Налшык, Совет Союзым и ЛIыхъужь Калюжный Николай и цIэр зезыхьэ ебланэ курыт еджапIэм къыщызэIуахащ абы щеджа щIалэхэу дзэ къулыкъум пэрыту зи псэ зытахэм я фэеплъ пхъэбгъухэр. Сирием щекIуэкIа зауэм къулыкъу щызыщIэу хэкIуэда Сокъур Эдуард, Украинэм щекIуэкI дзэ Iуэху хэхам зи псэр щызыта Щэрмэт Владислав, ЦIыпIынэ Анзор, Ирыгу Рустам, Унэгъэс Тембот сымэ я фэеплъыр яхъумэнущ еджапIэм и бжэр пщэдджыжь къэс къызэIузых егъэджакIуэхэмрэ еджакIуэхэмрэ.
Сокъур Эдуард курыт еджапIэр къиухащ 2004 гъэм. 2009 гъэм Налшык дзэ комиссариатым ириджащ Урысейм и къару узэдахэм яхэту къулыкъу ищIэну. Урысейм и МВД-м къулыкъу щищIэу Подмосковье, Пересвет къалэм, щыIащ. 2025 гъэм и гъатхэпэм щегъэжьауэ фокIадэ пщIондэ зэгурыIуэныгъэкIэ къулыкъу щищIащ УФ-м зыхъумэжыныгъэмкIэ и министерствэм Прохладнэ къалэм щыIэ и частым. 2015 гъэм фокIадэм и 29-м Сирием къулыкъу щищIэу, хэкIуэдащ. УФ-м и Президентым и УнафэкIэ, 2015 гъэм щэкIуэгъуэм и 23-м лIыхъужьым щымыIэжу къыхуагъэфэщащ «Хахуагъэм папщIэ» медалыр.
Ирыгу Рустам Урысейм и МВД-м и къэрал кIуэцIыдзэм хэту Пермь къулыкъу щищIащ. Владикавказ и дзэ комиссариатым игъэкIуащ дзэ Iуэху хэхам. 2022 гъэм жэпуэгъуэм и 12-м ягъэкIуащ 429-нэ полкым и дзэ частым и ракетнэ батареем и 4-нэ взводым и япэ расчётым и стрелок-зенитчикыу. Запорожскэ областым къулыкъу щищIэу, 2023 гъэм бадзэуэгъуэм и 27-м лIыхъужьу хэкIуэдащ. УФ-м и Президентым и УнафэкIэ щымыIэжу къыхуагъэфэщащ ЛIыхъужьыгъэм и орденыр.
Щэрмэт Владислав 2011 гъэм курыт еджапIэр, кIэлъыкIуэу Новомосковск Олимп резервхэр щагъэхьэзыр колледжым 2015 гъэм къиухащ. А гъэ дыдэ армэм ираджащ, 2018 гъэм ТекIуэныгъэ иным и щIыхькIэ Москва и Ут Плъыжьым щекIуэкIа парадым хэтащ. 2023 гъэм зэгурыIуэныгъэкIэ кIуащ Украинэм щекIуэкI дзэ Iуэху хэхам. ЕбгъэрыкIуэ отрядым тIасхъэщIэхыу хагъэхьащ. 2023 гъэм шыщхьэуIум и 23-м Щэрмэтым къулыкъум пэрыту и псэр итащ. Урысей Федерацэм и Президентым и УнафэкIэ щымыIэжу къыхуагъэфэщащ ЛIыхъужьыгъэм и орденыр.
Унэгъэс Тембот курыт еджапIэр 2011 гъэм къиухащ, Къэбрдей-Балъкъэрым и «Строитель» колледжым щеджащ. 2015 гъэм дзэ къулыкъум ираджэри, Дзержинский Ф. Э. и цIэр зезыхьэ дивизием хэтащ.
2023 гъэм СВО-м ефрейтору кIуащ.
Къулыкъум къимыкIуэту зэрыпэрытам, Запорожскэ областым щыIэу, СВО-м лIыгъэрэ хахуагъэрэ зэрыщигъэлъэгъуар къалъытэу къыхуагъэфэщащ «Хахуагъэм папщIэ» етIуанэ нагъыщэ зиIэ медалыр, Джэурджий щихъ орденым еплIанэ нагъыщэ зиIэ и жорыр, Запорожскэ областым и губернаторым и щIыхь тхылъ.
2024 гъэм бадзэуэгъуэм и 24-м Запорожскэ областым, Работинэ къуажэ цIыкIум, щыхэкIуэдащ. Хахуагъэм и орденыр щымыIэжу къыхуагъэфэщащ.
ЦIыпIынэ Анзор 2020 гъэм ебланэ курыт еджапIэр къиухри, Къэбэрдей-Балъкъэр гуманитар-техническэ колледжым щIэтIысхьащ.
2023 гъэм къулыкъум ираджащ Брянск областым и Клинцы къалэм. 2024 гъэм мэлыжьыхьым и 17-м Курскэ областым и къуажэ цIыкIу Олешня, Суджанскэ районым хыхьэм. Ар хуозэ урыс-украинэ гъунапкъэ зэпылъыпIэм. ШыщхьэуIум и 7-м абдеж щыхэкIуэдащ ефрейтор ЦIыпIынэр. УФ-м и Президентым и УнафэкIэ, щымыIэжу къыхуагъэфэщащ ЛIыхъужьыгъэм и орденыр.
