Гум ибгъэлъыпхъэхэр

 Мухьэмэд Бегъымбару щэлатымрэ сэламымрэ зэхам и псалъэхэм ящыщ: 
 «ДжэбрIэил си пащхьэм къиувэри, жиIащ: «Алыхьым и фIыгъуэм хрекIыж Рэмэдан мазэм хиубыдэу, зи гуэныхьхэр къызыхуэмыгъуар». 
*   *   *
 «Къемэт Махуэм НэщIымрэ КъурIэнымрэ Алыхьым и пщылIым къыщхьэщыжынущ. НэщIым жиIэнущ: «Уа ди Тхьэ, сэ ар махуэм ерыскъымрэ нэгузыужьымрэ щысхъумащи, кхъыIэ, гущIэгъу къыхуэщI». КъурIэным жиIэнущ: «Сэ ар жэщым згъэжеякъыми, кхъыIэ, гущIэгъу къыхуэщI». 
*   *   *
 «Си Iумэтым адрейхэм ялъымыса фIыгъуитхукIэ Алыхьыр къыхуэупсащ. НэщI зыIыгъым и жьэм къыжьэдих мэр Алыхьталэм дежкIэ мускусым нэхърэ нэхъ гуакIуэщ. НэщI зыIыгъым папщIэ мелыIычхэр лъэIуэнущ. Махуэ къэс Алыхьталэм Жэнэтыр егъэщIэращIэри жеIэ: «Куэд дэмыкIыу си пщылI махуэхэр уи деж къэкIуэнущи, зыгъэхьэзыр, абыхэм гугъуехьри гузэвэгъуэри ящхьэщысхынущ». ШейтIан IэубыдыпIэншэхэм а мазэм лъэхъу иралъхьэнурэ адрей зэманым яхузэфIэкIхэр къехъулIэнукъым. НэщI зыIыгъахэм я гуэныхьхэр нэщI мазэм и иужьрей жэщым къахуэгъунущ». 

 Iимам Рэббаний: «Сыту насыпыфIэ Рэмэдан мазэр къыхуэарэзыуэ езыгъэжьэжыр. Унэхъуащ Рэмэданыр къыхуэмыарэзыуэ езыгъэжьэжыр. Псапэ къыщIыIэрымыхьэн щхьэусыгъуэ зэрегъэпэщ апхуэдэ цIыхум, къыIэрыхьэну фIыгъуэми зыхегъэкIыж». 
 Фэдл и къуэ Мухьэллэ: «Ди япэ ита цIыхуфIхэр Рэмэдан мазэм нэсыным щхьэкIэ Алыхьым мазихкIэ елъэIуу щытащ. Адрей мазихым я Рэмэдан ехьэкIыкIэр IахынкIэ лъаIуэрт». 
 Нурий Уэсман: «Рэмэдан мазэр гум и гъатхэщ, адрей гъэм и зэманхэм еплъытмэ. КъурIэн лъапIэр къыщеха, Къэдр жэщыр зыхэт мы мазэм псэм хъугъуэфIыгъуэкIэ зигъэнщIыну Iэмал зэригъуэтым, гъэгъуныгъэм и куэбжэхэр зэрыIуахым къыхэкIыу. Мы мазэм Алыхьым уи гур етауэ пхуехьэкIмэ, зэрыилъэсу абы къыдэкIуа фIыгъуэр зыхэпщIэ зэпыту къэбгъэщIэнущ. НэщI мазэр иуха нэужь, гъуэгу захуэм укъызэрытенэн къару зыдэплъагъужмэ, ар Алыхьталэм уи Рэмэданыр зэрыпIихам и нэщэнэщ.