Япэ игъэщыпхъэ къалэнхэр ягъэнаIуэ

Урысей МВД-м и Прохладнэ къудамэм щекIуэкIащ къызэднэкIа 2024 гъэм я лэжьыгъэм кърикIуахэр къыщызэщIакъуэжа зэIущIэ. Абы хэтащ Къэрал кIуэцI IуэхухэмкIэ министру КъБР-м щыIэ, полицэм и генерал-майор Крючков Вячеслав. 
ЗэIущIэм щаубзыхуащ къудамэм къегъэщIылIа IэнатIэхэм я лэжьыгъэр зэраунэтIынур, хэплъащ нэхъыщхьэу я нэIэ зытетыпхъэхэм: мылъкум ехьэлIа щIэпхъаджагъэхэр къыщIэгъэщыныр, гъуэгу-транспорт къэхъукъащIэхэр гъэмэщIэныр, лэжьакIуэхэр къыхэхынымкIэ ирагъэкIуэкI Iуэхухэм. 
ЗэIущIэм къыщыпсэлъахэщ Урысей МВД-м и Прохладнэ къудамэм и унафэщIым и къуэдзэ, полицэм и подполковник АфIэунэ Заур, следственнэ къудамэм и унафэщIым и къуэдзэ, юстицэм и подполковник Шал Эльдар, полицэм и унафэщIым жылагъуэ хабзэр хъумэнымкIэ и къуэдзэ, полицэм и подполковник Мэзло Сослъэн, полицэм и унафэщIым оперативнэ лэжьыгъэмкIэ и къуэдзэ, полицэм и подполковник Ащхъуэт Анзор, ГИБДД къудамэм и унафэщI, полицэм и майор Пыхъ Заур сымэ.

Министр Крючков Вячеслав лэжьыгъэм и унэтIыныгъэ дэтхэнэми хуэгъэпса къалэнхэр яхуигъэлъэгъуащ. 
ЗэIущIэр Iуэху гуапэкIэ иухащ. Зи къалэныр хьэлэлу зыгъэзащIэ, ехъулIэныгъэхэр зыIэрызыгъэхьа лэжьакIуэ зыбжанэм щIыхь, фIыщIэ тхылъхэр иратащ.