КъБР-м и щIыналъэхэм

Проценти 10-кIэ хагъахъуэ

Прохладнэ къалэм дэт «Кавказпромкабель» заводым илъэс блэкIам къыщIигъэкIащ кабель лIэужьыгъуэу псори зэхэту мини 5-м щIигъу, ар проценти 10-кIэ нэхъыбэщ 2023 гъэм яхузэфIэкIам нэхърэ.

         Къэралым электротехникэ промышленностымкIэ и IэнатIэхэм бжьыпэр ди заводым щиIыгъщ. Абы къыщыщIагъэкI кабель лIэужьыгъуэу 800-м щIигъур къыщагъэсэбэп щIыуэпс хъугъуэфIыгъуэхэр къыщIэзых IуэхущIапIэхэм, транспортым, энергетикэм, металлургием, машинэхэмрэ обрудованэхэмрэ къыщIэзыгъэкIхэм, ухуэныгъэ IэнатIэм, нэгъуэщIхэми. Кабелхэм яхуэIыгъ электрокъарум и лъэщагъыр кВ 1-м щыщIедзэри, кВ 10-м щIегъу. Заводым къыщIигъэкI продукцэхэр УФ-ми хамэ къэралхэми я мардэхэм къотIасэ.

         Фигу къэдгъэкIыжынщи, «Кавказпромкабель»-р къыщызэIуахэр 2022 гъэрщ. Абы ипэкIэ щыIар 1976-м щегъэжьауэ республикэм щылэжьа, щIыпIэ экономикэм хэлъхьэныгъэшхуэ хуэзыщIа «Кавказкабель»-рщ.

                            Шынагъуэншагъэр къызэрагъэпэщу

         Аруан щIыналъэм щыIэ Мэрзэхъурэ Шытхьэлэрэ зэпызыщIэ автомобиль гъуэгумрэ Налшыкрэ Нарткъалэ яку дэлъ гъуэгур Шытхьэлэ къыщыхыхьэ Iыхьэмрэ зэрагъэпэщыжынущ «ГъащIэм папщIэ инфраструктурэ» лъэпкъ пэхуэщIэм хыхьэу. Псоми зэхэту километри 7 я кIыхьагъщ абыхэм.

         Мэрзэхъурэ Шытхьэлэрэ яку дэлъ гъуэгур къыщожьэ Нарткъалэрэ Налшыкрэ зэпызыщIэ гъуэгум деж - Шытхьэлэ и Школьнэ уэрамым къыщыщIедзэри, Мэрзэхъу и Комсомольскэ уэрамым хохьэж, къуажитIыр зэпащIэу.

         Мыбдежым щрагъэкIуэкIыну лэжьыгъэхэм хыхьэу гъуэгу щхьэфэр тратхъунщIыкIынурэ асфальтыщIэ тралъхьэжынущ, мывэхэмкIэ кърагъэбыдэкIынущ, гъуэгум щызекIуэхэм я шынагъуэншагъэр къызэрагъэпэщу, дамыгъэхэр трагъэувэнущ.

         Шытхьэлэ дэлъэдапIэм деж метр 700-м нэблагъэ зи кIыхьагъ, жьы хъуа гъуэгури къагъэщIэрэщIэжынущ.

                                                                            НАУРЫЗ Ислъам.