Тыркум кIуэну загъэхьэзыр

Урысей Федерацэм кикбоксингымкIэ пашэныгъэр къыщыхьыным хуэунэтIа зэхьэзэхуэ Мэзкуу областым хыхьэ Наро-Фоминск къалэм щекIуэкIащ дзэ Iуэху хэхам и лIыхъужьхэмрэ ТекIуэныгъэ Иныр илъэс 80 зэрырикъумрэ теухуауэ. Абы кърихьэлIащ ди къэралым и щIыналъэхэм я спортсмен, щIалэхэри хъыджэбзхэри зэгъусэу, 1500-м щIигъу.

МахуиплIкIэ екIуэкIа зэпеуэм Къэбэрдей-Балъкъэрым къыбгъэдэкIыу хэтащ цIыху 21-рэ, я зэфIэкIхэр щагъэлъэгъуащ кикбоксингым и «лоу-кик», «К1», «фулл-контакт» унэтIыныгъэхэм икIи медаль 12 къахьащ.
Я хьэлъагъ елъытауэ щызэуа гупхэм ди республикэм текIуэныгъэхэр къыхуахьащ Къардэн Азэмэт, СэвкIуий Саид, Ламырдон Дианэ сымэ. ЕтIуанэ хъуахэщ Хутэ Адэлбий, Абдусаламов Саид, Къэрмокъуэ Элинэ сымэ.
Къумыкъу Алан, Шыкъ Албэч, ХьэпцIэ Алан, Джангуразов Щамил, Зияддинов Ибрэхьим, Курбанов Рэмэзан сымэ домбеякъ медалхэр къахьащ.
Зэхьэзэхуэм япэ, етIуанэ увыпIэхэр къыщызыхьахэр УФ-м и командэ къыхэхам хэту мы гъэм жэпуэгъуэм Тыркум щекIуэкIыну дунейпсо зэпеуэм кIуэнущ. 
Ди командэм ядэлажьэр Куэшмэн Рустам, Къудей Алим, Саралидзе Айдин, БейцIыкIу Ибрэхьим, Сасыкъ Анзор сымэщ.