Ди псэлъэгъухэр
Къэбэрдей-Балъкъэрым ДзюдомкIэ и федерацэм и тхьэмадэ, УФ-м щIыхь зиIэ и тренер Емкъуж Мухьэмэд иджыблагъэ зыхуэдгъазэри дзюдом и Iуэхур республикэм зэрыщыщытым, спортсмен ныбжьыщIэхэм драгъэкIуэкI гъэсэныгъэ лэжьыгъэхэм тедгъэпсэлъыхьащ.
ЯпэщIыкIэ тренер цIэрыIуэм дыщигъэгъуэзащ илъэсым зэрыщIидзэрэ республикэм и дзюдоистхэр зэхьэзэхуэ зыбжанэм зэрыхэтам икIи абыхэм ящыщу Хэкум и хъумакIуэм и махуэр щагъэлъапIэм ирагъэхьэлIэу КъБР-м щыщ хеящIэ Бычэ Джульбер и фэеплъу ирагъэкIуэкIа зэпеуэр нэхъыщхьэу зэрыщытар. Зэхьэзэхуэр хуэунэтIат, я зэфIэкIыр утыкум щагъэлъэгъуэным къыдэкIуэу, мыхъумыщIагъэхэм зыдрамыгъэшэхыным щIалэгъуалэр хуэущииным, Джульбер хуэдэ цIыху щыпкъэхэм щапхъэ трегъэгъэхыным.
Емкъужым зэрыжиIамкIэ, щIэблэр терроризмэм, эктремизмэм щыхъумэным теухуауэ иджыри ирагъэкIуэкIынущ СОБР-м и унафэщIу щыта Щоджэн Къадир и фэеплъ зэхьэзэхуэ.
Апхуэдэуи ди бэнакIуэхэр хэтащ Налшык, Ставрополь, Грознэ къалэхэм щекIуэкIа нэгъуэщI зэпеуэхэми.
Емкъужым апхуэдэуи къыхегъэщ зыдэлажьэ сабийхэм я адэ-анэхэм ахъшэ къызэрыIамыхыр. «Щхьэ бзыщIын хуей – пщIэ къыIахыу сабийхэм ядэлажьэхэри щыIэу къыщIэкIынщ, ауэ ди деж апхуэдэ къыщекIуэкIыркъым», - жеIэ абы. Мухьэмэд зи гугъу ищIыр Ныр Сеф и цIэр зэрихьэу дзюдомкIэ щыIэ спорт еджапIэрщ. Абы щылажьэ тренерхэм улахуэр къэралым къарет.
Тренерыр щыцIэрыIуэм деж сабий нэхъыбэ абы хуашэ хабзэщ. Адэ-анэхэри щIэупщIэу къыщIэкIынщ хэт сыт хузэфIэкIми, и гъэсэнхэр здынэсам. Зэгуэрым зы щIалэ цIыкIу къыхуашат Мухьэмэди, къызэрыщIыхьэу абы и адэр щIэупщIат, дапщэ ахъшэу уэттынур, жиIэри. Зыри, щыжиIэм, абы и жэуапыр игу иримыхьу икIуэтыжащ икIи и щIалэм и Iэблэр иубыдри иришэжьэжат: накIуэ, мыхэр зыри хъунукъым, жыхуиIэу. Ахъшэ птымэ, нэхъыфIу къыпхущытыну, нэхъыбэ уагъэщIэну къызыщыхъу адэ-анэхэри нэхъыбэщ иджыпсту.
Тхьэм ещIэ, Мухьэмэд и зэфIэкIым щыгъуазэу къыщIэкIынтэкъым ар. Сытми, къигъэувыIэри жриIащ: «Мы спорт залым Тау Хьэсэнбий, УнэшхуэлI Аслъэн, Къамбий Аслъэн, Щад Мурат, Хьэбэчыр Мурат, Бэрэздж Светэ, Нэгуэр Айданэ, Мисиров Исмэхьил сымэ, нэгъуэщI куэди, псоми я цIэхэр иджыпсту схужыIэнукъым, къыщIэкIащ икIи абыхэм ящыщу зыми зыри къеIытхакъым». ЩIалэми, мис иджы къызгурыIуащ, жиIэри, сабийр къыщIинауэ щытащ зыщагъасэ пэшым.
Пэжыр жыпIэмэ, секцэм япэу къэкIуэну щIэзыдза цIыкIухэм фащэхэр езыхэм къащэхуж, ауэ зэхьэзэхуэхэм къыщыхэжаныкIхэм, ехъулIэныгъэфIхэр къэзыгъэлъагъуэхэм ахэр спорт еджапIэм къахуещэхуфри, ари куэд и уасэщ.
Мыдрейуэ, сабийхэм къэрал гулъытэ ягъуэт, ахъшэ гуэрхэр къалэжь щыхъур я ныбжьыр илъэс I8-м нэсауэ е нэхъыжьу щытмэщ. Абы щхьэкIи УФ-м, европей, дунейпсо зэхьэзэхуэхэм япэ увыпIищым языхэз къыщахьауэ щытын хуейщ.
