|
ПОСЛЕДНЕЕСАЙТЫ ПОРТАЛА СМИ КБР | ||
2025 гъэм и япэ мазищым Кавказ Ищхъэрэм СтатистикэмкIэ и управленэм къызэритамкIэ, 2025 гъэм и щIышылэ – гъатхэпэм Къэбэрдей-Балъкъэрым и промышленнэ индексыр нэгъабэ и апхуэдэ пIалъэм щыIа бжыгъэхэм елъытауэ проценти I07,2-рэ хъуащ.
Республикэм и экономикэм и IэнатIэхэм я индексхэр щхьэхуэу къэдгъэлъагъуэмэ, щIыуэпс хъугъуэфIыгъуэхэр къыщIэзых IэнатIэхэм я индексыр проценти II0-рэ, продукцэхэр къыщIэзыгъэкIхэм, абыхэм елэжь IэнатIэхэм – проценти I09,2-рэ, электрокъарукIэ, газкIэ, хуабэкIэ къызэзыгъэпэщ, хьэуар зыгъэкъабзэ IэнатIэхэм - процент 95,8-рIэ, псыкIэ къызэзыгъэпэщхэм, псы къагъэсэбэпар Iузышхэм, кIэрыхубжьэрыхухэр зэщIэзыкъуэхэм, уэрамхэр, пщIантIэхэр зыгъэкъабзэхэм, зэлъыIузыххэм - проценти III,9-рэ хъуахэщ.
Къапщытэж пIалъэм къриубыдэу лыуэ къалэжьам, пхъэщхьэмыщхьэ-хадэхэкI консервхэм, шэм, комбикормым, пластмассым къыхэщIыкIа бжэ-щхьэгъубжэм, гъущIым къыхэщIыкIа продукцэм, полупроводник приборхэм, автотранспортым и пкъыгъуэхэм, нэгъуэщI продукцэхэми хэхъуащ.
Апхуэдэу щыхъукIи, нэкулъ лIэужьыгъуэм, крупIэм, асфальтрэ бетонрэ зэхэщIам, унэлъащIэм, лэжьыгъэ, медицинэ Iэмапсымэхэм, рентген аппаратхэм кIэрыхуащ. Нэхъ мащIэ хъуащ электрокъаруурэ псы хуабэу а пIалъэм къалэжьари.
2025 гъэм и япэ мазищым къриубыдэу къат куэду зэтет унэу I5 щIыналъэм щаухуащ, унагъуэхэм - псэупIэу I625-рэ. Псори зэхэту псэупIэу яухуам метр зэбгъузэнатIэ мин 220,8-рэ яубыдащ икIи ар процент 50-кIэ нэхъыбэщ нэгъабэ и апхуэдэ пIалъэм яхузэфIэкIам нэхърэ. Къуажэ щIыпIэхэм щаухуа псэупIэхэр зэхэту метр зэбгъузэнатIэ мини I44-рэ мэхъу икIи ар процент 70-кIэ нэхъыбэщ 2024 гъэм и щIышылэ-гъатхэпэм щыIа бжыгъэхэм нэхърэ.
Мэкъумэш продукцэу къыщIагъэкIащ псори зэхэту сом меларди 8,4-рэ я уасэ е нэгъабэ и апхуэдэ пIалъэм щыIа бжыгъэхэм проценти I02-кIэ хуэкIуэу. 2025 гъэм мэлыжьыхьым и I-м ирихьэлIэу республикэм и мэкъумэш IуэхущIапIэхэм псоми зэхэту Iэщрэ джэдкъазрэ щхьэ быжыгъэу мин 280,I-рэ яIащ. 2024 гъэм и апхуэдэ пIалъэм ар зэрыхъуар мин 27I,7-рэщ. Мэлырэ бжэну яIащ мин 447,3-рэ (2024 гъэм – мин 424,9-рэ), джэдкъазу мелуани 4,4-рэ (2024 гъэм – мелуани 4,2-рэ), кхъуэуэ – мини 2 (2024 гъэм – мини 3,9-рэ).
