Муниципалитетхэм яхузэфIэкIынур мащIэкъым

КъБР-м и Правительствэм и Унэм дыгъуасэ ще­кIуэкIащ «Къэ­бэрдей-Балъкъэрым и муниципальнэ щIыналъэхэм я совет» ­зэгухьэныгъэм (АСМО) и зэIущIэ. Абы хэтащ КъБР-м и Iэтащхьэ КIуэкIуэ Казбек, Пар­ламентым и УнафэщI Его­ровэ Татьянэ, Пра­витель­ст­вэм и Уна­фэщI Мусуков Алий, КъБР-м и федеральнэ инспектор нэхъыщ­хьэ Васильченкэ Дмитрий, ­Жы­лагъуэ палатэм и тхьэмадэ Берд Хьэзрэталий, «Къэбэрдей-Балъ­къэ­рым и муниципальнэ зэгухьэ­ныгъэхэм я советым» и гъэ­зэ­щIакIуэ унафэщI Маслов Николай, республикэм и къалэ, район администрацэхэм я уна­фэщIхэр, министрхэр, Парламентым и ­лIы­кIуэхэр. 

КъБР-м и Iэтащхьэ КIуэкIуэ Казбек къалэхэмрэ районхэмрэ  я пщэ къыдэхуэ къалэнхэм теп­сэлъыхьащ, ди зэманым ахэр гъэ­зэщIа зэрыхъуну Iэмалхэм къы­теувыIащ, республикэм и зыу­жьыныгъэм теухуауэ муни­ци­палитетхэм я къалэныр зэ­рыи­ныр къыхигъэщащ Iэтащхьэм. 
- Нобэ псори догупсыс Ук­раинэм щекIуэкI дзэ Iуэху хэхам. Хэкур хъумэнымкIэ къалэн ­лъагэр ягъэ­защIэ ди зауэлIхэм. Хахуа­гъэ абы къыщагъэлъагъуэ ди республикэм икIа щIалэхэм. СВО-м щыIэхэм, абы и ветеранхэм, зауэлIхэм я унагъуэхэм ядэ­IэпыкъунымкIэ, я Iуэхум зыщыгъэгъуэзэнымкIэ муниципали­тетхэм мащIэкъым яхузэфIэ­кIыр, «Хэкум и хъумакIуэхэр»  фондым фызэрыпыщIами ды­щыгъуазэщ, - жиIащ КIуэкIуэ Казбек СВО-р щекIуэкI зэманым къалэхэмрэ районхэмрэ абы теу­хуауэ ялэжьыр къыхигъэщу. 
КъБР-м и муниципалитетхэм я зэгухьэныгъэм 2024 гъэм илэ­жьахэм, дызэрыт илъэсым зыху­нэсахэмрэ къызэригъэпэщыну игъэбелджылахэмрэ тепсэ­лъы­хьащ КъБР-м и АСМО-м и уна­фэщI Пэнагуэ Максим. Абы ­къыхигъэщащ республикэм и ­къалэхэмрэ районхэмрэ лэ­жьэ­ным, цIыхухэм я псэукIэр егъэ­фIэкIуэным теухуауэ тегъэщIапIэ пщIы хъун хабзэхэр Къэбэрдей-­Балъкъэрым зэрыщыIэр. Мы­хьэнэшхуэ зиIэу къилъытащ муниципалитетхэм я жэрдэмхэр республикэм и къэрал Iуэху­щIапIэхэм жыджэру зэрыдаIыгъыр. Щхьэхуэу я гугъу ищIащ муниципалитетхэр зыхэт урысейпсо зэпеуэхэм. 
«КъБР-м и къуажэхэм я зыу­жьыныгъэр» къэрал программэр гъэзэщIа зэрыхъум теухуауэ къэпсэлъащ КъБР-м мэкъумэш хозяйствэмкIэ и министр Сыжа­жэ Хьэсэн. Къуажэ администрацэхэм я унафэщIхэр тепсэ­лъы­хьащ ирагъэкIуэкI лэжьыгъэм. 
ЗэIущIэм къыщаIэтащ муни­ципалитетхэм я лэжьыгъэм, республикэм зиужьынымкIэ сэбэп хъу жэрдэмхэм теухуа нэгъуэщI Iуэхугъуэхэри.