«Iуащхьэмахуэ» литературэ-художественнэ, жылагъуэ-политикэ журналым 2025 гъэм и япэ къыдэкIыгъуэр дунейм къытехьащ. Журналыр фIы дыдэ хъуауэ жиIэу къэпсэлъа, ди гур хэзыгъэхъуа щIэныгъэлIым хуэтщI фIыщIэ псалъэкIэ къыщIэддзэмэ, ди гуапэщ. Уи лэжьыгъэр къалъытэн нэхърэ нэхъыфI сыт щыIэ?!
Журналым и жьантIэр лъысащ еджагъэшхуэ Шагъыр Iэмин, ар къызэралъхурэ илъэс 95-рэ ирикъуащ. Абы теухуа «Ди бзэм и кууупIэр къэзытIэщIыфа» тхыгъэр и IэдакъэщIэкIщ филологие щIэныгъэхэмкIэ доктор БищIо Борис. Гъэхуауэ, гугъэзагъэу зэпкърыхащ Шагъырым и гъащIэмрэ и гуащIэмрэ.
УсакIуэ Къагъырмэс Борис къызэралъхурэ илъэс 90 щрикъум хуэдгъэхьэзыра тхыгъэхэщ журналым и къыкIэлъыкIуэ напэкIуэцIхэр зыхухэтхар. Филологие щIэныгъэхэмкIэ доктор Алъхъэс Светланэрэ («Лъэхъэнэм и макъ»), КъБР-м щIыхь зиIэ и журна-лист Мыз Ахьмэдрэ («Пэжыр и гъуазэу») я IэдакъэщIэкIщ ахэр. КъыкIэлъокIуэ Къагъырмэс Борис хужаIахэм щыщ пычыгъуэхэр, абы и къалэмыпэм къыщIэкIа усэ купщIафIэхэм къыхэтхахэр.
И гъуэгу кIыхь хъуну дехъуэхъуащ зи ныбжьыр иджыблагъэ илъэс 50 ирикъуа усакIуэ щIалэ ПщыукI Латмир. Филологие щIэныгъэхэмкIэ доктор Хьэвжокъуэ Людмилэщ абы нэгъэсауэ, и IэдакъэщIэкIхэм я купщIэр къитIэщIу тетхыхьар. Бзылъхугъэм и псалъэхэм щыхьэт техъуэми ярейуэ, а тхыгъэм къыкIэлъокIуэ Латмир и усэ-хэр.
Прозэ рубрикэр къызэIуех Фырэ-Къаныкъуэ Анфисэ и «Япэрейхэр. Гуащэм и пшыналъэ» романым. Абы къыкIэлъокIуэ культурологием и кандидат ЩауэцIыкIу Людмилэ и «Нанэ», Щоджэн Риммэ и «Насыпыр зыIэщIэбгъэкIмэ», «Темыуж уэлбанэ», Пщыбий СулътIан и «Дезертир» Iуэтэжхэр.
Усыгъэм и лъахэм дыхешэ Куэцэ Хьэсэн. Абы и гъащIэми и гуащIэми «Балъкъ аузым и зы усакIуэ» тхыгъэмкIэ и гугъу зыщIар Хьэвжокъуэ Людмилэщ.
Мы къыдэкIыгъуэм аргуэру зэ дыщрохьэлIэ Фырэ Анфисэ и цIэм. Иджы ар епсэлъащ, тетхыхьащ усакIуэ Бэлагъы Любэ. «Упсэуным лIыгъэ хэлъщ» - аращ а тхыгъэм журналистым фIищар. «Публицистикэ» рубрикэм щIэтщ хэхэс адыгэхэм ящыщ Мэрем Гуокъан теухуауэ Гугъуэт Заремэ игъэхьэзыра, тхыдэ щIэныгъэхэмкIэ доктор Уэз ФатIимэ и «Лъэпкъ жьэгур зымыгъэужьых» (зытеухуар Къэбэрдей-Балъкъэрым Гуманитар къэхутэныгъэхэмкIэ и институтым и тхылъ хъумапIэм и унафэщI Шэпар Iэишэтщ) тхыгъэхэр.
ДыщэкI Залымхъан къызэралъхурэ илъэси 115-рэ щрикъум ирихьэлIэу тхыгъэ зыгъэхьэзырар уэрэдус, КъБР-м щэнхабзэмкIэ щIыхь зиIэ и лэжьакIуэ ЗэрамыщIэ Заретэщ («ЦIыхубэм я уэрэдус»).
Усэным дихьэх Мэхъуэщ Маринэ и IэдакъэщIэкIхэр журналым еджэхэм щIэщыгъуэ зэращыхъунум шэч къытетхьэркъым. Ахэр адыгэбзэ дахэкIэ, гупсысэ куу щIэлъу, гъэпса хъуащ.
БищIо Борис зэхуихьэсыжа «Адыгэ псэлъафэхэр» тыдодзэ журналым и къыдэкIыгъуэ зыбжанэ хъуауэ. ЗэкIэщIэпч мыхъу псалъэхэм бзэм мыхьэнэшхуэ зэрыщагъэзащIэр, ар дахэ, къулей, щIэщыгъуэ зэращIыр, гупсысэм художественнэ къару хэзылъхьэ жыIэкIэу ар зэрыщытыр къэплъытэмэ, ди щIэджыкIакIуэхэр зыхуеинущ.
КъыкIэлъокIуэ журналыр зэхуэзыщIыж псалъэжьу зэхэлъ псалъэзэблэдзыр. Ар зэхилъхьащ журналым прозэ тхыгъэхэр зыгъэхьэзыр и къудамэм и редактор Мыкъуэжь Людмилэ.
ИСТЭПАН Залинэ,
«Iуащхьэмахуэ» журналым
жэуап зыхь и секретарь.