Къапщытэж пIалъэм къриубыдэу унагъуэхэм Iэщрэ джэдкъазу яIыгъам я бжыгъэр зэпэщхьэхуэу къэдгъэлъагъуэмэ, Iэщышхуэм процент 72,2-р еубыд, абы щыщу процент 67-р жэмым къылъос. Мэлымрэ бжэнымрэ – процент 46,I-рэ, джэдкъазым – процент 42,1-рэ, кхъуэм – процент 99,2-рэ.
Мэкъумэш, фермер, уней IуэхущIапIэхэм, унагъуэхэм зэхэту лыуэ къалэжьащ (псэууэ шэчауэ) тонн мин 25,6-рэ икIи ар проценти 5,6-кIэ нэхъыбэщ нэгъабэ и апхуэдэ пIалъэм яхузэфIэкIам нэхърэ. Шэуэ къашащ тонн мини I00,7-рэ, нэгъабэ щыIа бжыгъэхэм нэхърэ ар проценти 2,1-кIэ нэхъ мащIэщ. ДжэдыкIэу къыщIахащ мелуан 44,6-рэ. Нэгъабэрей бжыгъэхэм нэхърэ проценти 2,8-кIэ ар нэхъыбэщ.
Апхуэдэу щыхъукIи, мэкъумэш IуэхущIапIэхэм продукцэу къалэжьам кIэрагъэхуащ дызытепсэлъыхь пIалъэм къриубыдэу. ЖыпIэнурамэ, зы жэмым шэуэ къыщIашар зэрыхъуар килограмм I483-рэщ, атIэ килограмм I854-рэ хъууэ щытащ ар нэгъабэ. Зы джэдым хуэзэу джэдыкIэ 45-рэ къыщIахащ, нэгъабэ – 47-рэ ар хъуащ.
2025 гъэм и япэ мазищым розницэу сату ящIам псори зэхэту сом мелард 7I-рэ къыпэкIуащ е нэгъабэ и апхуэдэ пIалъэм щыIа бжыгъэхэм нэхърэ проценти I06,8-кIэ нэхъыбэу. ЦIыхухэм иращащ ерыскъырэ ерыскъыхэкIыу (псыхэкIхэмрэ тутынымрэ хэту) сом мелард 35,3-рэ и уасэ е 2024 гъэм и апхуэдэ пIалъэм щыIа бжыгъэхэм проценти 104,1-кIэ хуэкIуэу. Ерыскъыуэ щымыт хьэпшыпу сом мелард 35,7-рэ и уасэ цIыхухэм иращащ. Ари проценти I09,4-кIэ нэхъыбэщ нэгъабэ яхузэфIэкIам нэхърэ.
Апхуэдэуи Кавказ Ищхъэрэм СтатистикэмкIэ и управленэм къызэритамкIэ, пщIэ зыщIат Iуэхутхьэбзэхэми я щIэупщIэм хэхъуащ. ЖыпIэнурамэ, 2025 гъэм и щIышылэ - гъатхэпэм къриубыдэу республикэм и цIыхухэм Iуэхутхьэбзэ зэхуэмыдэу хуащIащ сом мелард I9,4-рэ и уасэ, е, иджыпсту къекIуэкI уасэхэм тещIыхьауэ, нэгъабэ и апхуэдэ пIалъэм щыIа бжыгъэхэм проценти II4,2-кIэ нэхъыбэу.
Унагъуэ Iуэхухэм пыщIа Iуэхутхьэбзэхэм къыпэкIуащ сом меларди 3,2-рэ икIи ар нэхъыбэщ 2024 гъэм и апхуэдэ пIалъэм щыIа бжыгъэхэм нэхърэ.
Къэбгъэлъагъуэмэ, пщIэ зыщIат Iуэхутхьэбзэу цIыхухэм хуащIам и процент 70-р зылэжьар хьэрычэт IэнатIэ мащIэмрэ курытымрэ я IуэхущIапIэхэрщ, процент 30-р – нэгъуэщIхэм.
Поделиться:
Читать также:
16.12.2025 - 16:30 →
Ди Пщызэбий
16.12.2025 - 16:15 →
И зэран къомыкIмэ…
16.12.2025 - 13:02 →
ЩIыналъэхэр ягъэдахэ
16.12.2025 - 09:00 →
Iуащхьэмахуэ лъапэ зрагъэужь
15.12.2025 - 11:37 →
Щыпсэу щIыналъэм къыщалъыхъуэ
| ||
