Зэпеуэ къызэрагъэпэщ

Къэбэрдей-Балъкъэрым щыIэ МВД-м иригъэкIуэкIынущ «Полицейский дядя Стёпа» ­сабий творчествэмкIэ урысейпсо зэпеуэм и щIыналъэ Iыхьэр.

Хабзэ хъуа Iуэхур КъБР-м щыIэ МВД-м дэлажьэ Жылагъуэ советым и лIыкIуэхэр ящIыгъуу ирагъэкIуэкI.
2025 гъэр Хэкум и хъумакIуэм и илъэсу зэрагъэувар къалъытэу, я ныбжькIэ гупищу гуэшауэ: илъэси 6 - 8, илъэси 9 - 11, илъэс 12 - 14 хъухэм  папщIэ ирагъэкIуэкIыну зэпеуэм хэтынухэм я IэдакъэщIэкIхэм къыщагъэлъэгъуэн хуейщ хэкур фIыуэ лъагъуныр, псэкупсэ лъапIэныгъэхэр, апхуэдэуи Урысей Федерацэм къэрал кIуэцI IуэхухэмкIэ и органхэм я лэжьакIуэхэм я лIыгъэмрэ хахуагъэмрэ.
Iыхьэ щхьэхуэщ ТекIуэныгъэр илъэс 80 зэрырикъум хуэгъэпсар.  
НыбжьыщIэхэм я лэжьыгъэхэр къыхащIыкI ­хъунущ щэкIым, пхъэм, пластилиным, тхылъымпIэ щхъуэкIэплъыкIэхэм, нэгъуэщIхэми. 
ЩIыналъэ Iыхьэм лэжьыгъэ нэхъыфIу щы къыщыхахынущ.
Зэпеуэм хэтыну гупыж зыщIхэм езыхэм ятеухуа тхыгъэ кIэщIыр (и унэцIэр, и цIэр, и адэцIэр, сабийм и ныбжьыр, зэкIуалIэ сабий садым е школым теухуар, и телефоныр) ирагъэхь хъунущ щыпсэу щIыпIэм щыIэ Урысей МВД-м и щIыналъэ IэнатIэм.
Район Iыхьэм щытекIуахэм я IэдакъэщIэкIхэр 2025 гъэм накъыгъэм и 10 пщIондэ къыщыIахынущ КъБР-м щыIэ МВД-м и ОИОС-м. Сыт хуэдэ упщIэмкIи фыпсалъэ хъунущ 49-54-63 телефонымкIэ.