КъБР-м и Парламентым и УнафэщI Егоровэ Татьянэ зи чэзу зэIущIэр мэлыжьыхьым и 24-м иригъэкIуэкIащ.
Депутатхэр арэзы техъуащ КъБР-м Къэзыпщытэ-къэзыбж и палатэм и аудитор къулыкъум Мишковэ Иринэ ягъэувыну къызэрагъэлъэгъуам.
ЗэIущIэм къыщащтащ «Къэбэрдей-Балъкъэр Республикэмрэ Дагъыстэн Республикэмрэ сату-экономикэ, щIэныгъэ-техникэ, щэнхабзэ IуэхухэмкIэ зэрызэдэлэжьэнум теухуа зэгурыIуэныгъэм теухуауэ» КъБР-м и законым и проектыр. КъБР-м экономикэ зыужьыныгъэмкIэ и министр Рахаев Борис жиIащ Къэбэрдей-Балъкъэрым Дагъыстэным хуиIэ къуэш зэхущытыкIэхэр егъэфIэкIуэным мыхьэнэшхуэ зэрыритыр, лъэныкъуитIым я зэпыщIэныгъэм зезыгъэужьыну зэгурыIуэныгъэр абы зэрищыхьэтыр. «Къэбгъэлъагъуэмэ, мы зэманым Къэбэрдей-Балъкъэрыр Урысей Федерацэм и щIыналъэ 41-м зэгурыIуэныгъэкIэ ядолажьэ. Абы дяпэкIи зедгъэубгъуну ди мурадщ», - къыхигъэщащ министрым.
Депутатхэм зэхъуэкIыныгъэхэр халъхьащ КъБР-м Административнэ хабзэхэр къызэпемыгъэудынымкIэ и Кодексым и 8.5 статьям и Iыхьэ 5-м, «КъБР-м и къэрал мылъкум хыхьэхэм ятеухуауэ» КъБР-м и Законым и гуэдзэным.
Зы еджэгъуэкIэ къащтащ «Фадэрэ Iэпкълъэпкъыр жан зыщI нэгъуэщI псыхэмрэ ящэну щыхуит зэманыр гъэбелджылынымрэ КъБР-м Админист-ративнэ хабзэхэр къызэпемыгъэудынымкIэ и кодексым и Iыхьэ 7-1.13-мрэ ятеухуауэ» КъБР-м и Законым зэхъуэкIыныгъэхэр хэлъхьэным и IуэхукIэ» законопроектым. КъищынэмыщIауэ, депутатхэр арэзы техъуащ «Къэбэрдей-Балъкъэр Республикэм фэтэр куэду зэхэт унэхэр зыхуей щыхуэгъэзэныр къызэрыщызэрагъэпэщым теухуауэ» КъБР-м и Законым зэхъуэкIыныгъэхэр хэлъхьэным теухуауэ», «Къэбэрдей-Балъкъэр Республикэм волонтёр Iуэхухэр къызэрыщызэрагъэпэщым ехьэлIауэ» КъБР-м и законхэм я проектхэм.
«Унэ ящIын папщIэ, цIыху щхьэхуэхэм пщIэншэу щIы Iыхьэ Къэбэрдей-Балъкъэрым зэрыщыхухахымрэ республикэм и ЩIы кодексым и Iыхьэ 14-мрэ 17-мрэ зэхъуэкIыныгъэхэр хэлъхьэным и IуэхукIэ» КъБР-м и Законым и проектым щытепсэлъыхьым, КъБР-м ЩIы, мылъку зэхущытыкIэхэмкIэ и министр Тохъу Аслъэн къыхигъэщащ дзэм къулыкъу щызыщIэхэм зэрызыщIагъакъуэ Iэмалхэм дыщIагъуным тещIыхьауэ дэфтэрыр зэрагъэхьэзырар. Абы егъэбелджылы зэгурыIуэныгъэкIэ дзэм хэтхэм къэрал, муниципальнэ мылъкуу щыт щIы Iыхьэхэр пщIэншэу зэрыратыну щIыкIэр.
ЦIыхум и хуитыныгъэхэр хъумэнымкIэ КъБР-м и уполномоченнэ Зумакулов Борис 2024 гъэм я лэжьыгъэр зыхуэдар зэIущIэм къыщызэщIикъуэжащ.
- Къэрал, муниципальнэ унафэщIхэр, щIыпIэ унафэр зехьэнымкIэ IэнатIэхэр, хабзэхъумэхэр, дин, жылагъуэ IуэхущIапIэхэр, псори зэгъусэу делэжьащ дзэ Iуэху хэхам хэтхэм дэIэпыкъуэгъу дазэрыхуэхъуным. КъБР-м и Iэтащхьэм, Правительствэм, Парламентым я дэIэпыкъуныгъэ хэлъу, хъыбарыншэ е гъэр хъуахэр къэлъыхъуэным ди лэжьыгъэр тедухуауэ щытащ, - жиIащ Зумакуловым. - Сыт и лъэныкъуэкIи зыкъытщIагъэкъуащ УФ-м ЦIыхум и хуитыныгъэхэр хъумэнымкIэ и уполномоченнэ Москальковэ Татьянэ, УФ-м и Къэрал Думэм и депутат Геккиев Заур сыми. Гуапэ тщымыхъуу къэнакъым ЦIыхум и хуитыныгъэхэр хъумэнымкIэ КъБР-м и уполномоченнэм и IуэхущIапIэм Анэхэм я комитетым къыбгъэдэкIыу фIыщIэ тхыгъэ къызэрытIэрагъэхьар. Къыхэзгъэщыну сыхуейт дзэ Iуэху хэхам хэтхэм дазэрыIущIэм, я щытыкIэм зэрызыщыдгъэгъуазэм, зэрызащIэдгъакъуэм адэкIи зэрыпытщэнур. Къэбэрдей-Балъкъэрыр лъэпкъ Iуэхухэр зэрыщагъэзащIэмкIэ япэ ит щIыналъэхэм ящыщщ, экономикэ, промышленность IуэхухэмкIи ехъулIэныгъэхэр иIэщ. Узыншагъэр хъумэнымкIэ, егъэджэныгъэмкIэ, къапщтэмэ, социальнэ Iуэху псомкIи щIыналъэм и пщэрылъ-хэр егъэзащIэ.
Гугъуехь зыпылъ Iуэхухэм я гугъу щищIым, Зумакулов Борис къыхигъэщащ псэупIэ зратыну къызытехуэхэр чэзум куэдрэ хэтын хуей зэрыхъур, пенсэм щIагъу ахъшэр хьэпшыпми шхынми я уасэм зэрыхагъахъуэм зэрылъэщIэмыхьэр, нэгъуэщIхэри.
Егоровэ Татьянэ ЦIыхум я хуитыныгъэхэр хъумэнымкIэ КъБР-м и уполномоченнэм фIыщIэ хуищIащ сыт щыгъуи хуэдэу лэжьыгъэр зэгъэпэщауэ зэрыригъэкIуэкIым папщIэ. ЗэIущIэм и кIэухым ар депутатхэм ехъуэхъуащ Урысей парламентаризмэм и махуэр къызэрыблэгъамкIэ. «Гъэ къэс мэлыжьыхьым и 27-м урысейпсо махуэшхуэ догъэлъапIэ. Ар Урысей парламентаризмэм и махуэращ. ЗэрытщIэщи, къэралым и жылагъуэ-политикэ гъащIэр куэдкIэ елъытащ законрэ унафэу къатщтэхэм, депутатхэмрэ щIыналъэ унафэщIхэмрэ я Iуэху еплъыкIэхэр зэтехуэу зэрызэдэлажьэм. Псоми ди къалэныр зыщ - цIыхухэр зэIузэпэщу псэунымрэ ди къэкIуэнур дахэ зэрыхъунумрэ дыхущIэкъунырщ. Шэч къытесхьэркъым, ди япэ итахэм ягъэтIылъа лъабжьэр ди щIэгъэкъуэну, адэкIи лэжьыгъэ купщIафIэхэр зэредгъэкIуэкIыфынум. КъБР-м и Парламентым и къалэнхэр игъэзэщIэным ди зэфIэкI псори етхьэлIэнущ», - жиIащ хабзэубзыху IуэхущIапIэм и УнафэщIым.
Апхуэдэуи Егоровэр депутатхэм ехъуэхъуащ Гъатхэмрэ лэжьыгъэмрэ я махуэшхуэр, ТекIуэныгъэ Иныр къызэрытхьрэ илъэс 80 зэрырикъур къызэрыблэгъам къыхэкIыу.
