Псэр и закъуэ къыщынэм деж

- Сэ, уэр нэмыщI, си гупсысэмрэ си дуней тетыкIэмрэ къызыгурыIуэ щымыIэу къысщыхъурти, арат сыт щыгъуи сыныщIогупсысыр, - щыжысIэм,

- Сэри куэдрэ къуажэмкIэ си гур щыIащ, сымаджэщым куэдыIуэрэ сыщIэлъащ, армыхъумэ, зэзэмызи сыкъэкIуэжащэрэт щыжысIи къэхъурт.

- Сыт, усымэджауэ ара?

- Хьэуэ, си мамэ и гъусэу сыщIэлъауэ аращ, - жиIащ, лей зэрыжиIам хущIегъуэжауэ. Сэри апхуэдэу гу лъыстэщакъым, езыми хуэсхьакъым, и анэр фIыуэ щилъагъукIэ, дауи, абы и сымаджагъэр диIыгъауэ къыщIэкIынщ, жысIэри.

Симазэ и дахагъэмрэ и Iущагъымрэ апхуэдизкIэ сыдахьэхащи, зы махуэ сымылъагъумэ, си гур къызэныкъуэкъу хъуащ, ар зыхуэсхьынур мыращ жысIэу сымыщIэу. Симази махуэ къэс еджапIэм зэгъусэу дыкIуэмэ, нэхъ къещтэ. Илъэсым къриубыдэу дэ тIум ди зэхущытыкIэм фIыуэ зихъуэжат. Зым адрейр тхъумэну, зыми и жагъуэ дымыщIмэ, нэхъ къатщтэу, дызэхуэсакъыжу декIуэкIырт.

Iэпкълъэпкъым зэрызиужьым къыдэкIуэу, ди гупсысэхэми заужьырт. Сэ иджы си ныбжьэгъуу слъытэ Симазэ щхьэкIэ сымыщIэн мы дунеишхуэм теттэкъым.

«КхъыIэ, Алий, мыбдежым къыщызэжьэ», - жиIэу къызэлъэIуамэ, сэ ар къэкIуэху жэщи махуи абдежым зызмыгъэхъейуэ сыщытыфынут. Езы Симази нэхъ гъунэгъу къызэрысхуэхъур сэри зыхэсщIэрт. Къуажэ уэрамым дыщызэхуэзамэ, гуфIэжу къызбгъэдыхьэрти и нэкIур, дэпым хуэдэу, плъыжь хъурт.

- Дауэ фыщыт?, - жиIэнт, сэлам къызихынти, адэкIэ ежьэжынт.

Дэ ди гупсысэри, ди гъащIэ еплъыкIэри еджапIэ дызэрыкIуэ гъуэгум щыжытIэрт. Арат тIури дыхуэпIащIэу а гъуэгуанэм тфIэфIу дыщIытеувэр. 

Еджэныр къэдухмэ, дэнэ дыщIэтIысхьэнуми, сэ зы илъэскIэ зыщIыпIи сымыкIуэу сызэрежьэнури, зы факультетым дызэрыщеджэнури, нэгъуэщI куэдми дэ тIур тепсэлъыхьрей дыхъуат. Сэ еджапIэ сыщIэмытIысхьэу сызэрыдэсынур Симазэ идэртэкъым, ауэ ар еджапIэм сшэуэ къызэрысшэжынур ижагъуэтэкъыми, абыи тедухуат.

Ди ныбжьыр нэхъ зэрыхэхъуарауэ къыщIэкIынт, гъуэгуанэ кIыхьым ди унагъуэхэм щызекIуэ хъыбар зэмылIэужьыгъуэхэм демышу дыщытепсэлъыхь куэдрэ къэхъурт. А хъыбархэр, сыт щыгъуи, хэкум нэхъ епхауэ щытт. Ди дади, ди нани зэпыч имыIэу Iуащхьэмахуэ тепсэлъыхьын яфIэфIт.  Сэри си нэ къыхуикIырт хэкум, зэ нэхъ мыхъуми слъагъуащэрэт жысIэу. Симази апхуэдизкIэ кIуэну хуейти, зы хъыбар гъэщIэгъуэн къызжиIэжащ:

- ПщIэрэ, Алий, дэ Къайсэри дыщыдэсым щыгъуэ хэкум къикIри, «Кабардинка» къэфакIуэ гупыр къэкIуауэ щытащ. Дэри абыхэм деплъыну дымыкIуэу къэдгъэнакъым. Ди адэм сеупщIащ:

 - Ди благъэ яхэмыту пIэрэ мыбыхэм? - жысIэри.

- Сыту пщIынут? - щIэупщIащ си адэр.

- Уарэ Iей, фэ езым фи хъуэпсапIэтэкъэ, сыт щыгъуи фытепсэлъыхьырти ди благъэхэр къэдгъуэтыжатэмэ зэрыфIым.

- Уэлэхьи, сабийр нэхъ IущкIэ дэр нэхъри, дэ ар дигу къэмыкIт, - жиIэщ си адэм, си Iэпэр иубыдри, къэфакIуэ гупым я зыхуэпапIэм яжетIэри дыщIыхьащ. Зы нэхъыжьыIуэ яхэтти, дыбгъэдыхьэри зыкъедгъэцIыхуащ.

- Ди унэкъуэщ е ди благъэ фхэмыту пIэрэ? Ддэ Борэхэ дащыщщ, - щыжытIэм,

- Iэу, фыкъеблагъэ, дауэ тхэмыту, мес мо щIалэщIэмрэ пщащэ цIыкIумрэ зэдэлъхузэшыпхъущ. Абыхэм деж фынакIуэт.

НыбжьыщIэхэм дабгъэдыхьэри, зэрыунагъуэу закъедгъэцIыхуащ. Езыхэми хуабжьу я гуапэ хъуащ. Ахэр Iэдэмрэ Iэсиятрэт. Хэт нэхъ насыпыфIэу къытхэт жыпIэу укъызэупщIмэ, сэрэ си шыпхъу нэхъыщIэ Элифрэт.

Гъэлъэгъуэныр яуха нэужь, Iэдэмрэ Iэсиятрэ къэдгъуэтыжри, ди хьэщIэну делъэIуащ, арщхьэкIэ ахэр я щхьэ хуиттэкъым, къыщыувыIа я хьэщIэщым пщэдей шэджагъуэм ирихьэлIэу дахуеблагъэу зы шеибжьэ дызэдефэну дызэгурыIуащ. ЕтIуанэ махуэр къытхуэмыгъэсу нэху дыкъекIащ. Си адэм зы сурэт закъуэ пасэрейуэ къигъуэтыжащ, куэд щIауэ лъэпкъ дамыгъэ зетхьэри къыздищтащ. ЩыжаIа пIалъэм дынэсу дыкIуащ, ахэр гупышхуэ зэрыгъэхъуауэ къыдэжьэрт. ХьэщIэщым дыщIыхьащ, абыхэм хухаха пэшым дыщIашэри дагъэтIысащ. Си адэм иIыгъ сурэтымрэ ди лъэпкъ дамыгъэмрэ къищтэри яригъэлъэгъуащ. ТIэкIурэ зэпаплъыхьа нэужь, Iэсият щIэкIри и шылэхъарыр къыщIихьащ, абыи апхуэдэ тхыпхъэ дыдэ хэтт. Сурэтым иджыри зыри жиIэртэкъым, Iэдэм къыдэлъэIуащ ар къыздищтэу я нэхъыжьхэм яригъэлъагъуну хуит тщIыну. Дэри абыкIэ арэзы дыхъуащ.  Iэсият си шыпхъу нэхъыщIэмрэ сэрэ ди Iэхэр иубыдри, езым и пэшым дишащ, икIи дыху къыттрикIащ, езым хэкум къыздрихауэ нэгъуэщI дыху гуакIуэ дыди къызитащ. Элиф Iупэлэ дахэ, крем лъапIэ, нэгъуэщI хьэпшып гуэрхэри щIыгъуу къритащ. Сигу ирихьа и плIэтепхъуэри къыстрипхъуащ. НэгъуэщI хьэпшып зэмылIэужьыгъуэ куэди къыщIигъужри, ди адэ-анэм я деж зыщыдгъэщIэгъуащ.

Тэнащ Хьэжымырзэ.