Еханэ увыпIэм и лъабжьэкIэ къемыхын яхузэфIэкIыну?

Нобэ Ставрополь къалэм «Спартак-Налшыкым» щы­щIи­дзэнущ Урысей Федерацэм футболымкIэ и етIуанэ лигэм и «Б» дивизионым и Япэ гупым хэт командэхэм ирагъэкIуэкI зэ­хьэзэхуэм. Абы и пэ къихуэу ди гупым и тренер нэхъыщхьэ Битокъу Тимуррэ клубым и унафэщI Заруцкий Александррэ командэм и топджэгу па­жэхэу Хьэшыр Алан, КIэды-кIуей Хьэчим, ЛIуп Ислъам сымэ ягъу­сэу яIущIащ респуб­ликэм футболым щытетхыхь журналистхэмрэ футболеплъ­хэмрэ икIи абыхэм я упщIэхэм жэуапхэр иратыжащ. 

Сыхьэтым щIигъукIэ екIуэ­кIа зэIущIэм Iуэху куэдым щытепсэлъыхьащ - «Спартак-Налшыкым» хэтхэм я зыгъэ­сэныгъэхэр зэрекIуэкIам, мы гъэм къыпэщылъ къалэнхэм, командэм къыхыхьа щIалэхэм, чемпионатыр ныкъусаныгъэн­шэу ирихьэкIын папщIэ клубыр зыхуей-зыхуэфIхэмкIэ къызэ­ры­зэгъэпэща щIыкIэхэм, зы­хуэ­ныкъуэхэм, гугъэ-плъапIэхэм, нэгъуэщIхэми. Ахэр жэуапын­шэу зыри къагъэнакъым.
Псом япэу журналистхэр щIэупщIащ иджырей чемпионатым зыхуигъэхьэзыру командэм иригъэкIуэкIа лэжьыгъэхэм ар зэрехъулIамрэ гъэ джэгугъуэ­щIэм зэрыIущIэмрэ. Абы теу­хуауэ Битокъу Тимур жиIаращи, дапхуэдиз зэман ямыIэу щытми, дэтхэнэ зы тренерми ар сыт щыгъуи фIэмэщIэнущ, зыгуэрхэр игъэзэкIуэжын е щIэ гуэрхэр и лэжьыгъэм иджыри хилъхьэн папщIэ. Ауэ, дауэ хъуми, зэман иIащ ди командэм - мазищкIэ зигъэсащ. Ар пIалъэфI дыдэщ икIи къалэну зыхуагъэувыжар къанэ щымыIэу ягъэ­зэщIащ, чемпионатым хуэ­хьэ­зырщ, уеб­лэ­мэ хуэзэшащ.
Командэм щIэуэ къыхыхьа ­топджэгухэм псоми зэгуры­Iуэ­ныгъэхэр нобэкIэ иращIылIащ, ауэ гъэмахуэм адэкIэ абыхэм пащэн хуейщ. Клубым и уна­фэщIхэм я мурадщ, топджэгу­хэм якIэлъыплъу, 2026 гъэм ирихьэлIэу, «Спартак-Налшы­кым» зыхуигъэувыжа къалэнхэр гъэзэщIэнымкIэ сэбэп къыхуэхъуфынухэр зэхагъэкIыу, пIалъэ кIыхьым теухуа зэгурыIуэныгъэхэр абыхэм иращIылIэну. Мы гъэм командэм къыхыхьа псоми Битокъур епсэлъащ икIи езыр абыхэм яхуейуэ клубым къригъэблэгъащ.
Мыдрейуэ, Заруцкий Александр къызэрыхигъэщамкIэ, псори зэлъытауэ щытынур командэм иIэну бюджетырщ. Ауэ мылъ­куфI уиIэн папщIэ, чемпионатым укъыщыхэжаныкIын, турнир таблицэм увыпIэфIхэр щы­пIыгъын хуейщ. Армырауэ, зы-ри къопсэлъэнукъым. Гугъэхэр щы­Iэщ, нэгъаби хуэдэу, республикэм и Правительствэр ­къадэIэпыкъуну: илъэс блэкIам щIыхуэу ятелъар хуапшыныжащ. 
Мыгъэрей чемпионатым клу­бым и къалэн нэхъыщхьэу щы­тынур турнир таблицэм еханэ увыпIэм и лъабжьэкIэ къемы­хынырщ, нэгъуэщIу къыщIэкIмэ, илъэсыр къемыхъулIауэ къалъытэнущ. 
Журналистхэри футболеплъ­хэри нэгъабэ игъэпIейтеящ ди командэм и гъуэм топ куэд къызэрыдагъэкIам икIи абыхэм ящIэну хуейт абы и лъэны­къуэкIэ тренерым иригъэкIуэкIа лэжьыгъэхэр зыхуэдэр. 
А упщIэм и жэуапым къы­зэрыхэщамкIэ, Iуэхур нэгъабэ апхуэдэу щIыщытам щхьэусыгъуэ зыбжанэ иIэщ. Псалъэм папщIэ, ди гъуащхьэхъумэхэм я зэгурымыIуэныгъэм, ахэр зэры­зэмысам, командэм къыхыхьэ-хэкIыжхэр зэрыкуэдам, зэгъусэу чемпионатым зэрызыхуамыгъэхьэзырам къыхэкIащ а щытыкIэр. Иджы, мы гъэм пIалъэфIкIэ зэгъусэу зэрызагъэсам и фIыгъэкIэ топджэгухэр я щыуагъэхэм елэжьащ. Ауэ, Битокъу Тимур зэрыжиIамкIэ, командэм и гъуэм топ къыдемыгъэгъэкIыныр зи пщэрылъыр гъуащхьэхъумэхэм я закъуэкъым, атIэ ар псоми я зэхуэдэ къалэнщ. «Ди гъуэр зэрыдгъэбыдэным имызакъуэу, ди хьэрхуэрэгъухэм нэхъыбэ зэрахудэдгъэкIынми яужь дитын ­хуейщ», - къыхигъэщащ Би­токъум.
ЗэIущIэм щытепсэлъыхьащ командэр зыхуей-зыхуэфIхэмкIэ къызэрызэгъэпэщами. Псалъэм папщIэ, Заруцкий Александр зэрыжиIамкIэ, гупым зигъэхьэзырыхукIэ, клубым и автобусыр зэрагъэпэщыжащ, котельнэм и лэжьэкIэми кIэ­лъыплъащ, стадионым и унэм хэт, спортсменхэр зыщIэс пэшхэр зыхуей хуагъэзащ, ауэ клубыр зытегузэвыхь Iуэхухэр щыIэщ иджыри. ЖыпIэнурамэ, ди стадионым и щытыкIэм ­РФС-м и лэжьакIуэхэр арэзы ­къищIыркъым икIи фокIадэм и 1-м ирихьэлIэу губгъуэр къэзыгъэнэху уэздыгъэхэр къаблэу зэрамыгъэпэщыжмэ, абы зэIущIэхэр щрагъэкIуэкIыу къы­хуадэнукъым. Къищынэмы-щIа­уэ, трибунэхэм уисынри дзыхь­щIы­­гъуэджэ хъуащи, «Къуэ­­кIыпIэ» лъэныкъуэр зэ­хуащIын­кIэ хъунущ. Мыбдежми а щытыкIэхэр гъэзэкIуэжынымкIэ гугъапIэу яIэр щIыпIэ Правительствэмрэ КъБР-м СпортымкIэ и министерствэмрэщ. Ахэр Iуэхум щыгъуазэщ. Стадио­ныщIэ бухуэн папщIэ иджыпсту сом мелардитI ухуеинущ, нэхъ мащIэ дыдэу. Абы щыгъуэми, Налшык и стадионым нэхърэ  нэхъ мыхьэ­нэншэ Кавказ Ищхъэрэм и щIыналъэхэм нобэкIэ щыIэкъым. 
Заруцкий Александр зэIущIэм щыжиIащ командэм и гъэсэн ныбжьыщIэу 9-м, 2006 - 2009 гъэхэм къалъхуахэм, зэгуры­Iуэ­ныгъэхэр зэрыращIылIар икIи ахэр хуэм-хуэмурэ командэ нэхъыщхьэм къызэрыхашэнур, илъэс зыбжанэ дэкIмэ, «Спартак-Налшыкым» лъабжьэ хуэ­хъуфын хуэдэхэу. Апхуэдэуи ­лэ­жьыгъэхэр ирагъэкIуэкI нэ­гъуэщI щIыналъэхэм я клубхэм щыджэгу ди щIалэхэр къе­шэлIэжыным ехьэлIауэ, ауэ зэкIэ Iуэхур кIуатэркъым, езыхэм къыхуагъэлъагъуэ улахуэм хуэдиз дыдейхэм зэры­рамытыфынум и зэранкIэ. 
Мы гъэм командэм спонсор къигъуэтащ. Ар «BetBoom» букмекер конторэрщ. Ди республикэм ар къашэн папщIэ, зэман куэд трагъэкIуэдащ клубым и лэжьакIуэхэмрэ юристхэмрэ. Заруцкий Александр зэрыжи­IамкIэ, турнир таблицэм 13-нэ увыпIэм фIэкIа щумыIыгъыу зыгуэр къыдэпхьэхыну гугъущ. Ауэ ар яхузэфIэкIащ икIи абы и фIыгъэкIэ Iэмал яIэ хъуащ текIуэныгъэхэм щхьэкIэ футболистхэр ахъшэ саугъэтхэмкIэ ягъэпажэну, н.къ. ялэжьыну. «Спартак-Налшыкым» и мурадщ апхуэдэ спонсорыр зыIэщIимыгъэкIыну, илъэс куэдкIэ дэлэжьэну. Ауэ абы щхьэкIэ, псом япэу джэгукIэ дахэ къагъэлъэгъуэн ­хуейщ.
Аращ командэм къыдэщIу зэIущIэм къэкIуахэр нэхъыбэу щIэлъэIуари: я къарурэ зэ­фIэкI­рэ емыблэжу ди футболистхэр ягъэджэгуну, текIуэныгъэ дахэхэмкIэ ягъэгуфIэну. «Спартак-Налшыкым» и унафэщIхэми топджэгухэми командэм къыдэщIхэр къагъэгугъащ лъэкI къамыгъэнэну, уеблэмэ жаIащ апхуэдизкIэ футболым хуэзэшахэщи, иджыпстуи утыкум ихьэну зэрыхьэзырхэр. 
Гъуэгу махуэ, ди «Спартак-Налшыкым»! Апхуэдэу захудогъазэ ди щIалэхэм икIи дыхуейщ езыхэм я мурадхэр зрагъэхъулIэну, футболеплъхэр дазэрыщыгугъхэри ягъэпэжыну.