ЦIыху гуапэт, егъэджакIуэ зэчиифIэт

Социалист Лэжьыгъэм и ЛIыхъужь, Къэбэрдей-Балъкъэр АССР-м щIыхь зиIэ и егъэджакIуэ Къамбий Мухьэб Алим и къуэр Хэку зауэшхуэм и пэщIэдзэм Дзэ Плъыжьым ираджащ икIи механик IэщIагъэ щрагъэгъуэту Астрэхъэн дэт дзэ-кхъухьлъатэ еджапIэм ягъэкIуащ.

1941 гъэм и щэкIуэгъуэм къыщыщIэдзауэ 1941 гъэм и шыщхьэуIу пщIондэ Къамбийр Астрэхъэн къалэм хым тет кхъухьхэр щызэрагъэпэщыжу дэт заводым слесарь-механикыу щылэжьащ. 

1942 гъэм и фокIадэм къыщыщIэдзауэ 1943 гъэм и жэпуэгъуэ хъуху, дзэм хэту ар щызэуащ Сталинград, Ипщэ фронтхэм. 1943 гъэм и жэпуэгъуэм къыщегъэжьауэ 1944 гъэм и жэпуэгъуэ пщIондэ ар щIэсащ кхъухьлъатэзехуэхэр щагъэхьэзыру Кировобад дэта еджапIэм. 1944 гъэм и жэпуэгъуэм ар къиухащ, лагъымзехьэ авиацэм и кхъухьлъатэзехуэ IэщIагъэр иIэу. Лейтенант нэхъыщIэ цIэр къыфIащри, Къамбийр а еджапIэм къагъэнэжауэ щытащ кхъухьлъатэзехуэ-инструктору.

1946 гъэм Къамбий Мухьэб къигъэзэжащ къыщалъхуа къуажэм икIи щIэблэр егъэджэным и гъащIэр триухуащ.

1946 гъэм и щэкIуэгъуэ мазэм къыщыщIэдзауэ 1953 гъэм и бадзэуэгъуэ пщIондэ математикэр щригъэджащ Каменномост (Къармэхьэблэ) дэт езанэ курыт школым. Зэрылажьэм хуэдэу, Къамбийм къиухащ педагогикэ институтыр, иужькIэ Къэбэрдей-Балъкъэр къэрал университетыр.

1958 гъэм Каменномост дэт курыт еджапIэ №1-м и унафэщIу ар ягъэуващ икIи а IэнатIэм илъэс 30-кIэ пэрытащ. ПэщIэдзэ классхэм щIэсхэр урысыбзэкIэ егъэджэным япэу хуэкIуа школхэм ящыщт ар зи унафэщI, щIыналъэм щынэхъыфIхэм хабжэ школыр, егъэджакIуэхэм я щIэныгъэм щыхагъахъуэ институтым къэхутэныгъэхэр щригъэкIуэкI и IуэхущIапIэуи щытащ илъэс куэдкIэ.

Къамбий Мухьэб республикэм и жылагъуэ гъащIэми жыджэру хэтащ. Ар мызэ-мытIэу хахащ къуажэ, щIыналъэ советхэм я депутату, егъэджэныгъэ IэнатIэм и лэжьакIуэхэм я профсоюзым и обкомым хэтащ, егъэджакIуэхэм я союзпсо зэхуэсхэм я лIыкIуэу щыIащ.

КъытщIэхъуэ щIэблэр егъэджэным, гъэсэным Мухьэб хуищIа хэлъхьэныгъэхэм къэралым гулъытэшхуэ щигъуэтащ. СССР-м и Совет Нэхъыщхьэм и  Президиумым  1968 гъэм бадзэуэгъуэм и 1-м къыдигъэкIа УнафэмкIэ абы къыфIащащ Социалист Лэжьыгъэм и ЛIыхъужь цIэр. Къамбийм къыхуагъэфэщащ Ленин орденыр, «Къэбэрдей-Балъкъэр Республикэм и пащхьэм щиIэ фIыщIэхэм папщIэ» орденыр, медаль зэмылIэужьыгъуэхэр. Абы къыфIащащ «Къэбэрдей-Балъкъэр Республикэм и школым щIыхь зиIэ и егъэджакIуэ» цIэ лъапIэр. Къамбий Мухьэб и цIэр езыр унафэщIу щылэжьа курыт школ №1-м.

ЦIыху гуапэу, егъэджакIуэ зэчиифIэу, къызэгъэпэщакIуэ Iэзэу къэгъуэгурыкIуа Къамбий Мухьэб Алим и къуэр псэужамэ, мы гъэм илъэси 102-рэ ирикъунут.

 АНЗОРЫКЪУЭ Аслъэмырзэ.