И тхыгъэр нэхъыфIхэм ящыщщ

«Триикс Медиа» кинокомпанием илъэс 18-м щIигъуауэ Урысейм и хъыбарегъащIэ IэнатIэхэм я журналистхэр хэту къызэрегъэпэщ ди цIыхухэм я лIыхъужьыгъэм теухуа тхыгъэ нэхъыфIхэм я зэпеуэ. Абы и хабзэм ипкъ иткIэ, тхыгъэхэр хуэгъэпсауэ щытын хуейщ дзэ Iуэху хэхам хэтхэм, дохутырхэм, мафIэсгъэункIыфIхэм, волонтерхэм, хабзэхъумэ IэнатIэм, нэгъуэщI IэщIагъэхэм пэрыт лэжьакIуэхэм зэрахьа лIыгъэм. НэхъыфIу къыхахахэр и лъабжьэу фильмхэмрэ сериалхэмрэ трахынущ.

Зэпеуэм лэжьыгъи 120-м щIигъу ягъэхьащ. Абыхэм къыщыгъэлъэгъуэжат ди Хэкум и щIыналъэ куэдым щыпсэу цIыху къызэрыгуэкIхэм я хъыбар гъэщIэгъуэнхэр.

«Зэпеуэм къагъэхьа дэтхэнэ лэжьыгъэми гупсэхуу дыхэплъащ икIи зэпкърытхащ, къыхэдгъэщынуи дыхуейт ди журналистхэм Iэзагъышхуэ зэрабгъэдэлъыр. Абыхэм я тхыгъэхэм иджыри зэ наIуэ къытщащIащ и IуэхущIафэр е и махуэкъэс псэукIэр лIыгъэ зехьэным, хьэрэмыгъэншэу гъунэгъум дэIэпыкъуэгъу хуэхъуным хуэгъэпса, гулыцI зиIэ цIыхухэр куэду ди гъащIэм зэрыхэтыр. Ахэр хэт ди гъунэгъущ, хэти ди благъэщ, хэти ди ныбжьэгъущ, хэти ди цIыхугъэщ… Хамэ гуауэм зэрыпыкъуэкIыфым, хуей хъумэ, къапэув Iуэхур хахуагъэ къагъэлъагъуэу зэрызэфIахыфым абыхэм я пщIэр еIэт, ахэр зи лIыхъужь нэхъыщхьэ фильмхэри цIыхухэм я гум дохьэ. Абы и щыхьэтщ тетха фильмхэмрэ сериалхэмрэ урысейпсо, дунейпсо кинофестивалхэм я саугъэту 60-м щIигъу къызэрыхуагъэфэщар, я рейтингхэр зэрылъагэр», - жаIэ зэхьэзэхуэм и къызэгъэпэщакIуэхэм.

Зэпеуэм кърикIуахэр Урысей печатым и махуэм ирихьэлIэу наIуэ хъуащ. Ди гуапэ зэрыхъунщи, зи лэжьыгъэ къыхагъэща журналистихым яхэхуащ ди республикэм щыщ Джэдугуэш Оксанэ. «Советская молодежь» газетым и электроннэ къыдэкIыгъуэм ихуа, математикэмкIэ егъэджакIуэ Гъут Хуэмей теухуа «Учитель – призвание высокое и благородное», «Черекские вести» газетым къытрадза, Щоджэн Анзор и гъащIэр къыщигъэлъэгъуэжа «Вечно молодым останется в памяти» тхыгъэхэм урысей зэпеуэм гулъытэ щагъуэтащ.

«Пэжыр жысIэнщи, сэ икъукIэ сыщыгуфIыкIащ егъэджакIуэмрэ Хэкум и хъумакIуэ, зи гъащIэр гущIыхьэу къызэпыуда щIалэщIэмрэ ятеухуа си тхыгъэхэр «Триикс Медиа» кинокомпанием и проектыщIэхэм я лъабжьэ зэрыхъунум», - жиIащ Оксанэ.