынэу зэхьэзэхуэм зыкъыщагъэлъэгъуащ икIи абы медаль зыбжанэ къыщахьащ. Килограмм 71-рэ зи хьэлъагъхэм я деж Джэдмышх Дамир япэ увыпIэр щиубыдащ. Джыджий Къантемыри дыщэ медаль къыщихьащ килограмм 92-рэ хъухэм я деж. Апхуэдэ ехъулIэныгъэ иIащ килограмм 48-рэ зи хьэлъагъ гупым яхэт Бакъей Темболэти.

Дыжьын медалхэр къахьащ Бакъей Жэмалрэ (кг 51-рэ) БытIэ Темырланрэ (кг 60). Щад Ибрэхьим къигъэзэжащ домбеякъ медалыр и Iэрылъхьэу. Ар щыбанэр килограмм 45-рэ зи хьэлъагъхэм я дежщ.