ТекIуэныгъэм – Ура!

Хэку зауэшхуэм ТекIуэныгъэ Иныр къызэрыщахьрэ илъэс 80 зэрырикъум ирихьэлIэу ди къэралми хамэ щIыналъэ куэдми къыщыхалъхьэ пэхуэщIэхэм языхэзщ «ТекIуэныгъэм – Ура!» фIэщыгъэр зыгъуэта жэрдэмри. Ар хуэунэтIащ ди япэ ита нэхъыжьхэм зэрахьа лIыхъужьыгъэмрэ хахуагъэмрэ зыфIэлъапIэхэм, ди махуэхэм псэууэ къэса нэхъыжьыфI ветеранхэм лъытэныгъэ яхуэзыщIыну хуейхэм, ТекIуэныгъэ Иныр зыгъэмахуэщI псоми.

ЖэрдэмщIакIуэхэм къыхалъхьа Iуэхугъуэ щIагъуэр зэщIа хъун папщIэ, ар зыхуэунэтIахэм я телефонхэм я Iэмалхэр къагъэсэбэпыну къыхураджэ. Абы хэтыну хуейм «1945» бжыгъэр къещыпри ирегъауэ, адэкIэ къиIукIыну макъым жиIэм теухуауэ, къыхих бжыгъэм трекъузэри йодоIуэ. Къэрал псор къызэщIэзыубыдэ мультимедие пэхуэщIэр 2025 гъэм накъыгъэм и 15 пщIондэ екIуэкIынущ.

Жэрдэмыр дэзыщтахэм апхуэдэ щIыкIэкIэ:

• ар зытеухуар къащIэнущ;

• Совинформбюром махуэ къэс къита хъыбархэм диктор цIэрыIуэ Левитан Юрэ къеджэу дедэIуэнущ;

• телефон уэзджынэр къыщеуэкIэ, «Жэщ мазэхэ», «Катюшэ», «Славян пщащэм и иужьрей фIэхъусыр», «IэлъэщI щхъуантIэ», «дэ ТекIуэныгъэ закъуэщ дызыхуейр» уэрэд цIэрыIуэхэр пщIэ щIимыту триухуэфынущ;

• ТекIуэныгъэ Иным и логотипыр телефоным тригъэувэфынущ.

Хабзэ дахэ хъуауэ илъэс зыбжанэ лъандэрэ къыхалъхьэ Iуэхугъуэ дахэр ирагъэкIуэкI телефон зэпыщIэныгъэхэмкIэ къэралым и оператор нэхъ ин дыдэхэм. Абыхэм ящыщщ МТС, «Билайн», «Мегафон», T2 гупыр. ЖэрдэмщIакIуэхэм къыхалъхьа гукъэкIыр диIыгъащ УФ-м Бжыгъэралъанэ зыужьыныгъэмкIэ, зэпыщIэныгъэхэмрэ хъыбарегъащIэ IэнатIэхэмкIэ и министерствэм.

Фигу къэдгъэкIыжынщи, «ТекIуэныгъэм – Ура!» пэхуэщIэр япэ дыдэу 2010 гъэм, ТекIуэныгъэр илъэс 65-рэ щрикъум ирихьэлIэу, ирагъэкIуэкIащ. ИужькIэ абы къэралыр ТекIуэныгъэр илъэс 75-рэ щрикъум хыхьащ. 2020 гъэм екIуэкIа Iуэхугъуэм цIыху мелуан 21-м щIигъу хэтат.

ЖэрдэмщIакIуэхэм къэралым щыпсэухэр къыхураджэ пэхуэщIэм жыджэру хэтыну, хъыбарыр зэхэзымыхахэм лъагъэIэсыну. ПэхуэщIэр и дамыгъэмкIэ Интернетым къыщыбгъуэтыфынущ: #УраПобеде!

ШУРДЫМ Динэ.