Туризм IэнатIэр зэтеухуэным ехьэлIауэ щыIэ, худэчых зыхэт кредит программэм и зэфIэкIхэм зрагъэубгъуащ. УФ-м и Правительствэм и УнафэщI Мишустин Михаил мэлыжьыхьым и 18-м иригъэкIуэкIа зэIущIэм щыжиIащ апхуэдэ унафэ къызэращтар. Абы Iэмал къаритынущ хьэщIэщхэм я гъуэлъыпIэхэм хагъэхъуэну икIи мин 78-м ахэр нагъэсыну, аквапаркыу 17, бгы-лыжэ комплексу 11 яухуэну, илъэс хъурейкIэ зыщыбгъэпсэху хъу паркхэм хуэдэу 2 къызэIуахыну. Къэралым и щIыналъэхэм ящыщу 50-м щIигъум а пэхуэщIэм хыхьэн жэрдэмхэр яIэщ.
«Апхуэдэ Iуэху бгъэдыхьэкIэм и фIыгъэкIэ ди цIыхухэм IэмалыщIэхэр къахукъуэкIынущ ди къэралым нэхъыбэрэ къыщакIухьыну, щIыналъэхэр зрагъэцIыхуну, абыхэм я дахагъхэмрэ лъэпкъ щэнхабзэхэм я беягъхэмрэ зрагъэлъагъуну, зрагъэщIэну», - жиIащ Мишустин Михаил.
«Туризмэмрэ хьэщIагъэмрэ» лъэпкъ пэхуэщIэм и Iыхьэ нэхъ инхэм хохьэ худэчых зыхэт кредитхэмкIэ программэр икIи Правительствэм и УнафэщIым и къуэдзэ Чернышенкэ Дмитрий и нэIэ щIэту ар мэлажьэ. ИджыпстукIэ, а программэр къагъэсэбэпу инвестицэ пэхуэщIэу 220-м щIигъу къэралым щолажьэ, псори зэхэту сом зы триллионым щIигъу я уасэу. Бизнесым дежкIэ абы щIэупщIэ зэриIэмрэ и фIагъымрэ зыхуэдэр къигъэлъэгъуащ абы и зэтеублэкIэм.
УФ-м экономикэ зыужьыныгъэмкIэ и министр Решетников Максим зэрыжиIамкIэ, иужьрей илъэсхэм туризм IэнатIэм инвестицэ мылъкушхуэ къыхашэ хъуащ. ЖыпIэнурамэ, 2024 гъэм хьэщIэщхэмрэ турист инфраструктурэмрэ я ухуэныгъэ лэжьыгъэхэм бизнесым къыхилъхьащ сом зы триллионым щIигъу е абы ипэ ита илъэсым щыIа бжыгъэхэм нэхърэ процент 35-кIэ нэхъыбэ. Къэрал дэIэпыкъуныгъэхэм, худэчых зыхэт кредит программэр хэту, мыхьэнэшхуэ яIэщ туризм IэнатIэм инвестицэ къешэлIа хъунымкIэ, абы къыпыщIауэ лажьэ нэгъуэщI IуэхущIапIэхэм заужьынымкIэ, пIалъэ кIыхькIэ инвесторхэр къыхэшэнымкIэ, щIыналъэхэм я экономикэм хэхъуэ яIэнымкIэ.
2024 гъэм УФ-м Экономикэ зыужьыныгъэмкIэ и министерствэм къыхихауэ щытащ экономикэ щIыналъэ щхьэхуэу къалъыта «Iуащхьэмахуэ» щIыпIэм и инвестицэ пэхуэщIэу 4, щыжаIащ КъБР-м Курортхэмрэ туризмэмкIэ и министерствэм. Абыхэм псоми зэхэту сом мелард 35,5-рэ я уасэщ икIи ахэр ягъэзащIэу щытмэ, лэжьыгъэ IэнатIэу 1000-м щIигъу къызэIуахыфынущ.
Худэчых зыхэт кредит программэм ипкъ иткIэ, ди щIыналъэм щIагъэзэщIэн мурад яIэу, дызэрыт илъэсми УФ-м Экономикэ зыужьыныгъэмкIэ и министерствэм пэхуэщIищ хуагъэхьащ. Ауэ а программэм къызэригъэувымкIэ, хьэщIэщхэм я пэшхэм я процент 5-м нэхърэ мынэхъ мащIэм сабийхэр я гъусэу унагъуэхэр къыщыувыIэфыну Iэмал яIэн хуейщ. ХэзыщIыкIхэм зэрыжаIэмкIи, апхуэдэ Iуэху бгъэдыхьэкIэм зэрыунагъуэу зыплъыхьакIуэ къэзыкIухьхэм я бжыгъэм хигъэхъуэнущ.
