ЛIэщIыгъуэхэм къапхокI

Къафэ гъуазджэр нэхъ пасэрей дыдэхэм ящыщу къалъытэ икIи ар илъэс къэс мэлыжьыхьым и 29-м ягъэлъапIэ. 

Къафэм и дунейпсо махуэм ирихьэлIэу, Тэрч ­районым зэхыхьэшхуэ щекIуэкIащ. «ЛIэщIы­гъуэ­хэм къыпхыкI къафэ» фIэщыгъэр зиIэ фестивалыр мыбдеж гъэ къэс къыщызэрагъэпэщ, райо­ным щыIэ къэфакIуэ гупхэр зэхигъэплъэжу. Убых, лъапэрисэ, бгырыс, уэркъ, мэлыхъуэ къа­фэхэм щегъэжьауэ иджырейхэм щыщIэкIыжу ­щагъэлъэгъуа зэхыхьэм ныбжьыщIэхэм щахузэ­фIэкIащ ди лъэпкъ щэнхабзэмрэ хабзэхэмрэ я теплъэгъуэхэмкIэ ди нэгу къыщIагъэувэн. 2025 гъэр ТекIуэныгъэ Иным и илъэсу зэрыщытым къыхэкIыу, зи къа­фэхэр совет цIыхубэм я лIыгъэр зэрыуахътыншэм, щIэблэ хэкупсэ къызэрытэджым тезыухуахэри яхэтащ. Апхуэдэт Плановскэ къуажэм дэт курыт школ 2-м и къэфакIуэ гупым игъэхьэзыра «Iущхьэ плъыжь», «ЗауэлIхэм я вальс» теплъэ­гъуэхэр, Терекскэ къуажэм ЩэнхабзэмкIэ и унэм екIуалIэ ныбжьыщIэхэм утыку кърахьа «Фэеплъыр дывгъэхьумэ» лэжьыгъэр, Тэрч къалэм Сабий творчествэмкIэ и центрым щызэхэт «Уличные ритмы» гупым «Хэку анэ» зыфIаща я къафэр, нэгъуэщI­хэри. Псори зэхэту къафэ 25-м нэблагъэ ягъэ­хьэзырат. 
Гуапагъэрэ хуабагъэрэ хэлъу екIуэкIа, лъэпкъ щэнхабзэр къэгъэщIэрэщIэжынымрэ ар къыдэ­кIуэтей щIэблэм егъэхъумэнымрэ хуэгъэза фестивалым къэпщытакIуэ гуп иIащ. Абы хэтащ: Тэрч щIыналъэм и Жылагъуэ палатэм и унафэщI, райо­ным ЩэнхабзэмкIэ и унэм и тхьэмадэ КIэрэф Мурадин, Тэрч къалэм Сабий творчествэмкIэ и центрым и методист Белгъуш Джульетэ, Тэрч районым ЩэнхабзэмкIэ и унэм и методикэ центрым и унафэщI Магреловэ Татьянэ, «Кабардинка» къэрал ансамблым и къэфакIуэ, Гъуэныбэ Астемыр ­къафэхэмкIэ и школым и гъэсакIуэ Гъуэныбэ Полинэ, Сатибал Казбек къафэхэмкIэ и школым и гъэсакIуэ Тут ­Залинэ сымэ. 
Зэхыхьэм кърикIуар къыщызэщIакъуэжым, абыхэм жаIащ фестивалым хэта псоми нэгъэсауэ, гукъыдэжыр къызэщIаIэтэу зыкъызэрагъэлъэ­гъуар, икIи, увыпIэ хэхахэм япIэкIэ, дэтхэнэми, и унэтIыныгъэ елъытауэ, щIыхь тхылъ зэрыхуагъэ­фэщар.
«КъэфакIуэ ныбжьыщIэхэм, абыхэм я адэ-анэхэмрэ гъэсакIуэхэмрэ фIыщIэ фхудощI. Ди лъэпкъ щэнхабзэм и дахагъэр, ижь-ижьыж лъандэрэ къыддэгъуэгурыкIуэ зэныбжьэгъугъэмрэ зэкъуэтыныгъэмрэ нобэ зэгъусэу вгъэлъэгъуащ. ИкъукIэ лэжьыгъэшхуэ я пщэ дэлъщ гъэсакIуэхэм. Хэкур фIыуэ ялъагъуу, я тхыдэмрэ щэнхабзэмрэ ящIэу щIалэгъуалэр къэгъэхъуным абыхэм хуащI хэлъхьэныгъэр уасэ зимыIэщ. Дэтхэнэми дынывохъуэхъу Къафэм и дунейпсо махуэмкIэ, Гъатхэмрэ лэжьыгъэмрэ я махуэшхуэмкIэ, мыгувэу ТекIуэныгъэ Иныр зэрыдгъэлъэпIэнумкIэ! Ди лъахэр ефIэкIуэнырщ, мамырыгъэрщ ди плъапIэр», - жиIащ КIэрэф Мурадин. 
КъэфакIуэ ныбжьыщIэхэм адэкIи ехъулIэныгъэ куэд яIэну ехъуэхъуу, зэхыхьэм къыщыпсэлъащ уэрэдымрэ къафэмкIэ «Джылахъстэней» цIыхубэ ансамблым и унафэщI, районым и гъэсакIуэ нэхъыжь дыдэ Шыдыгъу Хьэщауэ.
Апхуэдэ щIэблэ дахэрэ зэчиифIэрэ къэзыгъэхъу гъэсакIуэхэм дэри дохъуэхъу, зи ужь ит IэщIагъэм и хъер ялъагъуну, ефIэкIуэну, узыншагъэ быдэ яIэну.