Сатууэ ящIым хагъахъуэ

20 мая, 2025 - 06:47
Кавказ Ищхъэрэм СтатистикэмкIэ и управленэм къызэритамкIэ, 2025 гъэм и щIышылэм - мазаем къриубыдэу Къэбэрдей-Балъкъэрым розницэ сатууэ щащIам и куэдагъым сом мелард 45,8-рэ къыпэкIуащ е нэгъабэ и апхуэдэ пIалъэм щыIахэм проценти 106,1-кIэ хуэкIуэу. 
Къапщытэж лъэхъэнэм къриубыдэу розницэ сатууэ ди щIыналъэм щащIам и процент 55,1-р тыкуэнхэмрэ уней IуэхущIапIэхэмрэ къалъос, бэзэрхэмрэ жармыкIэхэмрэ яйр процент 44,9-рэ мэхъу. Псори зэхэту яща продукцэхэр зэпэщхьэхуэу къэдгъэлъагъуэмэ, ерыскъыхэкIхэм, псыхэкIхэмрэ тутынхэмри хэту, процент 50,2-р яIыгъщ, ерыскъыхэкIыу щымыт продукцэхэм – процент 49,8-р. 
А пIалъэм къриубыдэу республикэм и цIыхухэм иращащ ерыскъыхэкIыу сом мелард 23-рэ и уасэ. 2024 гъэм и апхуэдэ пIалъэм щыIа бжыгъэхэм нэхърэ ар проценти 4,5-кIэ нэхъыбэщ, ерыскъыхэкIыу щымыт продукцэу ящам и куэдагъым проценти 7,7-кIэ хагъэхъуащ е сом мелард 22,8-рэ я уасэ ящащ. 
Дызэрыт илъэсым гъатхэпэм и 1-м ирихьэлIэу сату зыщI IуэхущIапIэхэм хьэпшып гъэтIылъыгъэу ящэну яIэр сом меларди 5,2-рэ и уасэ мэхъу, ар процент 1,6-кIэ нэхъыбэщ абы ипэ ита мазэм щыIа бжыгъэхэм нэхърэ икIи процент 11,7-кIэ нэхъыбэщ 2024 гъэм и апхуэдэ пIалъэм елъытауэ.
КъБР-м ПромышленностымкIэ, сатумрэ энергетикэмкIэ и министерствэм нэгъабэ иригъэкIуэкIа лэжьыгъэхэм къарикIуахэр къыщызэщIакъуэжа зэIущIэм щыжаIауэ щытащ республикэм апхуэдэ зэфIэкIхэр къызэригъэлъагъуэр IэнатIэм ират къэрал дэIэпыкъуныгъэхэм, «Дунейпсо кооперацэмрэ экспортымрэ», «Зэхьэзэхуэр зи лъабжьэ экономикэ лъэщ» лъэпкъ пэхуэщIэхэмрэ, щIыналъэ дэIэпыкъуныгъэм зэрафIыгъэр. 
ХЬЭЩЫКЪУЕЙ Олег.
  • 58 просмотров
Поделиться: