ЩIэблэфI къытщIэхъуэн хуэдэу

КъБР-м и Iэтащхьэ КIуэкIуэ Казбек хуэзащ республикэм егъэджэныгъэмрэ щIэныгъэмкIэ и министр Езауэ Анзоррэ щIалэгъуалэм я IуэхухэмкIэ министр Лу Азэмэтрэ. 

ЗэIущIахэр тепсэлъыхьащ сабийхэр хэку­псэу, тхыдэм и пэжыр къагурыIуэу къэгъэтэ­джын зэрыхуейм. УФ-м и Президент Путин Владимир 2025 гъэр Хэкум и хъумакIуэм и илъэсу щытыну зэригъэувамрэ ТекIуэныгъэр илъэс 80 зэрырикъумрэ япкъ иткIэ, КIуэкIуэ Казбек абыхэм епха лэжьыгъэхэр зи пщэ къыдэхуэ ­къулыкъущIапIэхэм план зэхалъхьэну къалэн ящищIащ.
Фигу къэдгъэкIыжынщи, илъэс кIуам «Антарес» центрым сабии 100 зыщIэхуэ корпуситI къыщызэIуахащ. «Коммунальник», «Комсомолец» зыгъэпсэхупIэхэм иджыри цIыху 350-рэ зыщIэхуэн Iыхьэ къыпащIыхьыну я мурадщ. 
ЗэIущIахэр тепсэлъыхьащ егъэджакIуэм и пщIэр къэIэтыжын, я улахуэм хэгъэхъуэн, IэщIагъэлIхэри нэхъыфIу гъэхьэзырын зэры­хуейм. 
ЕгъэджакIуэхэм я лэжьыгъэр щагъэпсынщIэн папщIэ, республикэм гъэ къэс Iуэху зэмы­лIэу­жьыгъуэхэр къыщаIэт. Илъэс къэс улахуэр проценти 10-кIэ хагъахъуэ, физикэр, химиер, информатикэр езыгъэджхэмрэ лэжьэн щIэзыдзагъащIэхэмрэ мазэ къэс я улахуэм къыхуды­щIагъу, зи гъэсэнхэр Урысейпсо олимпиадэхэм щытекIуахэм КъБР-м и Iэтащхьэм и мылъку ­саугъэт ират. Иужьрей илъэситIым «Илъэсым и егъэджакIуэ», «Илъэсым и гъэсакIуэ», «Илъэ­сым и егъэджакIуэ нэхъ Iэзэ», «АнэдэлъхубзэмкIэ егъэджакIуэ нэхъыфI дыдэ» зэхьэзэхуэхэм хэтахэмрэ абыхэм щытекIуахэмрэ еджапIэм и унафэщIу е и къуэдзэу ягъэуващ, КъБР-м Егъэ­джэ­ныгъэмрэ щIэныгъэмкIэ и министерствэм и Жылагъуэ советым хагъэхьащ. А лэжьыгъэм дызытехьа илъэсми пащэнущ.