Оренбург зыхуагъэхьэзыр

Самбэ

Черкесск къалэм щекIуэкIащ самбэмкIэ 9-нэ урысейпсо зэхьэзэхуэ зэIуха. Абы хэтащ къэралым и щIыналъэхэм ящыщу 22-м я бэнакIуэ ныбжьыщIэу 200-м нэблагъэ, я ныбжькIэ илъэс 16-м щIимыгъуауэ. Зэпеуэм щытекIуахэр хэтынущ Урысей Федерацэм пашэныгъэр къыщыхьыным хуэунэтIауэ мы гъэм гъатхэпэм и 17 - 20-хэм Оренбург къалэм щызэхашэну зэхьэзэхуэм. 

Ди гуапэ зэрыхъущи, Къэбэрдей-Балъкъэрым и командэм медалибгъу Черкесск къалэм къыщахьащ. Я хьэлъагъ елъытауэ зыхэта гупхэм япэ щыхъуащ Къудей Беслъэн (кг 53-рэ), Ажахъуэ Iэмин (кг 58-рэ), Бийболатов Даниял (кг 79-рэ) сымэ. 
Дыжьын медалыр къихьащ Щоджэн Ибрэхьим. ЩIалэр щыбанэр килограмм 71-рэ зи хьэлъагъхэм я дежщ.
Ещанэ увыпIэм къыхуагъэфэщащ Джэданэ Къантемыр (кг 46-рэ), Бэрэгъун Руслан (кг 71-рэ), Щоджэн Къантемыр (кг 79-рэ), Щауэ Ислъам (кг 88-рэ) сымэ. 
Иджы абыхэм Iэмал ягъуэтащ урысейпсо зэхьэзэхуэшхуэм хэтыну икIи къапэщылъщ екIуу абы зыкъыщагъэлъэгъуэн хуэдэу зыхуагъэхьэзырыну.