Гум имыхужынщ

«ИгъащIэкIэ ди гум къинащ а махуэхэр» Iуэхур иджы­благъэ щекIуэкIащ Прохладнэ щIыналъэм хыхьэ Алътуд къуажэм. Ар траухуащ Къэбэрдей-Балъкъэрым нэмыцэ зэрыпхъуакIуэхэр зэрырахужрэ илъэс 82-рэ зэрырикъум. 

1943 гъэм щIышылэм и 11-м нэхущым сыхьэтыр плIым ди зауэлIхэр пэрыуващ бийр Къэбэрдей-­Балъкъэрым ихужы­ным. Нэмыцэхэр ди щIыналъэм лей зэрахьэу итащ мазиплI нэблагъэкIэ: IуэхущIапIэхэр зэтракъутэу, мамыр цIыхухэр яукIыу. ­Фашистхэм яукIащ цIыху 4000-м щIигъу. 
ЩIышылэм и 5-м Прохладнэ къалэр хуит къащIыжащ. Мыгувэу бийр Къэбэрдей-Балъкъэрым ирахужащ. Республикэр хуит къащIыжу ди сэлэт куэд хэкIуэдащ зэ­хэуэхэм. ЛIыхъужьыгъэ зэрахьащ 37-нэ армэм. Куэдым хуагъэфэщащ «Кавказыр ­хуит къызэращIыжам папщIэ» медалыр. 1985 гъэм Налшык къыхуагъэфэщащ Хэку зауэшхуэм и япэ нагъыщэр зиIэ орденыр. 2010 гъэм Урысей Федерацэм и Президентым и унафэкIэ абы «Дзэ щIыхьым и ­къалэ» къыфIащащ. 
ЗэIущIэм хэта ныбжьыщIэхэр къызэхуэсахэм ядэгуэшащ ­ветеранхэм ятеухуауэ я нэхъыжьхэм къыжраIэжа хъыбархэмкIэ. Республикэм искъым зауэр къызыжьэхэмыуа унагъуэ. Дэтхэнэ хъыбарми щызэщIэтт гуауэри гуфIэгъуэри, къыхэ­щырт ди цIыхухэм я хахуагъэр. 
Мыпхуэдэ зэIущIэхэр щхьэпэщ ди щIэблэр хэкупсэу гъэ­сэнымкIэ, ди япэ итахэм я лIыгъэр ящымыгъупщэнымкIэ, щапхъэ ягъэлъагъуэу дунейм тетынымкIэ.