Къэбэрдей-Балъкъэр Республикэм и прокуратурэм и ветеран, цIыхубз щыпкъэ Шэт Ларисэ Iэдэм и пхъум къыщалъхуа махуэр егъэлъапIэ. Абы йохъуэхъу илъэс куэдкIэ къулыкъур зыдрихьэкIахэр, нобэ лажьэхэр, фIыщIэ хуащI и зэфIэкIымкIэ къазэрыдэгуашэм папщIэ.
Шэт Ларисэ КъБАССР-м и Прохладнэ районым хыхьэ Къэрэгъэш къуажэм 1960 гъэм мэлыжьыхьым и 27-м къыщалъхуащ.
Япэ совет прокурор нэхъыщхьэ Курский Д. И. и цIэр зэрихьэу Саратов дэт юридическэ институтыр 1982 гъэм къиухри, Новгород областым и прокуратурэм лэжьэн щыщIидзащ. Ар стажеру къащтащ, иужькIэ прокуратурэм и следователу, Хвойнинск районым и прокурорым и дэIэпыкъуэгъуу щытащ, мызэ-мытIэу игъэзэщIащ районым и прокурорым и къалэнхэр.
1985 гъэм и жэпуэгъуэм Шэт Ларисэ КъБАССР-м и прокуратурэм къагъэкIуэжащ, Тырныауз къалэм и прокурорым и дэIэпыкъуэгъу IэнатIэр дзыхь хуащIри. АдэкIэ къулыкъур ирихьэкIащ Прохладнэ районым и прокурорым и дэIэпыкъуэгъуу, дэIэпыкъуэгъу нэхъыжьу.
2013 гъэм и дыгъэгъазэм Ларисэ пенсэм кIуэри, зигъэпсэхуну тIысыжащ.
Къыхэдгъэщынщи, Шэт Ларисэ институтым щеджэу къратащ КПСС-м и Саратов обкомым и щIыхь тхылъыр, Новгород областым и прокурорым и унафэкIэ абы и цIэр ЩIыхь пхъэбгъум иратхащ, КъБАССР-м и прокуратурэм и унафэщI къулыкъухэр зыхуэбгъэфащэ хъунухэм хагъэхьат.
Урысей Федерацэм и прокурор нэхъыщхьэм Шэт Ларисэ фIыщIэ къыхуищIащ, къратащ «За верность закону» 1-нэ нагъыщэр, «Прокуратурэм и ветеран» медалыр. Мызэ-мытIэу республикэм и прокурорым гулъытэ къыхуищIащ и къалэныр щапхъэ пылъу зэригъэзащIэм, жэрдэм зэрыхэлъымрэ Iуэхур псынщIэу зэрызэфIихымрэ папщIэ. Илъэс куэдкIэ хьэлэлу зэрылэжьам щхьэкIэ Къэбэрдей-Балъкъэр Республикэм и Правительствэм и ЩIыхь тхылъыр къыхуагъэфэщащ.
Шэт Ларисэ прокуратурэм и Ветеранхэм (пенсионерхэм) я советым хэтщи, жылагъуэ Iуэхухэми хуэжыджэрщ.
Зи махуэшхуэр зыгъэлъапIэ Ларисэ дэри дохъуэхъу узыншэу, и мурадхэм ялъэIэсу, щIэблэм я гъуэгугъэлъагъуэу, гъащIэм и IэфIыр зыхищIэу куэдрэ псэуну.
