ЩIалэгъуалэм IэмалыфIхэр къахузэIуех

КъБР-м и Парламентым и ЩIалэгъуалэ палатэм и ебгъуа­нэ зэхуэсым хэтхэм я япэ зэIущIэр дыгъуасэ зэхэтащ. Ар иригъэкIуэкIащ республикэм и хабзэубзыху IуэхущIапIэм Егъэ­джэныгъэмкIэ, щIэныгъэмкIэ, физическэ щэнхабзэмкIэ, спортымрэ щIалэгъуалэм я IуэхухэмкIэ и комитетым и унафэщI Емуз Нинэ.

ЗэIущIэм хэтащ КъБР-м и Парламентым и УнафэщI Егоровэ Татьянэ. Лъэпкъ зэхущыты­кIэхэмкIэ комитетым и уна­фэщI­хэм ящыщ, ЛэжьыгъэмкIэ, соци­альнэ политикэмкIэ, узыншагъэр хъумэнымрэ ветеранхэм я Iуэху­хэмкIэ комитетым и уна­фэщIым и къуэдзэ Безгодькэ Владимир, ЕгъэджэныгъэмкIэ, щIэныгъэмкIэ, физическэ щэнхабзэмкIэ, спор­тымрэ щIалэ­гъуалэм я Iуэху­хэмкIэ и комитетым и унафэщIым и къуэдзэ Ахъмэт Амир, а комитетым хэт, «Пашэхэм я зэщIэхъееныгъэ» зэгухьэныгъэм и щIыналъэ къудамэм и унафэщI Шыпш Аслъэн сымэ.
Егоровэ Татьянэ зэIущIэр къыщызэIуихым,  къыхигъэщащ нэхъ купщIафIэ дыдэу лажьэ щIалэ­гъуалэ зэгухьэныгъэхэм КъБР-м и Парламентым ейр зэращыщыр.
- ЗэрыфщIэщи, ди хабзэубзыху IуэхущIапIэм епха ЩIалэгъуалэ палатэм и зэхэтыкIэми ар зытещIыхьа пIалъэми зэхъуэкIыныгъэхэр игъуэтащ. Дызэрыгуш­хуэнщ, иджы япэу абы щIыпIэ унафэр зезыхьэ IэнатIэхэм я депутат ныбжьыщIэхэр къызэрыхы­хьар. Дыщогугъ абыхэм я зэ­фIэкI­хэр мыбдежи зыщыщ къалэхэмрэ районхэмри жыджэру къыщагъэсэбэпыну, - жиIащ Егоровэм. - КъБР-м и Парламентым нобэ IэмалыфIхэр къыфхузэIуех зэрызывужьынум теухуауэ. Къы­хэзгъэщыну сыхуейт палатэр щIалэгъуалэ куэдым «лъэмыж» зэрахуэхъуари абы хэтахэм IэнатIэфIхэр зэрыхуагъэфэщари. Хаб­зэубзыху Iуэхур, дауи, тыншкъым. Лъэныкъуэ куэдкIи уи щIэныгъэм хэбгъэхъуэн, щIыналъэр зытет хабзэхэр зэрызэхалъ­хьэм, абыхэм я лъабжьэм хэп­щIыкIын хуейщ. Ауэ дэ къалэн фщытщIыркъым хабзэм и проект нобэ вгъэхьэзырыну. Дэ ды­хуейщ фи Iуэху еплъыкIэр, фи жэрдэмхэр зыхуэдэмрэ гугъуехь щыIэхэм я хэкIыпIэу флъагъу­хэмрэ зэдгъэщIэну. Абыхэм быдэу фегупсысауэ къыхэфлъ­хьэ. «СтIол хъурейхэм», зэIущIэхэм фэ езыр-езыру щывгъэбеджылынущ жэрдэмхэр. Ап­хуэдэуи жылагъуэ, волонтёр Iуэхухэми фи зэфIэкI фыщеп­лъыж хъунущ. Шэч хэмылъу, дэ а псомкIэ дэIэпыкъуэгъу сыт щыгъуи дыфхуэхъуну дыхьэзырщ. ЖысIэнуращи, лэжьыгъэ гъэщIэгъуэн къыфпэщылъщ. Мыхьэ­нэшхуэ иIэу къызолъытэ республикэм адрей и щIалэгъуалэ зэгухьэныгъэхэми купщIафIэу фадэлэжьэным. Фи къэухьым зэрыхэвгъэхъуэным зэпымыууэ иужь фит. КъБР-м и Парламентым и ЩIалэгъуалэ палатэм ухэ­тыныр ехъулIэныгъэщ, абы щыгъуэми жэуаплыныгъэ зыпылъщ. Лэжьыгъэ евгъэкIуэкIым дэгъуэгурыкIуэн хуейщ цIыху хэтыкIэ дахэри хабзэри. Сынывохъуэхъу лэжьыгъэм зэрыщIэвдзэмкIэ.
Егоровэ Татьянэ дыщIигъуащ щIалэгъуалэм Iэмал зэраIэр     КъБР-м и Парламентым и зэIущIэхэм щIэсыну, абыхэм къыщащтэ унафэхэм едэIуэну. 
ЗэIущIэм псори зэдэарэзыуэ КъБР-м и Парламентым епха ЩIалэгъуалэ палатэм и унафэ­щIу щыхахащ Мурачаев Исхьэкъ. Егоровэм жиIащ ар КъБКъУ-м щIалэгъуалэр жылагъуэ гъащIэм жыджэру хэшэнымкIэ, лъэпкъ, дин зэхущытыкIэхэр егъэфIэ­кIуэнымкIэ, экстремизм, терроризм гупсысэхэм пэIэщIэ щIы­нымкIэ зэщIэзыгъэуIуэ и центрым и унафэщIу зэрыщытыр, ЩIалэгъуалэм я IуэхухэмкIэ федеральнэ IуэхущIапIэм и зэхьэ­зэхуэу 5-м ахъшэ саугъэтхэр къы­зэрыщихьар. Абыхэм ящыщщ «Lime» зыфIища, узыншагъэр щрагъэфакIуэ, спорт щIыналъэ зэхуэсыр (2019 гъэ). Къищы­нэ­мыщIауэ, 2020 гъэм къыщыщIэ­дзауэ илъэсиплIкIэ республикэм щигъэзэщIащ «Про­Спорт» Iуэхур (щIалэгъуалэр спор­тым дегъэ­хьэхынымрэ узыншагъэр егъэ­фIэкIуэнымрэ тещIыхьауэ). Мурачаевым КИФЩI-м и волонтёрхэм я зэхуэсри къызэригъэпэ­щауэ щытащ.
КъБР-м и Парламентым и ЩIалэгъуалэ палатэм и унафэщIым и къуэдзэу цIыхуищ хахащ: Щыхьмырзэ Муртаз, Хуторская Елизаветэ, Джэдгъэф Дианэ. Абыхэм кърагъэза дзыхьым папщIэ фIыщIэ ящIащ. 
ЩIалэгъуалэм щехъуэхъум, Егоровэ Татьянэ жиIащ зы гупышхуэу, зэгурыIуэрэ зэдэIуэжу ахэр зэдэлэжьэн зэрыхуейр зыщамыгъэгъупщэну. 
Безгодькэ Владимир къыщы­псалъэм къыхигъэщащ щIалэ­гъуа­лэм зэращыгугъыр жэрдэмыщIэхэр, я Iуэху еплъы­кIэ­щIэхэр къагъэлъэгъуэну.
Шыпш Аслъэн игу къигъэкIыжащ ЩIалэгъуалэ палатэм и япэ зэхуэсхэм хэту, хабзэубзыху Iуэ­хум зэрызыщагъэгъуэзауэ щы­тар. «Иджыпсту щIалэгъуалэм зэрызиужьыну Iэмал куэд щы­Iэщ. Ауэ ди къалэныр сыт жы­фIэмэ, дызэкъуэувэнырщ. КъБР-м ЩIалэгъуалэм я Iуэху­хэмкIэ и министерствэр, ЩIалэгъуалэ палатэр, «Пашэхэм я зэщIэхъееныгъэр», нэгъуэщI щIа­лэгъуалэ зэгухьэныгъэхэри зэгъусэу дылажьэмэщ IуэхуфI­хэр къыщыдэхъулIэнур», - къыхигъэщащ Шыпшым.
Ахъмэт Амир жаIам дыщIи­гъуащ щIэблэхэр (нэхъыжьымрэ нэхъыщIэмрэ) зэрызэпыщIам республикэм и хабзэубзыху IуэхущIапIэр зэрищапхъэр. «Iуэхум фызэрыбгъэдыхьэм елъытащ щIыналъэм сэбэп фыхуэхъунрэ фыхуэмыхъунрэ. Фызэчэнджэщ, фызэдэлажьэ. Зыщывмыгъэ­гъупщэ: спортыр ехъулIэныгъэ гуэрхэр зэрызыIэрыбгъэхьэ Iэмал къудейкъым, абы уегъасэ, узыншагъэм укIэлъегъэплъ», - жиIащ Амир. 
БАГЪЭТЫР Луизэ.