Я хьэлъагъ елъытауэ

Мы гъэм мэлыжьыхьым и 14-м Дагъыстэным и Хасавюрт къалэм щекIуэкIащ Кавказ Ищхъэрэм алыдж-урым бэнэ­кIэмкIэ балигъхэм я чемпионат. Зэхьэзэхуэм хэтащ къэралым и щIыналъэхэм я бэнакIуи 132-рэ, абыхэм ящыщу 15-р Къэбэрдей-Балъкъэрым икIауэ, икIи ехъулIэныгъэфIхэр ди щIалэхэм щызыIэрагъэхьащ. 

Я хьэлъагъ елъытауэ зыхэта гупхэм япэ увыпIэхэр къыщахьащ БищIо Астемыррэ (кг 72-рэ) КъуэщIысокъуэ Нурдинрэ (кг 97-рэ). ЕтIуанэ хъуахэщ Хьэжырокъуэ Умаррэ (кг 60) Чыл Казбекрэ (кг 82-рэ).
Тэркъан Казбек (кг 55-рэ), Тау Алим (кг 60), ХъуэкIуэн Альберт (кг 67-рэ), Жолдащ Валерэ (кг 77-рэ), Мэлыхъуэ Алан (кг 97-рэ) сымэ домбеякъ медалхэр къахьащ. 
Зэхьэзэхуэм япэ увыпIищыр къыщызыхьахэр хэтынущ УФ-м алыдж-урым бэнэкIэмкIэ и чемпионату мы гъэм и мэкъуауэ­гъуэм Омск къалэм щызэхашэнум.
Ди командэр зэпеуэм хуагъэхьэзыращ БищIо Валерэ, Къардэн Анзор, Къурмэн Мурат, Хъуран Мурат, Иуанхэ Аслъэнрэ Арсенрэ, Бекъан Хъызыр, Щокъарэ Мурат, КIыщ Мурат, Умар Залым, Елчэпар Мурат сымэ.
 

ЩIыхьыр лъагэу яIэт

Налшык къалэм и «Гладиатор» спорт комплексым щекIуэ­кIащ щIыналъэхэм бэнэкIэ хуитымкIэ я зэхьэзэхуэ. Абы щызэпеуащ Кавказ Ищхъэрэмрэ Урысей Ипщэмрэ я бэнакIуэ ныбжьыщIэу 400-м нэблагъэ, хэгъэрейхэри яхэту. 

Къэбэрдей-Балъкъэрым и гъэсэнхэм ехъулIэныгъэфIхэр зэхьэзэхуэм къыщагъэлъэгъуащ икIи псори зэхэту медаль 18 абы къыщахьащ, 8-р дыщэу. Я хьэлъагъхэм елъытауэ зыхэта гупхэм щытекIуащ Къэжэр Жамболэт (кг 26-рэ), Бэждыгъу Темырлан (кг 33-рэ), Заифов Умар (кг 42-рэ), Бицу Мухьэмэд (кг 48-рэ), Урысмамбэт Аслъэн (кг 50), Къэжэр Ибрэхьим (кг 52-рэ), Мыз Мухьэмэд (кг 68-рэ), БешкIур Ибрэхьим (кг 72-рэ) сымэ.