БлэкIамрэ нобэмрэ зэпызыщIэ пщащэ

Зэчий зыбгъэдэлъ цIыхум и лэжьыгъэр гъэщIэгъуэн куэду уи пащхьэ кърехьэф. Апхуэдэщ «Адыгэ псалъэ» газетым и сурэттех Къарей Элинэ. 

2025 гъэм и пэщIэдзэм абы къыдигъэкIащ щхъуэкIэплъыкIэ дахэу зэхэлъ, блыным фIадзэ махуэгъэпс. Абы и напэкIуэцI 12-м ихуащ Элинэ къэрал зэмылIэужьыгъуэхэм щытриха сурэтхэр. Газет лэжьыгъэм къыдэкIуэу, ди IуэхущIэгъур дэзыхьэхщ жьы хъуа бжэхэм, щхьэгъубжэхэм сурэт техыныр. 
«Хамэ къэралхэм зыплъыхьакIуэ сыщыкIуэхэм деж гу лъызотэ цIыхухэмрэ щIыпIэхэмрэ зыгуэркIэ зэрызэпыщIам. Къалэм и щыIэкIэ-псэукIэр хыболъагъуэ абы и архитектурэм. Псалъэм папщIэ, КъуэкIыпIэм щыIэ къэралхэм я теплъэр бжащхьэ хъурейхэм къагъэлъагъуэ, Европэм щыIэхэр нэхъ зэщIэкъуащ, Ипщэ щIыпIэхэм щыплъагъур лэч зэмыфэгъухэмкIэ ла бжэхэрщ. Абыхэм я зэхуэмыдэныгъэм къегъэлъагъуэ ар зыхэлъ унэхэм щыпсэу цIыхухэм я шыфэлIыфэр. НэгъуэщIу жыпIэмэ, бжэ къэс гъащIэ щхьэхуэм и щыхьэтщ. Я плъыфэкIи, щIыкIэкIи, теплъэкIи зэмыщхь бжэхэм цIыхур дэнэ щIыпIэ щымыпсэуми зэпащIэ, сэ сызэреп­лъымкIэ. Псори къыхузоджэ я архитектурэр яхъумэну, бжэхэм хуэсакъыну, сыт щхьэкIэ жыпIэмэ, абыхэм яхъумэ ди блэкIари, ди нобэри», - жеIэ Элинэ. 
Махуэгъэпсым ихуа сурэтхэр Къарейм щытрихащ Истамбыл, Бод­рум (Тырку), Лондон (Великобритание), Рим (Италие), Тбилиси (Куржы), Сыхъум (Абхъаз). 
Ди лэжьэгъу пщащэр сурэттех къудейкъым, атIэ сыт хуэдэ художникми хуэдэу, хьэпшыпхэм, щIыуэпсым, Iуэхугъуэ щхьэхуэхэм езым и еплъыкIэ яхуиIэщи, зэпеуэхэм, фестивалхэм ирагъэблагъэ, апхуэдэу ар мызэ-мытIэу щыIащ ди гъунэгъу хэгъэгухэм, хамэ къэралхэм къыщызэрагъэпэща зэхыхьэ инхэм. 
Абы и IэдакъэщIэкIхэр плъэгъуа нэужь, къыбгуроIуэ пасэрейм пщIэ хуэщIын, ар нобэ щыIэ дахагъэхэм дебгъэкIун зэрыхуейр сурэтхэмкIэ къызэрыджиIэр.

Cурэтыр Къарей Элинэ трихащ.