«Адыгэ псалъэ» газетым зи макъ къиIукI ныбжьыщIэхэм я бжыгъэм, ди гуапэ зэрыхъунщи, хэхъуэ зэпытщ. Къытхыхьэ щIалэгъуалэр жанщ икIи жыджэрщ, я зэфIэкIым зэрыхагъэхъуэным, я тхэкIэр зэрырагъэфIэкIуэным, утыку кърахьэ гупсысэр шэрыуэу зэрызэпагъэувэным иужь итщ, лэжьыгъэми гурэ псэкIэ етащ. Адыгэ гъащIэм къыщекIуэкI Iуэхугъуэхэр къызэщIэзыгъэхьэ, абыхэм набдзэгубдзаплъэу якIэлъыплърэ зэгъэкIуауэ лъэпкъым и пащхьэ къизылъхьэж щIалэгъуалэм ящыщщ «Адыгэ псалъэм» и щIэджыкIакIуэхэм гунэс ящыхъуа, зи хъэтI зиIэж, газетым и корреспондент Табыщ Мурат.
Ди лэжьэгъум и цIэр адыгэ дунейм къыщекIуэкI Iуэхугъуэхэм кIэлъыплъ дэтхэнэми зэрызэхихам шэч хэлъкъым. НыбжькIэ щIалэми, ар къыщащIэ ди щIыналъэм и мызакъуэу, адыгэхэр щыпсэу хэгъэгухэми. Зи гъащIэр лъэпкъ Iуэхум езыпха Табыщ Мурат газетым къэкIуэн ипэкIэ дунейр зригъэлъэгъуащ, жыпIэми щыуагъэ хъуну къыщIэкIынкъым. Аращ илъэгъуар зи гупсысэ шыбзэм щIэзыгъэкIыж щIалэм къедаIуэхэм яжриIэн щIигъуэтри, и тхыгъэхэм къеджэхэм я деж нихьэс гупсысэр хьэлэмэту зэIуезыгъащэри.
Табыщыр Зеикъуэ къуажэм 1980 гъэм щIышылэм и 8-м къыщалъхуащ. Абы дэт курыт еджапIэр хъарзынэу къиухри, Табыщыр щIэтIысхьащ КъБКъУ-м урысыбзэмрэ адыгэбзэмкIэ и къудамэм. Мурат еджэным фIы дыдэу хэзэгъащ, тхылъ плъыжькIи къиухащ. ЕджапIэр къызэриухыу Мурат Къэбэрдей-Балъкъэрым Гуманитар къэхутэныгъэхэмкIэ и институтым и аспирантурэм щIэтIысхьащ, а зэреджэм хуэдэурэ адыгэ IуэрыIуатэмкIэ и къудамэм лэжьэн щыщIидзащ. Филологие щIэныгъэхэмкIэ доктор ЦIыпIынэ Аслъэн и щIэныгъэ унафэм щIэту абы адыгэ хъуэхъужьхэм теухуа къэхутэныгъэ зыбжанэ иригъэкIуэкIащ, кандидат лэжьыгъэри игъэхьэзыращ.
Мурат хамэ къэрал щыпсэу адыгэхэм щIэныгъэ гуращэкIэ япэ дыдэу щахыхьар 2009 гъэращ. ЩIалэщIэр абы лъандэрэ япыщIащ хамэщI щыIэ ди лъэпкъэгъухэм. Илъэс куэд лъандэрэ абыхэм Мурат анэдэлъхубзэмкIэ курсхэр ядрегъэкIуэкI. Аращ хамэ къэрал щыпсэухэм адыгэбзэр зэрызэрагъэщIэну тхылъыр япэ дыдэу зэхэзыгъэувари.
ХьэтIохъущокъуэ Къазий и цIэр зезыхьэ Адыгэбзэ Хасэм и зэхэшакIуэщ Мурат, илъэсипщIым щIигъуауэ лажьэ а гупыр еунэтI. Адыгэбзэ Хасэм ирегъэкIуэкI анэдэлъхубзэм и пщIэр къэIэтыным хуэунэтIа зэпеуэхэр, зэхьэзэхуэхэр, щIэнIуатэхэр, Iэнэ хъурейхэр. Къыхэгъэщын хуейщ «Адыгэ дуней» лъэпкъ фондым и жэрдэмкIэ къыдэкI «Гъуазэ» журналым и редакцэ гупым Мурат гуащIафIэу зэрыхэтыр, абы егъэджакIуэхэм яхуэщхьэпэну тхыгъэхэр къыхэхынымкIэ лэжьыгъэшхуэ зэрызэфIихыр.
Бгъэдэлъ апхуэдэ зэфIэкIхэр къалъытэри, Табыщыр КъБР-м ЕгъэджэныгъэмкIэ, щIэныгъэмрэ щIалэгъуалэм я IуэхухэмкIэ и министерствэм 2014 гъэм ирагъэблэгъащ, лъэпкъ щIэныгъэхэмкIэ и къудамэм и пашэуи ягъэуващ, илъэси 5-м нэскIи а къулыкъур къызыхуэтыншэу ирихьэкIащ. Мурат лэжьыгъэшхуэ зэфIигъэкIащ, анэдэлъхубзэмкIэ егъэджакIуэхэр зэшэлIэным, абыхэм ябгъэдэлъ щIэныгъэр методикэ и лъэныкъуэкIэ нэхъри егъэфIэкIуэным хуэгъэпсауэ.
2019 гъэм къыщыщIэдзауэ Табыщыр «Адыгэ псалъэ» газетым и лэжьакIуэщ. ЖыпIэнурамэ, абдежми щIалэм щIэрыщIэу зыкъыщызэкъуихащ. Мурат и къалэмыпэм къыпыкI тхыгъэхэр хьэлэмэтщ, купщIафIэщ, абыхэм ящыщ куэдым я лъабжьэщ илъэс зыбжанэкIэ зэхуихьэса IуэрыIуатэр, щыкуэдщ бзэм хэкIуэдыкIыжу хуежьа псалъэхэр, адыгэбзэм и жыпхъэм иригъэува псалъэщIэхэр. Аращ ахэр газетым и щIэджыкIакIуэхэм гунэс щIащыхъури.
Журналист лэжьыгъэм хъарзынэу хэзэгъа Мурат цIыху хэтыкIэ дахи иIэщ. Ар гупцIанэщ, щабэщ, гумащIэщ, хэти щIэгъэкъуэн хуэхъуну хьэзырщ. Нэхъыщхьэращи, пэжагъ хэлъщ, утыку укъринэнукъым. Зи щытыкIэр зэпIэзэрыт Мурат лэжьэгъухэм яхэзэгъащ, фIыуэ къалъагъу. Зи IэнатIэр екIуу езыхьэкI щIалэм и унагъуэри дахэщ, хабзэрэ зэгурыIуэрэ илъщ, нэхъыжьыфIхэр къыщхьэщытщ.
