КъБР-м и щIыналъэхэм

Гъуэгур зыхуей хуагъазэ

«ГъащIэм хуэщIа инфраструктурэ» лъэпкъ пэхуэщIэм ипкъ иткIэ Дзэлыкъуэ щIыналъэм и Малкэ - Ингушли, километри 8 зи кIыхьагъ автомобиль гъуэгур зэрагъэпэщыжынущ мы гъэм.

Лэжьыгъэхэр щекIуэкIынур Малкэ къуажэм Ленинымрэ Хъуранымрэ я цIэхэр зезыхьэ уэрамхэрщ. Иужьрейм тетщ социальнэ мыхьэнэ зиIэ ухуэныгъэхэр: курыт еджапIищ, сабий сад, мэжджыт, фельдшер-акушер пункт, полицэмрэ къуажэ администрацэмрэ я хэщIапIэхэр, нэгъуэщIхэри.

Ухуэныгъэ-зэгъэпэщыжыныгъэ лэжьыгъэхэм хиубыдэу гъуэгужьым и щхьэфэр тратхъунщIыкIынурэ асфальтрэ бетонрэ зэхэлъу тIуащIэу  тралъхьэнущ, гъуэгубгъухэр мывэхэмкIэ кърагъэбыдэкIынущ, абы щызекIуэхэм я шынагъуэншагъэр къызэрагъэпэщу дамыгъэхэр трагъэувэнущ, зэхыхьэпIэ-зэхэкIыпIэхэр къыхагъэщхьэхукIынущ.

Фигу къэдгъэкIыжынщи, ипэкIэ лэжьа «ГъуэгуфI шынагъуэншэхэр» лъэпкъ пэхуэщIэм и фIыгъэкIэ Дзэлыкъуэ щIыналъэм и нэгъуэщI щIыпIэхэм я автомобиль гъуэгухэри зыхуей щыхуагъэзащ. Псалъэм къыдэкIуэу, 2019 гъэм Къармэхьэблэ къуажэм километри 4 зи кIыхь и уэрамыр зэрагъэпэщыжащ, 2020 гъэм – Сэрмакъ жылэм и автомобиль гъуэгум, километри 7,3-рэ зи кIыхьагъым, апхуэдэ лэжьыгъэхэри щрагъэкIуэкIащ.

УнагъуэщIэхэр ягъэгуфIэ

Бахъсэн щIыналъэ администрацэм и унафэщI Балъкъыз Артур унагъуэщIэу 8-м псэупIэ сертификатхэр иджыблагъэ яритащ икIи абыкIэ гуапэу ехъуэхъуащ.

«Ди щIыналъэм и унагъуэщIэхэм я псэупIэхэр егъэфIэкIуэным ехьэлIауэ иджыпсту Iуэхугъуэшхуэ зэфIыдогъэкI.  Нобэрей сертификатхэм фIы къыфхудэкIуэну, гъащIэм фыщехъулIэну, гуфIэгъуэрэ насыпрэ фи куэдыну си гуапэщ», - къыхигъэщащ Балъкъызым.

Иджырей Iуэхугъуэр Бахъсэн щIыналъэм щахузэфIэкIащ къэралым и унагъуэщIэхэр псэупIэхэмкIэ къызэгъэпэщыным хуэунэтIауэ лажьэ «Урысей Федерацэм и цIыхухэм псэупIэ тынш къахузэгъэпэщынымрэ коммунальнэ Iуэхутхьэбзэхэр яхуэщIэнымрэ» къэрал программэм ипкъ иткIэ. Ар ирагъэжьащ 2019 гъэм икIи а пIалъэм къриубыдэу  унагъуэ 40-м нэблагъэм я псэупIэхэр ирагъэфIэкIуэну Iэмалхэр ягъуэтащ.

ЩIыналъэр ягъэдахэ

«Къалэдэсхэм я псэукIэр егъэфIэкIуэн» къэрал программэм хыхьэ «ПсэупIэмрэ къалэхэм я теплъэмрэ» лъэпкъ пэхуэщIэм ипкъ иткIэ илъэс блэкIам Бахъсэн щIыналъэм и ХьэтIохъущыкъуей Ищхъэрэ, Куба, Къубэ-Тэбэ къуажэхэм я жыг хадэ цIыкIухэр зыхуей хуагъэзащ.

ЦIыхухэр куэду щызэхуэс а щIыпIэхэм я лъэс лъагъуэхэм плиткэщIэхэр иралъхьащ, иджырей узэдыгъэхэмкIэ къызэщIагъэнэхуащ, тетIысхьэпIэхэр, кIэрыхубжьэрыху идзапIэхэр щагъэуващ, къэкIыгъэхэр къыщрагъэтIысэкIащ. Сабий цIыкIухэм папщIэ джэгупIэ зэпэщхэр щхьэхуэу щаухуащ.

Апхуэдэ щIыкIэкIэ, къуажэдэсхэм Iэмал ягъуэтащ Iуэхугъуэ щхьэпэхэр, зэIущIэхэр абдежхэм щрагъэкIуэкIыну, зэхуэзэну, зыщагъэпсэхуну.

Иджы дызыхыхьа илъэсым Бахъсэн щIыналъэм и щIыпIитху аргуэру зыхуей хуагъэзэнущ. Ахэр Бахъсэнёнкэ, Къулъкъужын Ипщэ, Жанхъуэтекъуэ, Зеикъуэ, Къубэ-Тэбэ, ПсыкIэху къуажэхэм щыIэхэрщ. Абыхэм ящыщу ПсыкIэхумрэ Къулъкъужын Ищхъэрэмрэ нэхъ пасэу зыщIадза лэжьыгъэхэм щыпащэжынущ.

Къыхэдгъэщынщи, 2018 - 2023 гъэхэм къриубыдэу Бахъсэн щIыналъэм и жылэхэр зэIузэпэщ щIыным ехьэлIауэ лэжьа программэм ипкъ иткIэ фэтэр куэду зэхэт унэхэм я пщIантIэу 22-рэ, цIыхухэр щызэхуэс щIыпIэу 16: утыкушхуэу 6, паркыу 3, жыг хадэ цIыкIуу 5, лъэс лъагъуэу 2 зыхуей щыхуагъэзащ. Лэжьыгъэхэр щрагъэкIуэкIа щIыпIэхэм къуажэ 11 къызэщIиубыдащ.                                                  НАУРЫЗ Ислъам.