«Захуагъэ здэщыIэ Урысей - Пэжым и телъхьэу» партым и къудамэу КъБР-м и Парламентым хэтым и Iэтащхьэ Кебеков Владимиррэ КъБР-м и Парламентым ПромышленностымкIэ, транспортымкIэ, связымрэ гъуэгу хозяйствэмкIэ и комитетым и унафэщI Къалмыкъ Маратрэ медицинэ Iэмэпсымэхэр иратыжащ узыфэ зэмылIэужьыгъуэхэр зыпкърытхэм щеIэзэ, щIыналъэхэм зэдай сымаджэщу Анзорей къуажэм дэтым. Ахэр къахуезыгъэшар «Захуагъэ здэщыIэ Урысей - Пэжым и телъхьэу» партым и унафэщI, а партым и фракцэу Урысей Федерацэм и Федеральнэ Зэхуэсым и Къэрал Думэм щыIэм и пашэ Миронов Сергейщ.
Кебеков Владимир къызэрыхигъэщамкIэ, я партым и унафэщIыр а сымаджэщым тIэунейрэ щыIащ икIи ар хьэзыр хъууэ ятын, лажьэу яутIыпщын папщIэ зэфIигъэкIар мащIэкъым.
- Миронов Сергей Къэбэрдей-Балъкъэрым нэгъабэ щыщыIам япэу здэкIуар а сымаджэщырщ. Абы зыщиплъыхьащ, я лэжьэкIэм зыщигъэгъуэзащ икIи илъэгъуа псомкIи арэзы хъуащ. КъыщыщIэкIыжым ар щIэупщIат, сыт хуэдэ медицинэ Iэмэпсымэ къыхуащэхумэ нэхъ къащтэми. Дохутыр нэхъыщхьэм абы хуигъэхьат нэхъ зыхуэныкъуэхэр зэрыт тхылъыр. Тхьэмахуэ зэ- хуаку блэкIам ахэр къытхурагъэшащ икIи дэ дыкъэкIуауэ аращ партым и унафэщIым къыбгъэдэкIхэр еттыжыну. Миронов Сергей сыт щыгъуи къыщIоупщIэ а сымаджэщым и Iуэху зытетхэм. Шэч хэлъкъым и нэIэ абы адэкIи зэрытетынум, - къыхигъэщащ Кебеков Владимир.
Къыхуащэхуахэм яхэтщ сымаджэщыр псом япэу зыхуэныкъуэ хъухэр: плазмэ гъэщтар къызэрагъэвыжыр, хирургхэм къагъэсэбэп Iэмэпсымэхэр, нэ кугъуэм и лъыдэуейр зыхуэдизыр къызэрапщыр, лъыр къызэрапщытэхэр, тхьэкIумэм и лажьэр къызэращIэ отоскопыр, тхьэкIумэм, тэмакъым, пэм зэреплъ рефлекторыр.
Сымаджэщым и унафэщI ХьэщIэлI ФатIимэ лэжьакIуэхэм къабгъэдэкIыу депутатхэм фIыщIэ къахуищIащ икIи жиIащ къаIэрыхьа Iэмэпсымэхэм я лэжьыгъэр егъэфIэкIуэнымкIэ мыхьэнэшхуэ зэраIэр. Абыхэм цIыхухэм хуащIэ медицинэ Iуэхутхьэбзэхэр зэрырагъэфIэкIуэнур, псом хуэмыдэу, тхьэкIумэм, тэмакъым, пэм теухуауэ гуныкъуэгъуэ зиIэхэм я дежкIэ зэрыщхьэпэнур къыхигъэщащ.
- Ди сымаджэщым IэщIагъэлI Iэзэ дыдэ щолажьэ, ауэ операцэ мыинхэр хуэщIыртэкъым, абы папщIэ зыхуеину Iэмэпсымэхэр зэримыIэм къыхэкIыу. КъимыдэкIэ, яхуэмыгъэхъуж узыфэхэр зыпкърытхэр зыщIэлъ къудамэм и лэжьыгъэри къащигъэпсынщIэнущ къытхурагъэшахэм. Плазмэ гъэщтар къызэрагъэвыж Iэмэпсымэм игъэмэщIэнущ лъы зыхакIэн хуейхэм ар яхуэгъэхьэзырыным текIуадэ зэманыр.
Лэскэн муниципальнэ щIыналъэм и щIыпIэ администрацэм и унафэщI Инжыжокъуэ Сэфарбий жиIащ мы сымаджэщым цIыху мин 28-рэ къызэрегъэбыдылIар икIи апхуэдэ тыгъэр районым узыншагъэр хъумэнымкIэ и IэнатIэм и лэжьыгъэр егъэфIэкIуэнымкIэ, дэтхэнэ зы цIыхуми и узыншагъэм кIэлъыплъынымкIэ щIэгъэкъуэнышхуэу зэрыщытыр.
ЗэIущIэм и кIэухымм Кебеков Владимир дохутырхэм фIыщIэ яхуищIащ я лэжьыгъэ гугъум жэуаплыныгъэ яхэлъу зэрыбгъэдэтым папщIэ икIи ехъулIэныгъэщIэхэр яIэну ехъуэхъуащ.
