Акъылыр зыгъэжан

           Шахмат

      Бахъсэн къалэм и курыт еджапIэхэм шахматымкIэ я зэхьэзэхуэ екIуэкIащ. 2025 гъэр Хэкум и хъумакIуэм и илъэсу зэрагъэувамрэ ТекIуэныгъэ Иныр илъэс 80 зэрырикъумрэ траухуауэ щытащ ар.

         ЩIалэхэри хъыджэбзхэри зэхэту 246-рэ щызэпеуащ а зэхьэзэхуэм. Ахэр командэ 17 хъууэ щытащ икIи я ныбжь елъытауэ гупищу гуэшат. ЗэIущIэхэм къарикIуахэр зэхалъхьэжа нэужь наIуэ къызэрыхъуамкIэ, япэ увыпIэр иратащ Бахъсэн къалэм и курыт еджапIэ №1-м. Абы къызэринэкIащ курыт еджапIэхэу №№10-р, 4-р.

         «Си гуапэу къыхэзгъэщынут ди еджакIуэхэм я зэфIэкIым зэрыхагъахъуэ зэпытыр. Дауи, ди къалэм шахматым зыщегъэужьыным, цIыху нэхъыбэ абы къыхэшэным, дедгъэхьэхыным адэкIи пытщэнущ.
ЗэрыфщIэщи, абы акъылыр егъэжан, гупсысэ къыпхелъхьэ, хэкIыпIэхэр къызэрыбгъуэтын Iэмалхэм ухуегъасэ», – жиIащ Бахъсэн къалэ администрацэм и тхьэмадэ Мамхэгъ Хьэчим. 

ЕгъэджэныгъэмкIэ щIыпIэ департаментым и унафэщI Борэн Маринэ къызэрыхигъэщамкIэ, Мамхэгъ Хьэчим и нэIэ щIэту мыпхуэдэ Iуэхугъуэхэр къалэм куэдрэ щрагъэкIуэкI икIи абы и фIыгъэкIэ Iэмал яIэщ саугъэтхэмкIэ, тыгъэхэмкIэ сабийхэр ягъэгуфIэну.

                                                        ХЬЭЩОКЪУЭ Алыдж.