ЛэжьакIуэ емызэш

КъБР-м щIыхь зиIэ и журналист, Урысей артиадэм и лауреат, республикэм и министерствэхэм, жылагъуэ зэгухьэныгъэхэм я щIыхь тхылъхэр зыбжанэрэ зыхуагъэфэща МахуэлI Хъаджэт мы IэщIагъэм хуэфащэ дыдэу ирилажьэ цIыху гуащIафIэщ.

Къэбэрдей-Балъкъэрым и радиом и лэжьыгъэр нэхъыщхьэу зыхуэунэтIар бзищымкIэ республикэм исхэр хъыбарыщIэхэм хэгъэгъуэзэнырщ, щIыналъэм и экономикэм, политикэм, узыншагъэр хъумэным, егъэджэныгъэм, щIэныгъэм, гъуазджэм, щэнхабзэм, спортым, нэгъуэщI IэнатIэхэми зэфIэкI щызиIэ цIыхухэм я ехъулIэныгъэхэр, хъыбар гуапэхэр абыхэм я деж нэхьэсынырщ.

МахуэлI Хъаджэт Дзэлыкъуэ щIыналъэм хыхьэ Каменномост (Къармэхьэблэ) къуажэм щыщщ. Курыт еджапIэ №3-м и унафэщIым гъэсэныгъэ IуэхухэмкIэ и къуэдзэу, адыгэбзэмрэ урысыбзэмкIэ егъэджакIуэу абы щылэжьащ. ЩIыпIэ советым и хэхыгъуищкIэ депутату щытащ. 1989 гъэ лъандэрэ радиом и адыгэ редакцэм и редактору мэлажьэ.

Курыт еджапIэм щыщылэжьа зэманми Хъаджэт радиом пыщIэныгъэ хуиIэу къекIуэкIащ. Зэзэмызэ щIыхьэм прозэм щыщ пычыгъуэхэм, усэхэм кърагъаджэрт, депутатхэм я лэжьыгъэм, къуажэ гъащIэм, курыт еджапIэм щекIуэкIхэм тепсэлъыхьт. И щхьэгъубжащхьэм тет радио цIыкIур зэпымыууэ лажьэрт. Къуажэм щыпсэуми, и гур радиомкIэ щыIэу апхуэдэт.

Хъаджэт и анэр дунейм ехыжа нэужь, радиом щылэжьэну мурад ищIащ. Абы щыгъуэ радиомрэ телевиденэмрэ я унафэщIыр КхъуэIуфэ Хьэчимт. Радиом и адыгэ редакцэм и тхьэмадэу лэжьа Къэрмокъуэ Мухьэмэд сыт щыгъуи фIыщIэ хуещI, дзыхь къригъэзу лэжьапIэ къызэрищтам папщIэ. А зэманым радиом уувыну апхуэдизкIэ гугъути коммунист партым хыхьэн хуей хъуащ.

ЛэжьапIэ щыува япэ илъэсым щыщIэдзауэ жыджэру зыкъигъэлъэгъуащ. Абы щыгъуэ Дон Iус Ростов къалэм парт школ щыIэт, къулыкъущIэхэр щагъэхьэзыру. Абы еджакIуэ ягъэкIуэну хуабжьу и ужь къихьат. И нэпсхэм къызэпижыхьауэ щIэлъэIуауэ щытащ ямыгъэкIуэну, и нэ къызыхуикI радиом и лэжьыгъэм пэIэщIэ ямыщIыну.

ЯпэщIыкIэ корреспонденту щIидзащ, Хьэжыкъарэ Алик и нэIэм щIэту. Университетым фIыуэ зэрыщеджамрэ егъэджакIуэу зэрылэжьамрэ къыщхьэпэжащ. Куэд дэмыкIыу редактор хъуащ.

Радиом а зэманым щIэупщIэшхуэ иIэт, телевиденэр щIыпIэ куэдым къыщиубыдыртэкъыми. Къуажэм дэсхэм унагъуэ щIагъуэ яхэттэкъым радио емыдаIуэу.

- Си хъуэпсапIэщ дэнэ щIыпIи щыпсэу адыгэхэр дызэрыIыгъыну. Ди радиор тыншу Йорданми, Тыркуми, Адыгейми, Шэрджэсми нэсыну, езыхэм дедэIуэну дэри Iэмал дгъуэтыну. Журналистхэм ди къалэнхэр зэрытхузэфIэкIкIэ догъэзащIэ. Ди республикэм и цIыху цIэрыIуэхэм, щекIуэкI Iуэхухэм датопсэлъыхь, радиом и гъэтIылъыгъэм хэлъ концертхэр, спектаклхэр къыдот. А псоми щIэупщIэ зэраIэр ди дежкIэ гуапэщ, - жеIэ Хъаджэт.