ПщIэрэ щIыхьрэ зыхуэфащэхэм я фэеплъу

БлэкIар зыщыгъупщэм къэкIуэнур къызэрегуэуэжынур гъащIэм мызэ-мытIэу къигъэлъэгъуащ. ЩIэблэр зыщIапIыкI псэкупсэ хъугъуэфIыгъуэхэм ящыщщ тхыдэр: абы уеущий, уеунэтI, щыIэныгъэм ехьэлIа дерс купщIафIэхэр къыует. БлэкIам ухуеплъэкIыжыныр хэт дежкIи хьэкъщ, абы къыщыхъуа щыуагъэхэм къытрамыгъэзэжын, къэкIуэну лъэхъэнэхэм щхьэ бзыгъэкIэ ухэплъэфын щхьэкIэ. Арагъэнущ ди япэ итахэм тхыдэм мыхьэнэшхуэ ирату, абыхэм щIэх-щIэх къыхуагъэзэжурэ тепсэлъыхьыжу, хъыбарыжьхэмрэ тхыдэжьхэмрэ траIуэтыкIыу, щIэблэр абы щIагъэдэIуу къыщIекIуэкIар. НэхъапэкIэ къэхъуа Iуэхугъуэхэм я къэIуэтэкIэмрэ щIэблэм зэрыбгъэдалъхьэу щыта щIыкIэхэмрэ лъэхъэнэ-лъэхъэнэкIэрэ зэтекIми, зыхуэгъэпсар курыхыу зэщхьщ – щIалэгъуалэм гъуэгу захуэ тегъэувэнырщ, нэхъыжьым и фэеплъыр яхъумэкIэрэ, мамыр гъащIэм нэхъыфI зэрыщымыIэм ешIэлIэнырщ.

Апхуэдэ гуращэ лъагэт зыхуагъэувыжар Къэбэрдей-Балъкъэрыр нэмыцэ-фашист зэрыпхъуакIуэхэм къызэрыIэщIахыжрэ илъэс 82-рэ щрикъум ирихьэлIэу Курп Ипщэ (Ислъэмей) къуажэм щызэхэта пэкIум и къызэгъэпэщакIуэхэм. «ТекIуэныгъэм и гъуэгухэр» щIыналъэ псэкупсэ пэхуэщIэм ипкъ иткIэ зэхаша Iуэхугъуэ дахэм кърихьэлIащ КъБР-м и Iэтащхьэ КIуэкIуэ Казбек, хабзэхъумэ IэнатIэхэм я ветеранхэр, ДОСААФ-м и щIыналъэ къудамэм и лIыкIуэхэр, Тэрч щIыналъэм щIыпIэ унафэр щызехьэнымкIэ и IуэхущIапIэм и лэжьакIуэхэр, дзэ-псэкупсэ хасэхэм хэт щIалэгъуалэр, къуажэдэсхэр.
Урысей гвардием КъБР-м щиIэ къулыкъущIапIэм и ветеранхэм я советым и тхьэмадэ, полицэм и полковникыу лэжьыгъэм пэрыкIыжа Хужьокъуэ Руслан зэIущIэр къыщызэIуихым къыхигъэщащ щIалэгъуалэм я псэкупсэ зэхэщIыкIым зезыгъэIэт, Хэкумрэ лъэпкъымрэ я щIыхьыр хъумэным хуэгъэза сыт хуэдэ пэхуэщIэми мыхьэнэшхуэ зэраIэр. «Зэи тщыгъупщэ хъунукъым ди нэхъыжьхэм ТекIуэныгъэр зыIэрагъэхьэн щхьэкIэ щIата уасэм и инагъыр. А ТекIуэныгъэр ди адэжьхэм ялъкIэ, ди анэжьхэм я нэпскIэ тхьэщIа хъуащи, и лъапIэныгъэр зыхэтщIэу, и мыхьэнэр къыдгурыIуэу дунейм дытетыныр хэт и дежкIи хьэкъщ. Мамырыгъэм нэхъ лъапIэ щыIэкъым. А мамыр гъащIэм зи псэ щIэзыта ди зауэлIхэм пщIэрэ щIыхьрэ яхуэфащэщ, абыхэм я щапхъэм щIэблэр щIэтпIыкIыныр ди пщэрылъщ. Илъэс къэси хуэдэу, мы гъэми Курп лъагапIэхэм дыдокI нэхъыжьи нэхъыщIи дызэщIыгъуу. Абы къегъэлъагъуэ Iуэхур псоми зэхуэдэу къызэращтэр, абы хэлъ гъэсэныгъэ мыхьэнэр хэт дежкIи нахуэу зэрыщытыр. Ди нэхъыжьхэм Хэку зауэшхуэм ТекIуэныгъэр къызэрыщахьрэ илъэс 82-рэ дэкIыжами, зыри тщыгъупщакъым, дэтхэнэри ди гум илъщ. Фэеплъым и къарур къызэрымыкIуэу инщ – абы укъехъумэ икIи уеузэщI», – жиIащ Хужьокъуэ Руслан.
Абы иужькIэ пэкIум кърихьэлIахэм Инарыкъуей къуажэм дэт, Хэку зауэшхуэм хэкIуэдахэм я фэеплъыр здэщыт щIыпIэм къыщрагъажьэри, километрищ зи кIыхьагъ маршкIэ Курп лъагапIэхэм кIэрыхьащ. УкъызэщIэзыIэтэ Iуэхугъуэм кIуэрыкIуэм тету къуажэдэсхэри къыхыхьэурэ лъагапIэм дэкIащ. «ТекIуэныгъэм и гъуэгухэр» зи фIэщыгъэ пэхуэщIэм къигъэувырт абы дэкIхэм блэкIар я нэгу къыщIэзыгъэувэ Iуэхугъуэхэр къыхалъхьэн хуейуи, Урысей гвардием и оркестрыр фэеплъ сыныр здэщытым нэс Хэку зауэшхуэм и лъэхъэнэм зэхалъхьа макъамэхэм еуэурэ гъуэгур якIуащ. Уэру кIуэ цIыхухэм уащыхэплъэкIэ, гур хэхъуэрт, зэрызэрыIыгъым, зы Iуэхум зэрызэришалIэм, нэхъыжьхэм я хьэтырыр ину зэраIэтым уигъэгушхуэрт.
Мы Iуэхугъуэр хабзэ хъуауэ 1999 гъэ лъандэрэ къызэрагъэпэщ, абы къыхыхьэ цIыхухэм я бжыгъэри кIуэ пэтми нэхъыбэ мэхъу. Мы гъэм Курп лъагапIэхэм дэкIахэм хэта жылагъуэ зэгухьэныгъэхэри хэпщIыкIыу нэхъыбэ хъурт. Абы къегъэлъагъуэ цIыхубэ зэхэщIыкIым ТекIуэныгъэм щиубыд увыпIэр зэрыиныр.
Фэеплъыр здэщыт щIыпIэм нэса нэужь, щIалэгъуалэм Урсеймрэ Къэбэрдей-Балъкъэрымрэ я ныпхэр къызэкъуахащ, мывэскъарым бгъэдыхьэурэ зауэм хэкIуэда зауэлIхэм удз гъэгъахэр хутралъхьащ, дакъикъэкIи яхуэщыгъуащ.

 

ШУРДЫМ Динэ.
Поделиться: