Насыпыншагъэм щахъумэ

Лъэпкъ, дин зэпэщIэувэныгъэхэм, диным хэмылъхэм, террорист, экстремист щIэпхъаджагъэхэм щIалэгъуалэр щыхъу­мэным, мамырыгъэм ахэр къыхуеджэным теухуа зэIущIэ Май къалэ администрацэм щекIуэкIащ. Абы кърагъэблэгъащ Май, Прохладнэ, Тэрч щIыналъэхэм, Прохладнэ къалэм я спорт еджапIэхэм я унафэщIхэмрэ тренерхэмрэ.

ЗэIущIэм къыщаIэта Iуэхухэм ятеухуауэ абы къыщыпсэлъащ ­КъБР-м и Правительствэм и УнафэщIым и къуэдзэ Къуэшырокъуэ Залым, КъБР-м и МВД-м экстремизмэм пэщIэтынымкIэ и центрым и оперуполномоченнэ Гуслистовэ Викторие, КъБР-м спортымкIэ и ­министрым и къуэдзэ Хэжь Заур сымэ. Абыхэм я гугъу ящIащ экстремист щIэпхъаджагъэхэр республикэм къыщымыгъэхъуным хуэгъэзауэ лэжьыпхъэхэм. 
Псом хуэмыдэу гулъытэ хэха яхуэщIыпхъэщ къытщIэхъуэ щIэблэм, лъэпкъ, дин зэпэщIэувэныгъэхэм, террорист щIэпхъаджагъэхэм къыхураджэу интернетым щатххэмрэ къыщагъэлъагъуэхэмрэ къэплъытэмэ. Иджыпсту дунейм къыщекIуэкI Iуэхугъуэ мыхъумы­щIэхэм щIалэгъуалэр ящыхъумэным утеплъэкъукI зэрымыхъунур, иужькIэ абы кърикIуэнур зэрышынагъуэр гурыIуэгъуэщ. 
Къуэшырокъуэ Залым Iуэхум теухуауэ къыхигъэщащ тренерхэр зыдэлажьэ ныбжьыщIэхэр насыпыншагъэм щыхъумэнымкIэ, цIыху нэсу, лъэпкъ хабзэр зэрахьэу ахэр къэгъэтэджынымкIэ абыхэм я пщэ къалэнышхуэ къызэрыдэхуэр. КъызыхэкIа лъэпкъым и тхыдэм, игъащIэ лъандэрэ къыдэгъуэгурыкIуэ и хабзэм щIапIыкIа,   пщIэ         хуащIу ягъэса щIэблэр абыхэм ебэкъуэнукъым, лей зэрахьэну-къым.
КъытщIэхъуэ щIэблэр хэкупсэу къэгъэтэджыным ехьэлIауэ зы Iуэху бгъэдыхьэкIэ хэха щIыналъэм щыIэн зэрыхуейр жиIащ Хэжь Заур. АбыкIи тренерхэр я гъэсэнхэм гъуазэ яхуэхъупхъэщ. Апхуэдэуи спортымкIэ министрым и къуэдзэм къыхигъэщащ щIалэгъуалэ политикэ тэмэм зэтеухуэным ехьэлIауэ къэралым лэжьыгъэшхуэ зэрыригъэкIуэкIыр. 
Гуслистовэ Викторие къызэхуэсахэм гу лъаригъэтащ, террорист, экстремист щIэпхъаджагъэхэр ялэжьамэ, цIыхур илъэс 14-м къы­щыщIэдзауэ жэуап ткIийм зэрырашалIэр, экстремизм къы­хуеджэныгъэхэр къезыхьэкIхэм административнэ къуэдыхэр зэ­рытралъхьэр, абы къыхэкIыу къыхигъэщащ ныбжьыщIэхэм щIэ­мычэу епсэлъэн, къэрал хабзэм ебакъуэ зэрымыхъунур къагурыгъэIуэн, ядэлэжьэн зэрыхуейр.

ХЬЭЩОКЪУЭ Адыдж.