Ерыскъымрэ псымрэ

4 апреля, 2025 - 07:01
Къэбэрдей-Балъкъэрым Мэкъумэш хозяйствэмкIэ и министерствэм къызэритамкIэ, 2025 гъэм и щIышылэм республикэм ерыскъыхэкIхэм елэжь и IуэхущIапIэхэм зэгъусэу къыщIагъэкIа продукцэхэм я куэдагъым хагъэхъуащ икIи промышленнэ индексыр проценти 122,7-рэ хъуащ.
Псом хуэмыдэу хэхъуащ IэфIыкIэхэкIым, пхъэщхьэмыщхьэрэ хадэхэкIыу банкIхэм иралъхьэу траIуэнтIам, лыхэкIым, шэуэ, шхууэ сату щIыпIэхэм ирагъэшэну ирагъэхъуам, кхъуейм, кхъуейлъалъэм, шатащхьэм, Iусыпхъэхэм.
Апхуэдэуи къапщытэж лъэхъэнэм къриубыдэу псыхэкIыу къыщIагъэкIам и куэдагъым хуэдитIым щIигъукIэ хагъэхъуащ абы ипэ ита илъэсым и апхуэдэ пIалъэм яхузэфIэкIам елъытауэ. ЖыпIэнурамэ, псыхэкIхэмкIэ промышленнэ индексыр процент 236-кIэ хъуащ. IуэхущIапIэхэр нэхъыбэу егугъуащ псыIэфIым, нарзаныпсым, сырэм, спиртым, фадэ лIэужьыгъуэхэм, щыжаIащ министерствэм и пресс-IуэхущIапIэм.
ХЬЭЩЫКЪУЕЙ Олег.
  • 60 просмотров
Поделиться: