ЩIыналъэхэм щыхъыбархэр

Иджырей курыт еджапIэ

Шэрэдж щIыналъэм хыхьэ Жэмтхьэлэ къуажэм и курыт еджапIэ №2-р къызыхуэтыншэу зэрагъэпэщыж. Мы гъэм зыхуей хуагъэзэну школхэм ящыщу мыр районым щыеплIанэщ. Къэщкъэтау, Зэрэгъыж, Бабугент жылэхэм я курыт еджапIэхэм илъэситI хъуауэ апхуэдэ лэжьыгъэхэр щрагъэкIуэкI. Аушыджэр къуажэм и курыт еджапIэр нэгъабэ зыхуей хуагъэзащ.

Жэмтхьэлэ дэт курыт еджапIэр 2002 гъэм яухуащ, тIысыпIэу 360-рэ иIэщ. Кърахьэжьа лэжьыгъэхэр мы гъэм шыщхьэуIум и 20-м ирихьэлIэу зэфIагъэкIын мурадхэр щыIэщ. Гъэ еджэгъуэщIэм и пэ къихуэу школым иджырей теплъэ игъуэтынущ икIи и пэш кIуэцIхэр, спорт залри хэту, къызыхуэтыншэу зыхуей хуагъэзэнущ.

Унащхьэм телъ къэнжалыжьхэр иджыпсту зэрахъуэкI, унэ блынхэр къагъэкъабзэ, иужькIэ бжэ-щхьэгъубжэхэр, пэшхэр къызэрагъэхуабэ системэр, псы къабзэр, къагъэсэбэпар зэрырикIуэ бжьамийхэр, ток кIапсэхэр, жьы зэпрыхупIэхэр зэрахъуэкIынущ. Пэш блынджабэхэр дращIеинущ мафIэм имыс чырбышхэмкIэ.

Псори зэхэту лэжьыгъэхэм текIуэдэнущ сом мелуан 79-рэ, уналъащIэхэмрэ обрудованэхэмрэ – сом мелуани 9-м нэблагъэ.

ЩIыналъэр ягъэдахэ

Иужьрей илъэсхэм Май щIыналъэм цIыхухэр куэду щызэхуэс и щIыпIэ зыбжанэ зэIузэпэщ ящIащ. Ар яхузэфIэкIащ УФ-м и Президентым къыхилъхьа «Къалэхэм ущыпсэуныр тынш щIын» къэрал пэхуэщIэм и фIыгъэкIэ.

Псалъэм къыдэкIуэу, 2022 гъэм Май къалэм сабийхэр щыджэгу и щIыпIэр къагъэщIэрэщIэжащ, Горькэм и цIэр зезыхьэ уэрамым жыг хадэ цIыкIу щащIащ. Абы ещхь жыг хадэ цIыкIу Александровскэ жылэми щагъэтIысащ.

Абыхэм нэмыщI, къалэдэсхэм я жэрдэмкIэ «Урысей» ЩэнхабзэмкIэ унэм и бжэIупэр мы гъэм зыхуей хуагъэзэнущ. И теплъэр ирагъэфIэкIуэнущ цIыхухэр куэду щызэхуэс мы щIыпIэм: къэкIыгъэ щхъуантIэхэр кърагъэтIысэкIынущ, лъэс лъагъуэхэм плиткэхэр иралъхьэнущ, тетIысхьэпIэхэмрэ кIэрыхубжьэрыхухэм папщIэ идзапIэхэмрэ щагъэувынущ, иджырей уэздыгъэхэмкIэ къызэщIагъэнэхуэнущ, интернетым пщIэншэу зэрызыпыбдзэ хъу Iэмалхэри хуащIынущ.

Апхуэдэ лэжьыгъэхэр мы гъэм щрагъэкIуэкIынущ Октябрьскэ къуажэми.