Спортым и хъыбархэр

12 мая, 2025 - 12:30
Дыкъынэмрэ ХьэпцIэмрэ къахожаныкI
Урысей Федерацэм алыдж-урым бэнэкIэмкIэ пашэныгъэр къыщыхьыным хуэунэтIа зэхьэзэхуэ Мейкъуапэ къалэм щекIуэкIащ. Абы щызэпеуащ къэралым и щIыналъэ куэдым я бэнакIуэ 637-рэ, я ныбжькIэ илъэс 16-м щIимыгъуауэ. 
Къэбэрдей-Балъкъэрым и щIыхьыр яIэт мурад яIэу зэхьэзэхуэм щыIащ спортсмен 37-рэ икIи ехъулIэныгъэ хъарзынэхэр къыщагъэлъэгъуащ.
Зэпеуэм домбеякъ медалхэр къыщахьащ Дыкъынэ Русланрэ (кг 35-рэ) ХьэпцIэ Самиррэ (кг 57-рэ) икIи абыхэм Iэмал ягъуэтащ ди къэралым и командэ къыхэхам хэту Европэм алыдж-урым бэнэкIэмкIэ пашэныгъэр къыщыхьыным хуэунэтIа зэхьэзэхуэм я зэфIэкIхэр щагъэлъэгъуэну. Ар щекIуэкIынур зэкIэ яубзыхуакъым, зэрыхуагъэфащэмкIэ, Алыджырщ е Италиерщ. 
Командэр зэхьэзэхуэм хуагъэхьэзыращ Табыхъу Тимур, Жыкъуэ Залымхъан, Чыл Казбек, Бекъан Хъызыр сымэ.
 
 
                            ФIым къыхураджэу
«Спортыр террорым и бийщ» къыхуеджэныгъэм щIэту Къэбэрдей-Балъкъэрым киокушин-карате лIэужьыгъуэмкIэ и республикэ зэхьэзэхуэ зэIуха Налшык къалэм щекIуэкIащ. Хэгъэрейхэм нэмыщI, абы хэтащ Дагъыстэным, Осетие Ищхъэрэ – Аланием, Шэшэным я спортсмен 250-м щIигъу. 
Зэхьэзэхуэр екIуэкIащ «Терроризмэмрэ экстремизмэмрэ КъБР-м щымыгъэIэн» къэрал программэм ипкъ иткIэ, къитащ КъБР-м СпортымкIэ и министерствэм. Апхуэдэуи абы щрагъэкIуэкIащ илъэси 5 - 9 зи ныбжь спортсмен цIыкIухэм папщIэ егъэджэныгъэ-зыгъэсэныгъэ зэIущIэхэр. 
Зэпеуэхэм къарикIуахэр зэхалъхьэжа нэужь наIуэ къызэрыхъуамкIэ, гупхэм я зэхьэзэхуэм япэ увыпIэр щиубыдащ «Кайман Налшык» спорт клубым, Осетие Ищхъэрэм къикIа «Азумэ» командэр етIаунэ хъуащ. Ещанэ увыпIэр иубыдащ ди къалащхьэм и «Филэ» спорт клубым.
ЗэIущIэм къыщыхэжаныкIахэм кубокхэр, медалхэр, щIыхь тхылъхэр, фэеплъ саугъэтхэр иратащ.  
 
 
                               Джырандокъуэм и гъэсэным и медаль
Ди къэралым ММА-мкIэ и бэнакIуэхэр Налшык къалэм и «Гладиатор» спорт комплексым иджыблагъэ щызэхуэсащ икIи махуэ зыбжанэкIэ нэхъ лъэщыр абыхэм зэхагъэкIащ.
 Зэхьэзэхуэм хэтащ УФ-м и щIыналъэхэм ящыщу 43-м я спортсмени 150-рэ, я ныбжькIэ илъэс 18 - 20 хъухэу. 
Къэбэрдей-Балъкъэрым и командэм щыщу Джафаров Ренат килограмм 66-рэ зи хьэлъагъхэм я деж дыжьын медаль къыщихьащ. Ар зыгъасэр Джырандокъуэ Амирщ. 
 
                                                                              ВагъуэщIэхэр
 «ВагъуэщIэхэр» фIэщыгъэр зэрихьэу спорт гимнастикэмкIэ щIыналъэ зэхьэзэхуэ Ставрополь крайм и къалащхьэм щекIуэкIащ. Хэгъэрейхэм я гъусэу абы хэтащ Дагъыстэнымрэ Къэбэрдей-Балъкъэрымрэ я гимнаст 52-рэ, абы щыщу 9-р Налшык икIауэ. 
Я ныбжь елъытауэ зыхэта гупхэм япэ увыпIэхэр къыщахьащ ныбжьыщIэхэм я деж 3-нэ разряд зиIэ Хачатуровэ Мие, 2-нэ разряд зиIэхэу Хачатуровэ Евэрэ Бэч Арианэрэ, 1-нэ разряд зиIэ Цой Евэ сымэ. 
Къул Мелихъан етIуанэ увыпIэр къыщихьащ зэхьэзэхуэм. Абы иIэщ 2-нэ разряд. Япэ разрядхэр зиIэ Батыр Денизэ, Бэч Меллисэ сыми домбеякъ медалхэр къахьащ. 
3-нэ спорт разряд зиIэ КъарэцIыкIу Аишэ япэ увыпIэр къихьащ, 2-нэ спорт разряд зиIэ Нэгъуей Саидэ етIуанэ хъуащ. 
Спортсменхэр ягъэхьэзыращ Продуновэ-Исметовэ Еленэрэ Третьяковэ Эллэрэ. 
АЛЫДЖЫКЪУЭ Руслан.
  • 41 просмотр
Поделиться: