Лъэпкъ проект, щIыналъэ программэ щхьэхуэхэм япкъ иткIэ, республикэм жыджэру щрагъэкIуэкI узыншагъэр хъумэнымкIэ IуэхущIапIэхэр сыт и лъэныкъуэкIи зыхуей хуэзэу зэрагъэпэщыжын Iуэхухэр.
Апхуэдэ лэжьыгъэхэр щызэфIэкIащ Щоджэным и цIэр зезыхьэ уэрамым тет сабий поликлиникэм. Ар ирагъэкIуэкIащ цIыхухэм япэ дэIэпыкъуныгъэ щыхуащIэ медицинэ IуэхущIапIэхэр къэгъэщIэрэщIэжын программэм ипкъ иткIэ.
Медицинэ IуэхущIапIэм и унэм и бжэ, щхьэгъубжэ блыпкъхэр яхъуэжащ, инженер-коммуникацэхэр зэрахъуэкIащ, унэ лъэгур къагъэщIэрэщIэжащ. КъищынэмыщIауэ, щылажьэхэми къекIуалIэхэми я тыншыпIэм хуэщIауэ зэхъуэкIыныгъэхэр щрагъэкIуэкIащ – псалъэм папщIэ, чэзум щежьэ плIанэпэ къыщызэрагъэпэщащ, ОРВИ узыфэр зыпкърытхэмрэ мыдрей сымаджэхэмрэ я щIыхьэпIэхэр зэхагъэщхьэхукIащ, диагностикэ, къыщеIэзэну, дохутырхэр щылажьэ пэшхэр нэхъ тыншу къызэрагъуэтыным хуэдэу зэкIэлъахьащ.
Поликлинэм и кIуэцIыр сыт и лъэныкъуэкIи зэпэщ хъуащ, пэшхэр хуитщ, нэхущ, иджырей Iэмэпсымэхэмрэ унэлъащIэхэмрэ щIагъэуващ.
IуэхущIапIэм медицинэ Iуэхутхьэбзэхэр щыхуащIэ сабий мини 10-м щIигъум, махуэ лэжьэгъуэм абы къокIуалIэ цIыхуи 150-рэ.
* * *
ФIагъышхуэ зиIэ медицинэ технологиехэмкIэ республикэ центрым и етIуанэ къудамэм (нэхъапэкIэ Кардиодиспансеру щытам) и реанимацэм зэгъэпэщыжыныгъэ лэжьыгъэшхуэхэр щрагъэкIуэкI. Мы зэманым блынхэм я щытыкIэхэр яхъуэж икIи европей жыпхъэхэм тету сымаджэхэр зыщIэлъ пэшхэр къагъэщIэрэщIэж. Реанимацэмрэ интенсивнэ терапиемкIэ къудамэмрэ зэхэту, абыхэм укъикIыу операцэ щащIыну пэшым псынщIэу узэрынэсыным хуэщIауэ къызэрагъэпэщыну я мурадщ. Апхуэдэ щIыкIэкIэ зи щхьэ куцIым лъыр тэмэму щыземыкIуэхэмрэ гу узыфэхэр зиIэхэмрэ пIэщIэгъуэкIэ зыхуэныкъуэ дэIэпыкъуныгъэр ягъуэтыфынущ. Зэгъэпэщыжыныгъэхэр медицинэ IуэхущIапIэм и мылъкукIэ ирагъэкIуэкI.
Апхуэдэу зыхуей хуагъазэ центрым и унэ щIыбри. Абы къыщагъэсэбэп иджырей технологие Iэмэпсымэхэр. Унэ блыныр дахэу, екIуу зэращIым и мызакъуэу, температурэ зызыхъуэжми, Iэуэлъауэ макъыр гъэужьыхынми хуэщIауэ щытынущ. УхуакIуэхэм корпусищым и унащхьэр зэрахъуэкIащ, къудамэ нэхъыщхьэм и щхьэгъубжэхэр яхъуэжащ. А лэжьыгъэр зэфIэхынымкIэ хьэрычэтыщIэхэм зыкъыщIагъэкъуащ.
«Гу-лъынтхуэ узыфэхэм пэщIэтын» щIыналъэ программэм и фIыгъэкIэ центрым и диагностикэ Iэмэпсымэхэми къахэхъуащ. ФIагъышхуэ зиIэ компьютер томографрэ иджырей ангиографрэ къащэхуащ. Абыхэм Iэмал къаритынущ гу-лъынтхуэ лэжьэкIэр нэхъ куууэ къапщытэну, узыфэр хэмытIасэу къахутэну.