Мухьэмэд апхуэдэуи жеIэ я IэщIагъэм зэрыхуеджам и щыхьэт тхылъхэр зимыIэ тренер я деж зэрыщымылажьэр. Абы нэмыщI, илъэс-илъэситI къэс абыхэм я щIэныгъэхэр къапщытэ, я Iэзагъэм зэрыхагъахъуэ зэIущIэхэри драгъэкIуэкI. Зи IэнатIэм хуэмыфащэ я деж щагъэлажьэркъым.
Террорист, экстремист щIэпхъаджагъэу сабийхэмрэ щIалэгъуалэмрэ ялэжьым, ди жагъуэ зэрыхъущи, хэхъуэ зэпытщ. Ар нэхъыбэу зи зэранри телефоныр мардэншэу сабийхэм зэраIыгъым хуагъэфащэ: зыхэмыхьэн сайтхэр къызэIуах, зызыпащIэ мыхъунухэм къагъапцIэри, иужькIэ, террорист, экстремист щIэпхъаджащIэхэм яIэщIэхуа мэхъу, зэрыхуейуэ къагъэсэбэпыну. Куэд хуейкъым сабийр е Iуэхуншэу уэрамым дэтыр дэпшэхыным. Аращи, ныбжьыщIэхэр ущииным, мыхъумыщIагъэхэм пэIэщIэ щIыным мыхьэнэшхуэ иIэщ ди зэманым. АбыкIэ къалэн хэха я пщэ къыдохуэ щIэблэм ядэлажьэхэм, абыхэм спортым хуэзыгъасэхэри яхэту.
Мухьэмэд жеIэ абы и лъэныкъуэкIэ тренерхэм я пщэ жэуаплыныгъэшхуэ къызэрыдэхуэр. Ахэр зэхуашэсурэ йопсалъэ, жраIэ, я деж къекIуалIэ сабийхэм я нэIэ трагъэтыну, уеблэмэ ахэр дзюдом зэрыхуагъэсэм прамыдзыхыу, я хьэл-щэным теухуауэ абыхэм нэхъыбэрэ епсэлъэну, яущиину.
КъБР-м СпортымкIэ и министерствэми щIэх-щIэхыурэ зэхуешэс, тренерхэр, апхуэдэ Iуэхухэми топсэлъыхь. ГурыIуэгъуэщ, сабийр тэмэму щытын, нэхъ губзыгъэ хъун щхьэкIэ епсэлъэн, щапхъэ тэмэм ебгъэлъагъуурэ ар бгъэсэн зэрыхуейр.
Диным зыри пэрыуэркъым, жеIэ Мухьэмэд, ар зехьэн хуейщ, ауэ абы щынэхъыщхьэу щытын хуейр къабзагъэрщ, цIыхугъэрщ, гущIэгъурщ.
Псом япэрауэ, цIыхур цIыхуу щытын хуейщ, итIанэщ спортыр, щIэныгъэр, IэщIагъэр. Япэм щыгъуэ спорт залым ущIыхьа иужь тренерыр щIэупщIэу щытащ школым узэрыщехъулIэм, языныкъуэхэри дневникхэм еплъырт. Тэмэму уемыджэрэ - уи оценкэ мыщIагъуэхэр зумыхъуэкIыжауэ спорт залым ущIагъэхьэртэкъым.
«Сэ сыкъапщтэмэ, си деж сабий къаша нэужь соупщI: мы цIыкIум сыт фызэрыщыгугъыр, жызоIэри. Ауэ сытми дыкъэкIуэнуращ жаIамэ, ар зыщ, чемпион ящIыну гугъэ яIэмэ - ари нэгъуэщIщ. Ауэ абдежми солъэIу дамыгъэпIэщIэну. ЯпэщIыкIэ цIыху гъэса къыхэщIыкIын хуейщ сабийм, итIанэщ адрейхэр къыщыкIэлъыкIуэр.
Емкъужым и гуапэу япэрей зэманыр игу къегъэкIыж. Япэрауэ, адэ-анэхэм унафэ къыхуащIу, я лэжьыгъэм къыхэIэбэу щытакъым. ЖыпIэнурамэ, Тау Хьэсэнбийхэ я деж кIуэурэ и адэ-анэм езыр Iэджэрэ елъэIуащ, щIалэ цIыкIур и деж нашэну. Езыхэм ар къыхуадэртэкъым - дэ хадэ, пщIантIэ, Iэщ диIэщ, ахэр зехьэн хуейщ, спортым тригъэкIуэдэн зэман абы иIэкъым, жаIэрти. Ярэби, псори дыщыгуфIыкIыжынщ, нэвгъакIуэ тренировкэм, жиIэурэ Мухьэмэд лъаIуэрт. АтIэ Iуэхум кърикIуари, Хьэсэнбий зэрыхъуари псоми ялъагъу.
«Иджырей адэ-анэхэм я бынхэр занщIэу чемпион ящIыну хэтщ. Аращ дызыхуэкIуар. Илъэсих-блы фIэкIа мыхъуа сабийр нашэри, япэу зыщIэупщIэр зыщ: мыр чемпион хъуну? ГъэщIэгъуэнращ, мыр цIыху тхуэфщI, тхуэвгъасэ, жаIэркъым. Чемпион фIэкIа, нэгъуэщI зыми хуеижкъым иджыпсту. Ар уи жагъуэ мэхъу. Нэхъапэм апхуэдэу щытакъым», - жеIэ Мухьэмэд.
