ЩIыгъэпшэрхэр ират

Къэбэрдей-Балъкъэрым и мэкъумэшыщIэхэм губгъуэ лэжьыгъэхэр, зэрыжаIэу, махуэ къэс щIагъэхуабжьэ зэпытщ икIи, хабзэ зэрыхъуауэ, псом япэ ирагъэщу щIыгъэпшэрхэр бжьыхьэсэ къэкIыгъэхэм кIэщIалъхьэ. 
Республикэм и щIыналъэхэм я администрацэхэм мэкъумэш-промышленнэ комплексымкIэ я управленэхэм къызэратамкIэ, гектар мин 30-м щIигъум щIыгъэпшэрхэр халъхьакIэщ, псори зэхэту бжьыхьэсэр зыхащIам и процент 45-рэ мэхъу ар. IэщIагъэлIхэм къызэралъытэмкIэ, бжьыхьэсэ жылэхэр хъарзынэу щIым хиубыдащ икIи абыхэм я щытыкIэм арэзы укъащI.
Апхуэдэуи КъБР-м и Гидрометцентрым щыжаIащ мы гъэм и мазаем губгъуэм телъа уэсым и лъагагъыр сантиметри 9-15 зэрыхъуар, ауэ а махуэхэм дунейр зэрыщIыIам и зэран къэкIыгъэхэм екIакъым. Абыхэм я щытыкIэхэр зыхуэдэр къэзыпщыта IэщIагъэлIхэм къыхагъэщащ гъавэщIэм фIыуэ зэрызиужьыр, а зэманхэм ехьэлIауэ щыIэ мэкъумэш мардэм къитIасэу жылэхэр зэрызэкIэщIэкIыр.
Фигу къэдгъэкIыжынщи, мы гъэм къытрахыжыну гъавэм гектар мин 65,3-рэ нэгъабэ хухахащ, абы щыщу гектар мин 58,5-р хьэцэпэцэм, гектари 6,7-р рапсым.