СПОРТ ХЪЫБАРХЭР

Каратэ лIэужьыгъуэхэмкIэ зэпоуэ

Урысей Федерацэм киокушинымкIэ и чемпионатрэ пашэныгъэр къыщыхьыным хуэунэтIа зэхьэзэхуэрэ Мэзкуу къалэм щекIуэкIащ. Апхуэдэуи ныбжьыщIэхэм щхьэкIэ абы щызэхашащ «Спорт гугъапIэхэр» фIэщыгъэр зэрихьэу зэпеуэ щхьэхуэ.

Къэбэрдей-Балъкъэрым щыщу псори зэхэту цIыху 14 зэIущIэхэм хэтащ икIи медаль зыбжанэ къахьащ. Килограмм 42,5-рэ зи хьэлъагъхэм я деж япэ увыпIэр щиубыдащ Биткаш Ашшур. Абы и ныбжьыр илъэс 11 хъууэ аращ. А гуп дыдэм, ауэ килограмм 40 зи хьэлъагъхэм я деж, дыщэ медаль къыщихьащ Таттаевэ Iэмини.

Илъэс 16 - 17 зи ныбжьхэм я деж ещанэ щыхъуащ Абазэ Кемран (кг 50).

Балъигъхэм я зэхьэзэхуам япэ увыпIэр къыщихьащ Жамбей Астемыр. ЩIалэр щызауэр килограмм 75-рэ зи хьэлъагъхэм я дежщ. Зэхьэзэхуэм етIуанэ щыхъуащ Бахъсэн Темырлан (кг 70).

Иджы екIуэкIа зэхьэзэхуэр къызэрыхахыу щытащ. Абы щытекIуахэр хэтынущ мы гъэм Тунисым щекIуэкIыну дунейпсо чемпионатым.

Ди командэр зэхьэзэхуэхэм хуагъэхьэзыращ Биткаш Емельянрэ Давидрэ, КIэш Даут, Вэрокъуэ Энвер, Меркулов Александр сымэ.

Апхуэдэуи Мэзкуу къалэм зэзауэ зыхэт спорт лIэужьыгъуэхэмкIэ и центрым щекIуэкIащ УФ-м киокусинкай-каратэмкIэ и 21-нэ чемпионат. Абы щызэпеуащ къэралым и щIыналъэхэм ящыщу 24-м я спортсмени 118-рэ.

Къэбэрдей-Балъкъэрым и лIыкIуэ Биткаш Давид етIуанэ увыпIэр зэпеуэм къыщихьащ икIи Iэмал игъуэтащ мы гъэм Токио къалэм щекIуэкIыну дунейпсо чемпионатым хэтыну. Спортсменыр зэхьэзэхуэм хуагъэхьэзыращ абы и къуэш Биткаш Емельян, Гъэсашэ Тимур, Тилов Артур сымэ.

Бгым щызэпоуэ

УФ-м и еджапIэ нэхъыщхьэхэм бгы-лыжэ спортымкIэ я зэхьэзэхуэ Санкт-Петербург къалэм щекIуэкIащ иджыблагъэ. Абы хэтащ къэралым и спортсмени 150-м нэблагъэ.

Ди гуапэ зэрыхъущи, зэхьэзэхуэм и домбеякъ медалыр къихьащ Къэбэрдей-Балъкъэрым щыщ студент, бгы-лыжэ спортымкIэ 1-нэ разряд зиIэ Джэдгъэф Ислъам. ЩIалэм и тренерыр Прилатовэ Маринэщ.

Апхуэдэуи бгы-лыжэ спортымкIэ Кировск къалэм мы махуэхэм щызэхэта урысейпсо зэIущIэм къыщыхэжаныкIащ ди республикэм и гъэсэн, УФ-м спортымкIэ и мастер Потёмкин Егор. Ди лъахэгъум зэхьэзэхуэм етIуанэ увыпIэр къыщихьащ. Хьэлэмэтращи, дыщэ медалыр зыIэрызыгъэхьа Хорошилов Александр ар къызэрыкIэрыхуар секундэ 0,09-рэ къудейщ. Потёмкин Егори зыгъасэр Прилатовэ Маринэщ.

ЗэIущIэ екIуэкIам хэтащ УФ-м и спортсмен нэхъ лъэщхэм ящыщу 90-м щIигъу.