ЕхъулIэныгъэщIэхэр иIэну!

Нобэ и ныбжьыр илъэс 95-рэ ирокъу Урысей Федерацэм ЛэжьыгъэмкIэ и ЛIыхъужь, Адыгэ, Къэбэрдей-Балъкъэр, Къэрэшей-Шэрджэс республикэхэм я цIыхубэ тхакIуэ МэшбащIэ Исхьэкъ.
МэшбащIэ Исхьэкъ и къалэмыпэм къыщIэкIащ тхылъ 90-м щIигъу. Абы и творчествэр лъэпкъ куэду зэхэт ди къэралым и фIыгъуэщ, тхакIуэм и лэжьыгъэхэм мызэ-мытIэу къыхуагъэфэщащ къэрал дамыгъэхэр. Ар ди республикэхэм я щэнхабзэр къулей зыщIа, псалъэм и купщIэр нэсу къызыгурыIуэ тхакIуэшхуэщ. МэшбащIэм и тхылъхэм къыщыгъэлъэгъуэжащ  Кавказ Ищхъэрэм, къэрал псом щыпсэу лъэпкъхэм  лIыхъужьыгъэ зыпылъ я гъуэгуанэ гугъур. Абыхэм цIыхум, къэралым, хэку цIыкIум хуиIэн хуей лъагъуныгъэр щыпхрышащ, фIым, пэжым, захуагъэм ухураджэ.
ТхакIуэ, усакIуэ, зэдзэкIакIуэ щэджащэ МэшбащIэ Исхьэкъ Кавказым и литератруэм зегъэужьыным къыпхуэмылъытэн хэлъхьэныгъэ хуищIащ.
Гулъытэ щхьэхуи фIыщIи хуэфащэщ абы иригъэкIуэкI жылагъуэ лэжьыгъэми. УФ-м и Жылагъуэ палатэм щылажьэкIэрэ, тхакIуэхэм лъэпкъхэм яку зэгурыIуэныгъэ дэлъу къэгъуэгурыкIуэнкIэ Iуэху куэд зэфIихащ. Ар жылагъуэ-политикэ щытыкIэм куууэ кIуэцIрыплъыф цIыхущ, абы и щхьэусыгъуэр гъащIэ и пIалъэ фIыуэ зэрищIэрщ, щIэныгъэшхуэрэ Iущагъышхуэрэ зэрыбгъэдэлъырщ.
ПщIэшхуэ зыхуэсщI МэшбащIэ Исхьэкъ сигуми си псэми къабгъэдэкIыу сохъуэхъу узыншагъэ быдэ, дэрэжэгъуэ мыкIуэщI, творческэ ехъулIэныгъэщIэхэр иIэну!